ރައީސް އިބްރާހިމް މުހައްމަދު ސޯލިހު ބަންގްލަދޭޝްއަށް ކުރެއްވި ރަސްމީ ފުރަތަމަ ދަތުރުފުޅުގައި ދެ ގައުމުގެ ދެމެދު ހަތަރު އެއްބަސްވުމެއްގައި ސޮއިކުރައްވައިފި އެވެ.
ބަންގްލަދޭޝްގެ މިނިވަންކަމުގެ ބާނީ ބަންގަބަންދު ޝެއިހް މުޖީބުއްރަހްމާންގެ 100 ވަނަ އުފަން ދުވަސް ފާހަގަކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވަން ކުރެއްވި ދަތުރުފުޅުގައި, އެ ގައުމާއި ރާއްޖެއާ ދެމެދު އޮތް ގުޅުމުގެ މައްޗަށް ވާހަކަފުޅު ދެއްކެވި އެވެ.
ރައީސް ވިދާޅުވީ މުޖީބުއްރަހްމާންއަކީ މުޅި ދެކުނު އޭޝިއާ ސަރަހައްދުގެ ތާރީހުގައިވެސް ފާހަގަކޮށްލެވޭ ލާމަސީލު ލީޑަރެއް ކަމަށެވެ. އެ މަނިކުފާނުގެ ހިދުމަތުން ލިބިދޭ ފިލާވަޅުތަކަކީ އެތައް ޖީލަކަށް އިބުރަތް ހާސިލްކުރެވޭނެ މުހިންމު ފިލާވަޅުތަކެއް ކަމަށް ވިދާޅުވި އެވެ.
ދަތުރުފުޅުގެ ރަސްމީ ހަރަކާތްތަކުގެ ތެރެއިން, ބަންގްލަދޭޝްގެ ބޮޑުވަޒީރު ޝައިހް ހަސީނާއާ ވެސް ރައީސް ބައްދަލުކުރެއްވި އެވެ. އެ ބައްދަލުވުމުގައި، ދެ ގައުމުގެ މެދުގައި އޮތް ޒަމާންވީ ގުޅުންތައް ވަރުގަދަކޮށް ރައްޔިތުންގެ މެދުގައި އޮތް ތާރީހީ އަދި ސަގާފީ ގުޅުންތައް އިތުރަށް ބަދަހިކުރުމާ ގުޅޭގޮތުން ވެސް މަޝްވަރާ ކުރެއްވި އެވެ.
އެއްބަސްވުންތަކުގައި ރައީސް ސޮއިކުރެއްވީ ރަސްމީ ވާހަކަތަކަށް ފަހު އެވެ. ޒަމާންވީ ގާތް ގުޅުން އިތުރަށް ބަދަހިކުރުމަށާއި ދެ ގައުމުގެ ދެމެދު ހަރުދަނާ އުސޫލެއްގެ މަތީން މަޝްވަރާތައް ކުރުމަށްޓަކައި އެއްބަސްވުމެއްގައި ސޮއިކުރި އެވެ. ދެން ސޮއި ކުރީ އެކިއެކި ދާއިރާތަކުން އިތުރަށް ގުޅުން ބަދަހިކުރުމަށްޓަކައި ޖޮއިންޓް ކޮމިޝަނެއް އެކުލަވާލުމުގެ އެއްބަސްވުމުގަ އެވެ.
ތިން ވަނަ އެއްބަސްވުމަކީ، މަސްވެރިކަމުގެ ދާއިރާއިން ގުޅުން ބަދަހިކުރުމަށާއި އެ ކަމާގުޅޭ މަޝްވަރާތަކަށް މަގުފަހިކުރުމުގެ އެއްބަސްވުމެވެ. ފަހު އެއްބަސްވުމެއްގެ ގޮތުން ސޮއިކުރީ ދިވެހި ސަރުކާރާއި ބަންގްލަދޭޝްގެ ރައްޔިތުންނާއި ގުޅުން ގާއިމުކުރުމަށްޓަކައި ދެ ގައުމުގެ އާދަކާދަ އާއި ސަގާފަތް ދަސްކުރުމަށާއި އެކަމަށް އަހުލުވެރިވުމުގެ އެއްބަސްވުމެކެވެ.
ދަތުރުފުޅުގައި ރައީސް ސޯލިހު ވަނީ ނޭޝަނަލް މާޓިއަޒް މެމޯރިއަލް އަދި ބަންގަބަންދު މެމޯރިއަލް މިއުޒިއަމަށާއި ބަންގްލަދޭޝް ރައީސްގެ ޕެލަސްއަށް ޒިޔާރަތް ކުރައްވައިފަ އެވެ. ރައީސްއާ އެކު ދަތުރުފުޅުގައި ބައިވެރިވެވަޑައިގެންނެވި އެމަނިކުފާނުގެ އަނބިކަނބަލުން ފަޒުނާ އަހުމަދު ވަނީ ބަންގްލަދޭޝްގެ ރައީސްގެ އަނބިކަނބަލުން ރާޝިދާ ހާމިދުއާ ބައްދަލު ކުރައްވައިފަ އެވެ.
ރައީސް ސޯލިހު ބަންގްލަދޭޝްއަށް ވަޑައިގަތީ ރާއްޖެ އާއި ގަތަރާ ދެމެދު އަލުން ސިޔާސީ ގުޅުން ގާއިމް ކުރުން ފާހަގަކުރެއްވުމަށްޓަކަ އެވެ.
