ކޮވިޑް ފެތުރުން ކޮންޓްރޯލް ކުރުމަށް އިންޑިއާގައި ހިންގާ ވެކްސިން ޕްރޮގްރާމުގެ ތިންވަނަ މަރުހަލާގެ ދަށުން އުމުރުން 45 އަހަރުން މަތީގެ އެންމެންނަށް ވެކްސިން ދޭން ފަށައިފި އެވެ.
މިހާތަނަށް 60 މިލިއަން ޑޯޒް ދީފައިވާއިރު، އޭގެ ތެރޭގައި ގިނައިން ހިމެނެނީ ފްރަންޓްލައިނުގައި މަސައްކަތް ކުރާ މީހުންނާއި އުމުރުން 60 އަހަރުން މަތީގެ މީހުންނެވެ.
އިންޑިއާގައި މިހާތަނަށް ކޮވިޑާ ދެކޮޅަށް ދެ ވެކްސިނެއް ބޭނުން ކުރުމުގެ ހުއްދަ ވަނީ ދީފަ އެވެ. އެއީ އެސްޓްރަޒެނެކާ އާއި އޮކްސްފޯޑް ޔުނިވާސިޓީ ގުޅިގެން އުފެއްދި ކޮވިޝީލްޑާއި އިންޑިއާގެ ކުންފުނި ބާރަތު ބަޔޯޓެކުން އުފެއްދި ކޯވެކްސިނެވެ.
ކޮވިޑާ ދެކޮޅަށް ވެކްސިން ދިނުމުގެ އެންމެ ބޮޑު ޕްރޮގްރާމް އިންޑިއާގައި ހިންގަމުން ދާއިރު، އެ ގައުމުގެ އަމާޒަކީ ޖުލައި މަހުގެ ކުރިން 250 މިލިއަން މީހުންނަށް ވެކްސިން ދީ ނިންމާލުމެވެ.
ތަޖުރިބާކާރުން ބުނާ ގޮތުގައި އެ އަމާޒަށް ވާސިލްވުމަށް ދުވެލި އަވަސް ކުރަން ޖެހެ އެވެ. ކޭސްތައް ކުއްލިއަކަށް އިތުރުވެފައިވާ ނަމަވެސް ވެކްސިން ޕްރޮގްރާމުގެ ތިންވަނަ މަރުހަލާ ފެށީ އެހެންވެ އެވެ.
މި އަހަރު ފެށުމާއެކު އިންޑިއާއިން ކޮވިޑާ ދެކޮޅަށް ވެކްސިން ދޭން ފެށި އެވެ. އޭރު އެ ގައުމުގައި ކޭސްތައް ވަރަށް ބޮޑަށް ދަށެވެ. އެގޮތުން ދުވާލެއްގެ މައްޗަށް ޕޮޒިޓިވްވަމުން ދިޔެއީ އެންމެ 15،000 މީހުންނެވެ.
އެކަމަކު މާޗް މަސް ތެރޭގައި ކުއްލިއަކަށް ކޭސްތައް އިތުރުވެފައި ވަނީ ޓެސްޓު ކުރުމާއި ކޮންޓެކްޓް ޓްރޭސިންގައި ފަރުވާ ކުޑަކޮށް، ރައްކާތެރިކަމުގެ ފިޔަވަޅުތަކަށް އަމަލު ކުރުން މަޑުޖެހުމުންނެވެ.
އިއްޔެ އެކަނިވެސް 72،019 މީހުން ކޮވިޑަށް ޕޮޒިޓިވްވެފައި ވާއިރު، 457 މީހަކު މި ބަލީގައި މަރުވި އެވެ. މިއީ މިދިޔަ ޑިސެމްބަރު މަހަށް ފަހު އަދަދުތައް މިހާ މައްޗަށް ދިޔަ ފުރަތަމަ ފަހަރެވެ.
އަދަދުތައް ދަށް ކުރުމުގެ ބޭނުމުގައި އިންޑިއާއިން މިހާރު ވަނީ އެ ގައުމުގެ ސީރަމް އިންސްޓިޓިއުޓުގައި އުފައްދާ ކޮވިޝީލްޑް ވެކްސިން އެކްސްޕޯޓް ކުރުން ވަގުތީ ގޮތުން މެދުކަނޑާލަން ވެސް ނިންމާފަ އެވެ.
އެ ގައުމުގެ ފޮރިން މިނިސްޓްރީގެ އޮފިޝަލުންނާ ހަވާލަދީ ބީބީސީގައިވާ ގޮތުން އެގޮތަށް ނިންމަން ޖެހުނީ ކޭސްތައް ކުއްލިއަކަށް އިތުރުވުމުން ވެކްސިނަށް އޮތް ޑިމާންޑު ވެސް އިތުރުވާނެ ކަމަށް ބެލެވޭތީ އެވެ.
އެ ނިންމުމުގެ ސަބަބުން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)ގެ ކޯވެކްސް ސްކީމުގައި ހިމެނޭ 190 އަށް ވުރެ ގިނަ ގައުމަށް ނޭދެވޭ އަސަރު ކުރާނެ އެވެ. އިންޑިއާއިން މިހާތަނަށް ވަނީ 76 ގައުމަށް ވެކްސިނުގެ 60 މިލިއަން ޑޯޒް އެކްސްޕޯޓުކޮށްފަ އެވެ.
ވެކްސިނުގެ އެކްސްޕޯޓް ވަގުތީ ގޮތުން މެދުކަނޑާލަން އިންޑިއާއިން ނިންމި ނަމަވެސް، އެ ގައުމުން ދާދި ފަހުން ވަނީ ދިވެހި ސަރުކާރުން ގަނެފައިވާ ކޮވިޝީލްޑުގެ 100،000 ޑޯޒް ރާއްޖެއަށް ފޯރުކޮށްދީފަ އެވެ.
ކޮވިޑުގެ ބަލިމަޑުކަން ދުނިޔެއަށް ފެތުރެން ފެށި ފަހުން މިހާތަނަށް އިންޑިއާއިން 11.7 މިލިއަން މީހުން ޕޮޒިޓިވްވެފައިވެ އެވެ. އަދި އޭގެ ތެރެއިން 160،000 މީހުން ވަނީ މި ބަލީގައި މަރުވެފަ އެވެ. ދުނިޔޭގައި ކޮވިޑުގެ ހާލަތު ތިންވަނައަށް އެންމެ ގޯސްކޮށް އޮތް ގައުމަކީ އިންޑިއާ އެވެ.
