ކުޅުނު ހުރިހާ މެޗަކުން މޮޅުވެ، ކްލަބް ވެމްކޯ އިން ގައުމީ ވޮލީބޯޅަ ލީގުގެ އަންހެން ޑިވިޝަންގެ ޗެމްޕއަންކަން ހޯދައިފި އެވެ.
ވެމްކޯ އަށް މިދިޔަ އަހަރު ގެއްލުނީ ގައުމީ ލީގެވެ. އެ ޓީމުން އެސޯސިއޭޝަން ކަޕާއި ގައުމީ މުބާރާތް ކާމިޔާބުކުރި އެވެ. މި ފަހަރުގެ ގައުމީ ލީގުގައި ފަސް ޓީމެއް ވާދަކުރިއިރު، ވެމްކޯ މޮޅުވީ ކުޅުނު ހަތަރު މެޗުން ވެސް މޮޅުވެ، 12 ޕޮއިންޓް ހޯދައިގެންނެވެ.
ލީގުގެ ދެ ވަނައިގައި ނިންމި ކްލަބް އެމްޓީސީސީ އަށް ނުވަ ޕޮއިންޓް ލިބުނުއިރު، އެ ޓީމު ބަލިވީ ވެމްކޯ އަތުން އެކަންޏެވެ. ތިން ވަނަ ހޯދި ޕޮލިސް ކްލަބަށް ވަނީ ހަ ޕޮއިންޓް ލިބިފަ އެވެ. ހަތަރެއްގައި ނިންމި ހުރާ ކޮމިއުނިޓީ ކްލަބަށް ތިން ޕޮއިންޓް ލިބުނުއިރު، ފުލަށް ދިޔަ ސިޓީ ފްރެންޑްސް ކްލަބަށް ހަތަރު މެޗުން ބަލިވުމުން، ޕޮއިންޓެއް ނުލިބެ އެވެ.
ވެމްކޯ އިން ލީގުގައި ކުޅުނު ފަހު މެޗުގައި މިއަދު ހަވީރު ނުކުތީ ޕޮލިހާ ދެކޮޅަށެވެ. މިދިޔަ އަހަރުގެ ލީގު ޗެމްޕިއަން ޕޮލިސް އަތުން ވެމްކޯ ވަނީ 3-1 ސެޓުން މޮޅުވެފަ އެވެ. މެޗުގެ ފުރަތަމަ ސެޓު، 22-25 އިން ޕޮލިހުން ގެންދިޔަ ނަމަވެސް ދެން ކުޅުނު ތިން ސެޓު ކާމިޔާބުކޮށް ވެމްކޯ މޮޅުވީ އެވެ. އެ ގޮތުން، ވެމްކޯ އިން މި ސެޓުތައް ގެންދިޔައީ، 25-19، 25-22 އަދި 25-16 އިންނެވެ.
މުބާރާތުގައި ވެމްކޯ އިން ކުރިން ކުޅުނު ތިން މެޗުގެ ނަތީޖާ އަށް ބަލާއިރު، އެމްޓީސީސީ އަތުން ވެސް މޮޅުވީ 3-1 ސެޓުންނެވެ. އެ މެޗުގެ ސެޓުތައް ދިޔައީ 25-17، 23-25، 25-16 އަދި 25-16 އިންނެވެ. ހުރާ ކޮމިއުނިޓީ ކްލަބް އަތުން ވެސް ވެމްކޯ 3-1 ސެޓުން މޮޅުވި އެވެ. އެ މެޗުގެ ސެޓުތައް ދިޔައީ، 18-25، 25-22، 10-25 އަދި 22-25 އިންނެވެ. ވެމްކޯ އިން ފުރަތަމަ މެޗުގައި ސިޓީ ފްރެެންޑްސް ކްލަބް އަތުން މޮޅުވީ ސީދާ ތިން ސެޓުންނެވެ. އެ މެޗުގެ ސެޓުތައް ގެންދިޔައީ، 25-18، 25-21 އަދި 25-16 އިންނެވެ.
މިއީ، ވެމްކޯ އިން ލީގު ކާމިޔާބުކުރި ދެ ވަނަ ފަހަރެވެ. ބޮޑު މެދުކެނޑުމަކަށް ފަހު، 2017 ވަނަ އަހަރުގެ ފަހުން، 2024 ވަނަ އަހަރު ލީގު ބޭއްވިއިރު ޗެމްޕިއަންކަން ހޯދީ ވެމްކޯ އިންނެވެ.
މި ފަހަރުގެ މުބާރާތުގެ ވަނަތަކަށް ބަލާއިރު، އެންމެ މޮޅު ކުޅުންތެރިއަކީ ވެމްކޯގެ ސެޓަރު، ފާތިމަތު ޖޫޒާން ޒަރީރު އެވެ. އެންމެ މޮޅު ބިދޭސީ ކުޅުންތެރިއަކީ ވެމްކޯގެ ވަރާންޏާ ސްރިލައޫންގް އެވެ. އެންމެ މޮޅު ކޯޗަކީ ވެމްކޯގެ އަހުަމަދު އަދީލް (ބޭބެ) އެވެ. އަދި، އެންމެ މޮޅު 21 އަަހަރުން ދަށުގެ ކުޅުންތެރިއަކީ، އެމްޓީސީސީގެ ފާތިމަތު އަމާނީ އަހުމަދު ޝިޔާމް އެވެ.
މުބާރާތުގެ ޑްރީމް ޓީމުގައި ހިމެނެނީ، ޕޮލިހުގެ ހައްވާ ރާޝިދާ (ހައްވަ)، އައިމިނަތު ޝަހާ ޝާމިން، ވެމްކޯގެ ޖޫޒާން، ނަރީމާ އިދުރީސް (ނަންނި)، މައިހާ އަލީ އަދި އެމްޓީސީސީގެ މާޔާ ހުސެއިން ސޮލާހު އަދި އައިމިނަތު ރިޔާޝާ އެވެ.
