އިހަވަންދިއްޕޮޅުގައި ބައިނަލްއަގުވާމީ ކޮންޓެއިނަ ޓްރާންޝިޕްްމެންޓް ބަނދަރެއް ތަރައްގީ ކުރުމަށް ޝައުގުވެރިކަން ހުރި ބަޔަކު ހޯދަން އިކޮނޮމިކް މިނިސްޓްރީން ހުޅުވާލައިފި އެވެ.
ޕަބްލިކް ޕްރައިވެޓް ޕާޓްނާޝިޕްގެ އުސޫލުން ތަރައްގީކުރަން ހަމަޖެހިފައިވާ މި މަޝްރޫއު ޕްލޭންކޮށްފައި ވަނީ ދުނިޔޭގެ އެންމެ ބޮޑެތި ކޮންޓެެއިނަ ބޯޓު ފަހަރަށް ހިދުމަތް ދިނުމުގެ ގާބިލްކަން ލިބިފައިވާ، ޒަމާނީ ބަނދަރެއްގެ ގޮތުގަ އެވެ.
އިކޮނޮމިކް މިނިސްޓްރީން ނެރުނު ނޫސްބަޔާނެއްގައި ބުނީ މި މަޝްރޫއުގެ ފުރަތަމަ ފިޔަވަހީގައި 900 މީޓަރުގެ މަގަތު ފާލަމެއް ގާއިމްކުރާނެ ކަމަށެވެ. އަދި އަހަރަކު 1.8 މިލިއަން ކޮންޓެއިނަރު އުފުލުމުގެ ގާބިލްކަން މި ބަނދަރާ އެކު ލިބޭނެ ކަމަށެވެ.
އިހަވަންދިއްޕޮޅަކީ ދުނިޔޭގެ އިރުމަތީ ބިތުން ފެށިގެން ހުޅަނގަށް ބޯޓުފަހަރު ދަތުރުކުރާ މައިގަނޑު ޝިޕިން ރޫޓްތަކާ ކައިރި ސަރަހައްދަކަށް ވުމުން، މިއީ މި ކަމަށް އެންމެ އެކަށީގެންވާ ސަރަހައްދު ކަމަށް ކުރެވުން ދިރާސާތަކުން ދައްކާ ކަމަށް މިނިސްޓްރީން ބުންޏެވެ.
މިނިސްޓްރީން ބުނިގޮތުގައި މި މަޝްރޫއު ފުރިހަމަވެއްޖެ ނަމަ އިގްތިސާދު ފުޅާވެ, ޑައިވަސިފައިކުރަން މަގުފަހިވާނެ އެވެ. އަދި އިގްތިސާދީ ތަރައްގީ ލާމަރުކަޒު ކުރުމުގެ ސިޔާސަތުގެ ދަށުން ރާއްޖޭގެ އުތުރުގައި އިގްތިސާދީ ހަބެއް ގާއިމުކުރެވިގެންދާނެ ކަމަށް ވެސް ބަޔާނުގައިވެ އެވެ.
އިކޮނޮމިކް މިނިސްޓްރީން ލަފާކޮށްފައިވާ ގޮތުގައި މި މަޝްރޫއަށް 466 މިލިއަން ޑޮލަރު ހޭދަވާނެ އެވެ.
މި ބަނދަރު ތަރައްގީކުރުމަކީ މި ސަރުކާރުގެ އިގްތިސާދީ މަސައްކަތްތަކުގެ ތެރޭގައި ހިމެނޭ މުހިއްމު ވައުދެކެވެ. އިހަވަންދިއްޕޮޅުގައި ބަނދަރު ތަރައްގީކުރުމުގެ ވިސްނުން ކުރީގެ ސަރުކާރުގައި ވެސް ގެންގުޅެނެވެ. އެކަމަކު އޭރު ހެދި ޕްލޭންތައް ތަންފީޒު ނުވެ ވަކި ހިސާބަކުން ހުއްޓުނީ އެވެ.
