މެލޭޝިއާގައި ރޭ ހިނގި އެކްސިޑެންޓެއްގައި މަރުވި ސ. ހިތަދޫ، އާމިނާ އިމީލީ ނާޒިމް، 21، ގެ ފޮޓޯ ދައުރުނުކުރަން އާއިލާއިން އެދިފައި ވަނިކޮށް، އެ ޒުވާނާގެ ފޮޓޯއަކާއެކު ރައީސް މުހައްމަދު މުއިއްޒު އެކްސްގައި ކުރެއްވި ޕޯސްޓު ޑިލީޓް ކުރައްވައިފި އެވެ.
އެކްސްގައި މުއިއްޒު ކުރެއްވި ޕޯސްޓުގައި ވަނީ އިމީލީ ނިޔާވުމުގެ ހިތާމައިގައި އޭނާގެ އާއިލާއަށް ތައުޒިޔާ ވިދާޅުވެފަ އެެވެ. އެމަނިކުފާނު ވަނީ ފޭސްބުކްގައި ކުރެއްވި ޕޯސްޓު ބޭންދުމަށްފަހު ފޮޓޯ ޑިލީޓް ކުރައްވާފަ އެވެ.
އެ ޒުވާނާގެ ފޮޓޯއަކާއެކު މުއިއްޒު ޕޯސްޓެއް ކުރައްވާފައިވާއިރު، އާއިލާއަށް ލިބިފައިވާ ހިތްދަތިކަމަށް އިހުތިރާމު ކުރުމުގެ ގޮތުން އެ ޒުވާނާގެ ފޮޓޯ ދައުރު ނުކުރަން އޭނާގެ އާއިލާއިން ވަނީ ރޭގެ ވަގުތެއްގައި އެދިފަ އެވެ.
"އާއިލާއަށް ލިބިފައިވާ ހިތްދަތިކަމަށް އިހުތިރާމު ކުރުމުގެ ގޮތުން އަޅުގަނޑުމެންގެ ކޮއްކޮގެ ފޮޓޯ މީޑިއާގެ އެއްވެސް މަންސައެއްގައި ޝެއާ ނުކުރުމަކީ އާއިލާގެ ވަރަށް ބޮޑު އެދުމެއް،" އިމީލީގެ ބޮޑުދައިތަ ފޭސްބުކްގައި ކުރި ޕޯސްޓެއްގައި ރޭގައި ބުނެފައިވެ އެވެ.
އެ އެކްސިޑެންޓު ހިނގާފައި ވަނީ ދެ ކާރު ޖެހިގެންނެވެ. މަރުވީ ޒުވާނާއަކީ އެ ތަނުން އެއް ކާރުގެ ތެރޭގައި އިން ފަސިންޖަރެކެވެ. އެނގިފައިވާ ގޮތުގައި އެ ޒުވާނާ ހޮސްޕިޓަލަށް ގެންދިޔަ އިރު ވެސް މަރުވެފައިވާ ކަމަށް ހޮސްޕިޓަލުން ބުނެފައިވެ އެވެ.
މި ނޫހަށް ލިބިފައިވާ މި ހާދިސާގެ ފޮޓޯތަކުން ފެންނަ ގޮތުގައި އެކްސިޑެންޓުވީ އެއް ކާރު އޮތީ ފުރޮޅާލާފަ އެވެ. އަނެއް ކާރަށް ވެސް ބޮޑެތި ގެއްލުންތަކެއް ލިބިފައި ހުއްޓެވެ. މަރުވި އަންހެން ޒުވާނާ އިން ކާރުގެ ޑްރައިވަރާއި ދެން އިން ފަސިންޖަރަށް މާ ބޮޑު އަނިޔާއެއް ނުވާ ކަމަށް ވެ އެވެ.
