މަސްތުވާތަކެތީގެ ފަރުވާގެ ނިޒާމު ބަލަހައްޓާ، ނޭޝަނަލް ޑްރަގް އެޖެންސީ (އެންޑީއޭ) އަށް މަސްތުވާތަކެތީގެ ކަންކަމުގައި ބުނަންޖެހޭ ބަސް ބުނުމުގެ ފުރުސަތު ފަހިވެފައި ނެތްކަމަށް އެ އެޖެންސީން މިދިޔަ އާދީއްތަދުވަހު ބުނެފި އެވެ.
މަސްތުވާތަކެތީގެ ވަބާގައި ޖެހިފައިވާ ގިނަ ބަޔަކަށް ފަރުވާ ނުލިބި މަގުމަތިވެފައިވާ ކަމުގެ ޝަކުވާ ބޮޑެވެ. މިކަން މިގޮތަށް ދިމާވެފައިވާ އެއް ސަބަބެއްގެ ގޮތުގައި އޮތީ މަސްތުވާތަކެތީގެ ފަރުވާގެ ނިޒާމް އެކަށީގެންވާ ގޮތެއްގައި ކުރިއަށް ނުގެންދެވުމެވެ.
ފަރުވާ ދިނުމުގައި ދިމާވާ ގޮންޖެހުންތަކާ ގުޅިގެން އެންޑީއޭގެ ލީގަލް އޮފިސަރު އަހުމަދު ހިލްމީ "އަދަދު" އަށް ވިދާޅުވީ މަސްތުވާތަކެތީގެ ކަންކަމުގައި ގުޅިގެން މަސައްކަތްކުރަންޖެހޭ ދައުލަތުގެ ކަމާބެހޭ އިދާރާތަކުގެ މެދުގައި ހަރުދަނާ ނިޒާމެއް ނެތް ކަމަށެވެ.
އެންޑީއޭއިން ނަގަންޖެހޭ ސްޓޭންޑް ނުވަތަ ޑިސިޝަން ނަގަނީ ދައުލަތުގެ ކޮންމެވެސް އެހެން އިދާރާތަކުން. -- ހިލްމީ
އޭގެ ތަފްސީލް ދެއްވަމުން އޭނާ ވިދާޅުވީ އައްޑޫ ސިޓީގައި ހުރި 80 މީހުންގެ ޖާގައިގެ ރިހެބިލިޓޭޝަން ސެންޓަރެއް އެންޑީއޭގެ ބަހެއް ނެތި ބަންދުކޮށްފައިވާ ކަމަށެވެ. ހދ. ހަނިމާދޫގައި މިހާރު ގާއިމްކޮށްފައި ހުރި މަސްތުވާތަކެއްޗަށް ފަރުވާދޭ މަރުކަޒަކީ އެ އަތޮޅު ކުޅުދުއްފުށީގައި އެޅުމަށް އެންޑީއޭން ބޭނުންވި ތަނެއް ކަމަށާއި އެކަން ބަދަލު ކުރީ އެ އެޖެންސީއަށް ނާންގާ ކަމަށް ވެސް އޭނާ ވިދާޅުވި އެވެ.
"ހަނިމާދުއަކީ އެކަށީގެންވާ ސިއްހީ ނިޒާމެއް ވެސް ނެތް ރަށަކަށްވުމުން އިމަޖެންސީ ހާލަތުގައި ވެސް އަތޮޅުގެ ވެރިކަންކުރާ ރަށަށް ބަރޯސާވާން ޖެހިފައިވީއިރު، އެންޑީއޭގެ މަސައްކަތްތަކުގެ ތެރެއަށް ކަމާ ނުބެހޭ އިދާރާތަކުން އަތް ބޭނުމުގެ ސަބަބުން ނުވަތަ އެ ފަރާތްތަކުގެ ނުފޫޒުގެ ސަބަބުން އެންޑީއޭގެ މަސައްކަތްތަކަށް ހުރަސް އެޅިފައިވޭ،" ހިލްމީ ވިދާޅުވި އެވެ.
އޭނާ ވިދާޅުވީ މަސްތުވާތަކެތީގެ ކަންކަމާ ގުޅިގެން ގައުމީ ފެންވަރުގައި ކުރަންޖެހޭ ކަންތައްތަކާއި ނިންމަންޖެހޭ ނިންމުންތައް ނިންމުމުގައި އެންޑީއޭގެ ފަންނީ މުވައްޒަފުންނަށް ބައިވެރިވުމުގެ ފުރުސަތު ނުލިބޭ ކަމަށެވެ.
އެންޑީއޭ އިސްލާހު ކުރުމުގެ ނަމުގައި ހަރަކާތްތަކެއް ވަނީ ފަށައިފަ އެވެ. އެގޮތުން އެންޑީއޭ އިސްލާހު ކުރަން ގޮވާލައި 1،000 އަށް ވުރެ ގިނަ މީހުން ސޮއިކޮށް މަޖިލީހަށް ވަނީ ޕެޓިޝަނެއް ހުށަހަޅައިފަ އެވެ. ތަޖުރިބާކާރުން ވިދާޅުވާ ގޮތުގައި އެންޑީއޭގެ އުސޫލުތަކަށް ބަދަލުތަކެއް އަންނަން ޖެހެ އެވެ.
