ބައްޕަގެ މުދަލަކީ ދަރިފުޅުގެ މުދާތަ؟ ނޫން މި ތިބީ ކޯޓުގައި!

ދޯންޏެއްގެ ދެބަސްވުމުގައި ދެބަފައިން ވަނީ ސުޕްރީމް ކޯޓާ ހަމައަށް ގޮސްފައި: މިއީ ޝައުގުވެރި ޝަރީއަތެއް - ކުރެހުން: އަހުމަދު އިހްސާން / އަދަދު

ދޯންޏެއްގެ ދެބަސްވުމުގައި ދެބަފައިން ވަނީ ސުޕްރީމް ކޯޓާ ހަމައަށް ގޮސްފައި: މިއީ ޝައުގުވެރި ޝަރީއަތެއް - ކުރެހުން: އަހުމަދު އިހްސާން / އަދަދު

ބުނެ އުޅެ އެވެ؛ ބައްޕައެއްގެ މުދަލަކީ ހަމަ ދަރިންގެ މުދަލެވެ! އެކަމަކު، މިއީ ހަމަ ބުނެލުމެކެވެ. މުދަލުގެ ޒުވާބުގައި ދަރީންނާއި ބައްޕައިން ވެސް ހަތުރުންނަށްވެ ދެ އެވެ.

ސުޕްރީމް ކޯޓާ ހަމައަށް މިހާރު ގޮަސްފައި އޮތް މި މައްސަލައަކީ ދެބަފައިންގެ ދެމެދުގައި ކުރިއަށްދާ ޝަރީއަތެކެވެ. އާއިލީ މައްސަލައެއް ނޫނެވެ. އާއިލީ މައްސަލަގަނޑެއްގެ ތެރެއިން އުފެދިފައިވާ މަދަނީ ދެބަސްވުމެކެވެ.

ދޯނި ދޭން ސޮއި ކުރުމާއި ކޯޓަށް ދިޔަ ގޮތް

މި މައްސަލައެއް އުފެދިގެން އައީ ހުސެއިން، އޭނާގެ ދަރިފުޅު އަހުމަދަށް "ކޯމަސް" ނަމަކަށް ކިޔާ ދޯންޏެއް ވިއްކުމަށް އެއްބަސްވުމެއް ހެދި ހިސާބުންނެވެ. "ކޯމަސް" ވިއްކުމަށް އެ ދެބަފައިންގެ ދެމެދު އެއްބަސްވުމެއް ހަދާފައިވީ ނަމަވެސް އެއާ އެއްގޮތަށް އަހުމަދާ ދޯނި ހަވާލުކޮށްފައެއް ނުވެ އެވެ.

އެހެންވެ، އޭނާގެ ހައްގެއް ބައްޕަ ހިފަހައްޓާފައިވާ ކަމަށް ބުނެ ރަށު ކޯޓަށް އަހުމަދު މައްސަލަ ހުށަހެޅި އެވެ. އެއާއެކު، ދެބަފައިންގެ ޝަރީއަތް ދަށު ކޯޓުގައި ފެށީ އެވެ.

ދޯނި ހަވާލު ނުކުރުމުގެ ހުއްޖަތެއްގެ ގޮތުގައި ހުސެއިން ކޯޓުގައި ފާހަގަކުރީ އެ އެއްބަސްވުމަކީ އޭނާގެ ދަރިފުޅު، އޭނާއަށް ބިރު ދައްކައި މަޖުބޫރުކޮށްގެން ހެދި އެއްބަސްވުމެއް ކަމެވެ. އޭނާއަކީ އޭރު ބަލި މީހެއް ކަމެވެ. ކުއްލި ގޮތަކަށް ހުސެއިން ބަލި އެނދަށް ވައްޓާލީ ސްޓްރޯކެކެވެ. އެކަމެއް ދިމާވީ ދޯނި މަރާމާތަށް އެހެލާފައި ހުއްޓަ އެވެ.

ނުހަނު ވޭން އުފުލަން ޖެހެފައިވާ ހުސެއިން، ސްޓްރޯކަށް ފަރުވާ ހޯދުމަށް ރާއްޖެ އާއި ރާއްޖެއިން ބޭރުގައި ދުވަސްތައް ހޭދަކުރީ ލޯބިވާ ދަރިފުޅު، އަހުމަދުގެ ބެލުމުގެ ދަށުންނެވެ. ބައްޕަގެ އެ ހާލުގައި އެއީ އަހުމަދުގެ މައްޗަށް ވާޖިބެއް އަދި ޒިންމާއެއް ވެސްމެ އެވެ. އެއީ، އޭނާ ކޮށްދޭ ހެޔޮކަމެއް ނޫނެވެ. އެކަމަކު، އޭގެ ބަދަލު ދޭން ހުސެއިނަށް ޖެހުނެވެ.

ރާއްޖެއިން ބޭރުން ހުސެއިން ފަރުވާ ހޯދުމަށްފަހު ދުވަސްތަކެއް ވަންދެން މާލޭގައި، އަހުމަދު ކުއްޔަށް ހިފާފައިވާ އެޕާޓްމަންޓެއްގައި މަޑުކުރި އެވެ. ދެބަސްވުން އުފެދިފައި މިއޮތް އެއްބަސްވުމުގައި ދެބަފައިން ސޮއިކުރީ އެ އެޕާޓްމެންޓްގައި އުޅުނު ދުވަސްވަރެވެ.

ކޯޓުގެ ނިންމުން

ދެބަސްވުން އުފެދިފައިވާ އެއްބަސްވުމާއެކު، ދަށު ކޯޓުގައި ހުސެއިން ބުނަމުން ދިޔައީ ސްޓްރޯކް ޖެހި، އަހުމަދުގެ ބެލުމުގެ ދަށަށް ހުސެއިން ދިޔުން މަޖުބޫރުވެފައިވަނިކޮށް ހެދި އެއްބަސްވުމުގެ ފަހަތުގައި ވަނީ ބިރާއި ނުފޫޒު ކަމަށެވެ. އެކަމަކު، އޭނާގެ އެ ވާހަކައަށާއި އޭނާގެ ބަލި ހާލަތަށް ބާރުދޭނެ ކަރުދާސްގަނޑެއް ކޯޓަށް ހުށަހެޅޭ ކަމަކަށް ނުވި އެވެ.

ދަށު ކޯޓުން ހިފީ އެ ނުކުތާގަ އެވެ.

"މަޖުބޫރުކޮށް ބިރު ދެއްކި ކަމާއި ހުސެއިންއަކީ އޭރު ބަލި މީހެއްކަން އެނގޭނެ އެއްވެސް ކިތާބީ ހެއްކެއް ނެތް، އެހެންވެ، އެކަން ސާބިތެއް ނުވޭ،" ދަށު ކޯޓުގެ ނިންމުމަކީ މިއީ އެވެ.

"އެއްބަސްވުމުގައި ހިމެނޭ ދެ ހެކިން ވެސް ހުސެއިން އެ އެއްބަސްވުމުގައި ސޮއިކުރީ ރުހި ގަބޫލުންކަން ބަޔާންކޮށްފައިވޭ،"

އެހެންކަމުން ދަށު ކޯޓުން ބުނި ގޮތުގައި، އެއްބަސްވުމެއްގައި ފުރިހަމަވާން ޖެހޭ އަސާސީ ޝަރުތުތައް މި ހާލަތުގައި ހަމަވެ އެވެ. އެ ކޯޓުން އެންގީ 24 ގަޑިއިރު ތެރޭގައި އަހުމަދަށް ދޯނި ހަވާލުކުރުމަށެވެ. ނުކޮށްފިނަމަ، އެ ހުކުމް ތަންފީޒު ކުރުމަށް ފުލުހުންނަށް ވެސް އެ ހުކުމުގައި އަންގާފައިވެ އެވެ.

ދަށު ކޯޓުން ދަރިފުޅާ އެއްކޮށް ނިންމި ނިންމުން ހުސެއިންނަށް ކަމަކު ނުދިޔަ އެވެ. އޭނާގެ މިސްރާބު ޖެހީ ހައިކޯޓަށެވެ.

ހާއްސަ ގުޅުމެއް، އެކަކަށް މަންފާވާނަމަ އެއީ ނުފޫޒު!

ހުސެއިން ގެނައި މި މައްސަލަ، ހައިކޯޓުގައި ބެއްލެވި ފަނޑިޔާރުން ނެރުއްވި ހުކުމުގައި ޝައުގުވެރި ކަންތައްތަކެއް ފާހަގަކުރި އެވެ.

ހައިކޯޓުން ބުނި ގޮތުގައި، ނުރަނގަޅު ނުފޫޒެއް ހިންގާފައިވާ ކަމަށް ބެލެވޭނެ ތަފާތު އެކި ހާލަތްތައް ކުރިމަތިވެދާނެ އެވެ. އެއްބަސްވުމެއް ވެވޭ ދެފަރާތުގެ ދެމެދުގައި ހާއްސަ ގުޅުމެއް އޮތުމަކީ މީގެ ތެރެއިން އެއް ހާލަތެވެ. މިފަދަ ހާއްސަ ގުޅުމެއް އޮންނަ ދެ މީހެއްގެ ދެމެދުގައި އެކަކަށް މަންފާއެއް ލިބޭގޮތެއް އެއްބަސްވުމެއްވެވޭ ނަމަ، ހުކުމުގައި ބުނި ގޮތުން ނުރަނގަޅު ނުފޫޒެއް އޮތުމުގެ ފުރުސަތު އޮތް ކަމަށް ބަލަންޖެހެ އެވެ. އެގޮތުން މިފަދަ ކޮންމެ މައްސަލައެއްގައި ބަލަންޖެހޭނީ އެ މައްސަލައެއްގެ ވަށައިގެންވާ ހަގީގަތްތަކުގެ މައްޗަށް ކަމަށް ހައިކޯޓުގެ ހުކުމްގައިވެ އެވެ.

"ނުރަނގަޅު ނުފޫޒު ފޯރުވޭފަދަ މަގާމެއްގައި ހުރި މީހާއަށް އެކަން ނަފީ ކުރެވޭފަދަ ހެއްކެއް ހުށަނޭޅިއްޖެނަމަ ބަލަންޖެހޭނީ މުއާމަލާތު ކޮށްފައިވަނީ އޭނާގެ ފަރާތުން ނުރަނގަޅު ނުފޫޒެއް ފޯރުވައިގެން ކަމަށް،"

ހުކުމުގައި ލިޔެފައިވާ ގޮތުގައި، މި މައްސަލާގައި އެއްބަސްވުން ހެދީ ހުސެއިން ސްޓްރޯކަށް ފަރުވާ ހޯދަމުންދިޔައިރުކަން އެނގެން އޮތް ކަމާއި އެއީ ބައްޕައަށް ދަރިފުޅު ނުފޫޒު ފޯރުވޭނެ ހާލަތެއް ކަމެވެ.

"ހުސެއިންގެ ބޭސްފަރުވާގެ ކަންތައްތައް ބަލަހައްޓާ ބޭސްފަރުވާއަށް ހަރަދުކުރުމާއި މާލޭގައި ހުރުމަށްޓަކައި އެޕާޓްމަންޓް ކުއްޔަށް ހިފާފައިވަނީވެސް އަހުމަދުކަން އެނގޭއިރު، އޭނާ ހުރީ އޭނާގެ ބައްޕަ ހުސައިންއަށް ނުފޫޒު ފޯރުވޭފަދަ މަގާމެއްގައިކަން އެނގޭ،" ހައިކޯޓުގައި ހުކުމްގައިވެ އެވެ.

އަދި، އެއްބަސްވުން އެކުލަވާލައި، ފައިސާގެ މުއާމަލާތްތައް ކުރަން އެއްބަސްވުމުގައި ލިޔެފައިވާ ގޮތުން ހުސެއިންއަށް މާލީ އެއްވެސް މަންފާއެއް ލިބެން ނެތްކަން ވެސް އެނގެން އޮންނަ ކަމަށް ހުކުމްގައިވެ އެވެ. އެހެންވެ، ހައިކޯޓުގެ ފަނޑިޔާރުންނަށް ގަބޫލު ކުރެވުނީ މި އެއްބަސްވުމަކީ ބައްޕައަށް ދަރިފުޅު ނުފޫޒު ފޯރުވައިގެން ވެފައިވާ އެއްބަސްވުމެއް ކަމެވެ.

ހައިކޯޓުން ވަނީ "ކޯމަސް" ދޯނި އަހުމަދާ ހަވާލުކުރުމަށް ދަށު ކޯޓުން ކުރި ހުކުމް ބާތިލްކޮށްފަ އެވެ. ހައިކޯޓުގެ އެ ނިންމުމާމެދު، ހިތްހަމަ ނުޖެހި، ދަރިފުޅު މިހާރު ވަނީ ސުޕްރީމް ކޯޓަށް ގޮސްފަ އެވެ. އެއްވެސް ކޮޅަކުން ދޫދިނުމެއް ނެތެވެ. ބައްޕަގެ މުދާ ދަރިފުޅުގެ މުދަލަށް ނުވެ، ދަރިފުޅު ވެސް ބައްޕަގެ އަތުން މުދާ އަތުލުމަށް ދުވަނީ އެވެ.

މިކަމުގައި ސުޕްރީމް ކޯޓުން ޝައުގުވެރި ހުކުމެއް ނެރޭނެ ކަމަށް އިންތިޒާރު ކުރެވެ އެވެ.

[މި ލިޔުމުގައި ބޭނުންކޮށްފައި މި ވަނީ މައްސަލާގައި ހިމެނޭ މީހުންގެ އަސްލު ނަމެއް ނޫނެވެ.]

ކޮމެންޓް

ފަހުގެ ޚަބަރު

ލޯ ޑިގްރީ އިމްތިހާނަށް މާލެ އަންނާކަށް ނުޖެހޭނެ: ބާ ކައުންސިލް

ލޯ ޑިގްރީގެ އިމްތިހާނުތައް ހެދުމަށް މާލެއަށް ނުވަތަ ވަކި ހާއްސަ ރަށަކަށް ހާޒިރުވުން ލާޒިމު ނޫން ކަމަށާއި، ދަރިވަރުން ދިރިއުޅޭ ރަށެއްގެ ސްކޫލް ނުވަތަ ކައުންސިލް މެދުވެރިކޮށް އިމްތިހާނު ހެދޭނެ މަގު ބާ ކައުންސިލުން ފަހިކޮށްދީފިއެވެ. އަންނަ އަހަރުން ފެށިގެން އަމަލުކުރާ މި އުސޫލުގެ ދަށުން އިމްތިހާނު ހަދާ ގޮތަށް ބަދަލު އައި ނަމަވެސް، ކޯހުގެ މަންހަޖާއި ކިޔަވައިދޭ މުއްދަތަށް އެއްވެސް ބަދަލެއް ނާންނާނެއެވެ.

ތަރައްގީގެ އެއްވެސް ކަމެއް ކުރުމަށް ލާރިއެއް ނެތް: ޝާކިރު

އަންނަ އަހަރުގެ ބަޖެޓުގައި ރިކަރަންޓް ހަރަދަށް ކެނޑުމަށްފަހު ތަރައްގީގެ މަޝްރޫއުތަކަށް ފައިސާ ނެތް ކަމަށް ވިދާޅުވެ މެންބަރު އަހުމަދު ޝާކިރު ކަންބޮޑުވުން ފާޅުކުރައްވައިފިއެވެ. އޭނާ ވިދާޅުވީ ދައުލަތުގެ އާމްދަނީގެ ބޮޑުބައެއް ހަރަދުވަނީ ރިކަރަންޓް ކަންކަމަށް ކަމަށާއި، މަޝްރޫއުތައް ހިންގަން ޖެހެނީ އިތުރަށް ދަރަނި ނަގައިގެން ކަމަށެވެ. މީގެ އިތުރުން ސަރުކާރު ކުންފުނިތަކުން ބޮޑެތި ގެއްލުންވަމުންދާ ދިއުމަށްވެސް އޭނާ ވަނީ ފާޑުވިދާޅުވެފައެވެ.

"ސިޓިޒަންސް ކޮމްޕްލެއިންޓްސް" ލައުންޖުތަކެއް ގާއިމުކޮށްފި

ރައްޔިތުންގެ ޝަކުވާތަކާއި ކަންބޮޑުވުންތައް ސަރުކާރަށް ހުށަހެޅުމަށްޓަކައި މާލެ އާއި ހުޅުމާލޭގައި "ސިޓިޒަންސް ކޮމްޕްލެއިންޓްސް" ބިއުރޯގެ ދެ ލައުންޖެއް މިއަދު ވަނީ ހުޅުވައިފައެވެ. ސަރުކާރު ބަންދު ނޫން ކޮންމެ ދުވަހަކު ޚިދުމަތް ދޭ މި އޮފީސްތަކަކީ ރައީސުލްޖުމްހޫރިއްޔާގެ އޮފީހުގެ ދަށުން ހިންގާ، ރައްޔިތުންގެ މައްސަލަތަކަށް ހައްލު ހޯދައިދިނުމަށް ގާއިމުކުރި ތަންތަނެވެ.

ރިއަލް އެސްޓޭޓު ބިލު މަޖިލީހަށް ބަލައިގަނެފި

މި ބިލު ބަލައިގަންނަން ވޯޓު ދިނީ 42 މެންބަރުން. ބިލާ ދެކޮޅަށް ވޯޓު ދެއްވީ އެމްޑީޕީގެ 13 މެންބަރުން. މި ބިލު ދިރާސާކުރާނީ ގައުމީ ތަރައްގީ އާއި ތަރިކައިގެ ކޮމިޓީން. މިއީ ގާނޫނުއަސާސީގެ ހިމާޔަތްތައް ނައްތާލައި، ތާއަބަދަށް ނުވަތަ ހުސްނުވާ ގޮތަށް ބޭރު މީހުންނަށް ބިން މިލްކުކުރެވޭނެ ގޮތް ހެދުމަށް އިންތިޒާމުތަކެއް ހިމަނާފައިވާ ބިލެއް

ބޮޑެތި ޖޫރިމަނާތަކެއް ހިމަނާފައިވާ އަބުރުގެ ބިލު ކޮމިޓީއަށް

ސޯޝަލް މީޑިއާގައި މީހެއްގެ އަބުރާ ބެހޭ ފަދަ ޕޯސްޓެއް ހިއްސާކޮށްފިނަމަ 5 ލައްކަ ރުފިޔާއާ ހަމައަށް ޖޫރިމަނާ ކުރެވޭ ގޮތަށް ހުށަހެޅި އަބުރުގެ ބިލު މަޖިލީހަށް ބަލައިގަނެ ކޮމިޓީއަށް ފޮނުވައިފިއެވެ. މި ބިލުގައި ބަހާއި، ފޮޓޯއާއި، އިޝާރާތް އަދި ފިލްމު ފަދަ ވަސީލަތްތައް މެދުވެރިކޮށް އަބުރާ ބެހުމުގެ ދައުވާ ކުރެވޭނެ ގޮތްތައް ބަޔާންކޮށްފައިވެއެވެ.

މަރުގެ އަދަބު ތަންފީޒު ކުރާ ބިލު ބަލައިގެންފި

ދަންޖައްސައިގެން މަރުގެ އަދަބު ތަންފީޒުކުރާ ގޮތަށް ސަރުކާރުން ހުށަހެޅި ބިލު ރައްޔިތުންގެ މަޖިލީހަށް މިއަދު ބަލައިގެންފިއެވެ. މި ބިލުގައި މަރުގެ އަދަބު ތަންފީޒުކުރާނެ ގޮތާއި، އެކަން ހިންގާނެ ޕެނަލެއް އެކުލަވާލުމުގެ އިތުރުން، ބަލިވެއިނުމާއި ދަރިފުޅަށް ދެ އަހަރު ފުރުން ފަދަ އަދަބު ތަންފީޒުނުކުރެވޭނެ ހާލަތްތައް ބަޔާންކޮށްފައިވެއެވެ.

ތިން ކުންފުންޏެއްގެ މަނީ އެކްސްޗޭންޖު ލައިސަންސް ބާތިލްކޮށްފި

މަނީ ޗޭންޖިން ގަވާއިދާ ތަކުރާރުކޮށް ހިލާފުވި ތިން ކުންފުންޏެއްގެ ލައިސަންސް އެމްއެމްއޭ އިން ބާތިލުކޮށް، އެ ކުންފުނިތައް ބޮޑެތި އަދަދުތަކުން ޖޫރިމަނާކޮށްފިއެވެ. މި ފިޔަވަޅަކީ ބޭރު ފައިސާގެ ބާޒާރު ކޮންޓްރޯލްކޮށް، ގަވާއިދާ ހިލާފު މުއާމަލާތްތައް ހުއްޓުވުމަށް އެމްއެމްއޭ އިން ކުރަމުންދާ މަސައްކަތުގެ ތެރެއިން އެޅި ފިޔަވަޅެކެވެ.

Newsletter

Get the latest news delivered straight to your inbox