ކުރިމިނަލް ކޯޓުގެ ގާޒީ ހަސަން ސައީދުގެ ސުލޫކީ އިތުރު މައްސަލައެއް ތަހުގީގު ކުރަން ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމައިފި އެވެ.
ގާޒީ ހަސަންގެ އާ މައްސަލައެއްގެ ގޮތުގައި ބަލަމުން ދަނީ އޭނާ ފެމިލީ ކޯޓުގެ އިސް ގާޒީގެ މަގާމުގައި ހުރެ ކޯޓުގެ ފަރާތުން މުވައްޒަފުން ރާއްޖެއިން ބޭރަށް ފޮނުވައިގެން ކައިވެންޏެއް ކޮށްދިން މައްސަލައެކެވެ.
އެ މައްސަލަ ޖޭއެސްސީއިން ނިންމީ އެ ކޮމިޝަނުން މިދިޔަ މަހުގެ 17 ވަނަ ދުވަހު ބޭއްވި ޖަލްސާގަ އެވެ. އެކަމަށް ތަހުގީގު ކޮމިޓީ ވެސް މިހާރު ވަނީ އެކުލަވާލާފަ އެވެ.
ގާޒީ ހަސަން، ފެމެލީ ކޯޓުން ކުރިމިނަލް ކޯޓަށް ބަދަލު ކުރީ ވެސް ސުލޫކީ މައްސަލައެއްގައި އެޅި ފިޔަވަޅެއްގެ ގޮތުންނެވެ.
ޖޭއެސްސީއިން ގާޒީ ހަސަންއާ ގުޅޭ ސުލޫކީ މައްސަލައެއް އޭރު ބެލީ އެ ކޯޓުގެ މުވައްޒަފުންތަކެއް ހުށަހެޅި ޝަކުވާތަކަކާ ގުޅިގެންނެވެ. އެގޮތުން، މުވައްޒަފުންނަށް އޭނާގެ ފަރާތުން އެކި ކަހަލަ ފުރައްސާތަކާ ކުރިމަތިލާން ޖެހުނުކަން މުވައްޒަފުން ބުންޏެވެ.
އެ މައްސަލާގެ ތަހުގީގު ޖޭއެސްސީއިން ކުރިއަށް ގެންދިޔައީ ހުޅުވާލައިގެންނެވެ. މުވައްޒަފުންގެ އެ ތުހުމަތުތަކާއެކު ގާޒީ ހަސަން ވަނީ ކީރިތި ވެސް ކުރައްވާފަ އެވެ.
އެ މައްސަލަ ސާބިތުވެ، ފިޔަވަޅެއްގެ ގޮތުން އޭނާގެ ކުރިމިނަލް ކޯޓުގެ ގާޒީއެއް ކަމަށް ބަދަލު ކުރި ނަމަވެސް، އެ މަގާމުގެ މުސާރަ ކުރިން ހުރި މަގާމަށްވުރެ ބޮޑުކަމުން ޖޭއެސްސީއަށް ފާޑުކިޔުން އަމާޒުވި އެވެ.
ގާޒީ ހަސަން، އޭގެ ކުރިން ވެސް ވަރަށް ގިނަ ދުވަސްތަކެއް ވަންދެން ސަސްޕެންޝަންގައި ވެސް ހުންނެވި އެވެ.
މިފަހުން ގާޒީ ހަސަންގެ ވާހަކަ ފެންމަތިވެގެން އައީ، މުވައްޒަފުންތަކަކަށް ޖިންސީ ގޯނާ ކުރިކަމުގެ ހަތް ދައުވާއެއް އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓު ދޫކުރަން ނެރުނު އަމުރާ ގުޅިގެންނެވެ.
އެ މައްސަލައާ ގުޅިގެން ވެސް ޖޭއެސްސީއިން ދަނީ ގާޒީ ހަސަންގެ ސުލޫކީ މައްސަލައެއް ބަލަމުންނެވެ.
