ރަސްމާލެ މަޝްރޫއުއާ ދެކޮޅަށް އިއުލާނުކޮށްފައިވާ "ދިވެހީންގެ ބިން ދިވެހީންނަށް" ހަރަކާތަށް މާލެ ސިޓީ ކައުންސިލުގެ ފުރިހަމަ އެއްބާރުލުން ލިބޭނެ ކަމަށް އެ ހަރަކާތް ލީޑުކުރައްވަމުން ގެންދަވާ ކުރީގެ ހޯމް މިނިސްޓަރު އިމްރާން އަބްދުالله ވިދާޅުވެއްޖެ އެވެ.
އެ ހަރަކާތުގެ ފަރާތުން ވަނީ މިއަދު ސިޓީ ކައުންސިލަށް ޒިޔާރަތްކޮށް ސިޓީ ކައުންސިލާ ބައްދަލުކޮށްފަ އެވެ. އެ ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އިމްރާން ވިދާޅުވި ގޮތުގައި ރަސްމާލެއަކީ މާލޭގެ ދިރިއުޅޭ ރައްޔިތުންގެ ބޯހިޔާވަހިކަން ހައްލުކުރުމަށް ހިންގާ މަޝްރޫއުއަކަށް ވުމާއެކު އެ ހަރަކާތުން އެންމެ ފުރަތަމަ ބައްދަލުކުރަން ޖެހެނީ އެ ކައުންސިލާ އެވެ.
"ރަސްމާލެއަކީ މާލޭގެ ރަށްވެހިންނަށް ވަރަށް ފުޅާ ދާއިރާއެއްގައި ބޯހިޔާވަހިކަން ހިންގުމަށްޓަކައި ފެށި މަޝްރޫއުއެއް ކަމަށް ވިދާޅުވީ. އެހެންވީމާ މިކަމުގައި، އެކަމުގެ ކަންބޮޑުވުމާއެކު އަޅުގަނޑުމެން ފަށާ ކޮންމެ ކަމެއްގައި އެންމެ ފުރަތަމަ ބައްދަލުކޮށް ވާހަކަ ދައްކަން ޖެހޭނީ އެއް ފަރާތަކީ މާލެ ސިޓީ ކައުންސިލް،" އިމްރާން ވިދާޅުވި އެވެ.
ސިޓީ ކައުންސިލް އޮތީ ދިވެހި ރައްޔިތުންގެ ރޫހާއި ވިންދާ އެއްގޮތަށް ކަމަށާއި މި ހަރަކާތަށް އެއްބާރުލުން ދޭނެކަމުގެ ފުރިހަމަ ޔަގީންކަން ދީފައިވާ ކަމަށް އިމްރާން ވިދާޅުވި އެވެ.
ރަސްމާލެ މަޝްރޫއުގެ ދަށުން ހިއްކާ ބިން ބޭރުގެ ކުންފުންޏަކަށް ދިނުމާ ދެކޮޅަށް ދިވެހިންގެ ބިން ދިވެހިންނަށް ނަމުގައި ގައުމީ ހަރަކާތެއް ރަސްމީކޮށް އިއުލާނުކުރީ މިދިޔަ ހޯމަ ދުވަހު އެވެ.
އެ ހަރަކާތުގައި އިމްރާންގެ އިތުރުން، އިދިކޮޅު އެމްޑީޕީގެ ބައެއް މަޖިލިސް މެންބަރުންނާއި އެ ޕާޓީގެ ގައުމީ މަޖިލީހުގެ މެންބަރުންގެ އިތުރުން، އިދިކޮޅު ޕީއެންއެފްގެ ލީޑަޝިޕުގައި ހިމެނިވަޑައިގަންނަވާ ބޭފުޅުން ބައިވެރިވެ އެވެ.
ރަސްމާލެ ދޫކޮށްލަނީ 99 އަހަރަށް ކަމަށް ސަރުކާރުން ބުނެ އެވެ. އެއީ ގާނޫނުތައް ހުއްދަ ކުރާ ކަމަކަށް ނުވާތީ ސަރުކާރުން އުޅެނީ އެ ޕްރޮޖެކްޓަށް ފަހިކުރަން ގާނޫނުތަކެއް ހަދާށެވެ. އަދި ނޮވެމްބަރު 11، ގައި އެގްރިމެންޓުގައި ދާއިމީ އެގްރިމެންޓުގައި ސޮއި ކުރެވޭތޯ މިހާރު ދަނީ މަސައްކަތް ކުރަމުންނެވެ.
ސަރުކާރުން ބުނަނީ ރަސްމާލެއަށް އީގަލް ހިލްސް އިން 20 ބިލިއަން ޑޮލަރު އިންވެސްޓު ކުރާނެ ކަމަށެވެ. އެކަމަކު އީގަލް ހިލްސް އިން ބުނަނީ އެ ކުންފުނިން އިންވެސްޓު ކުރާނީ 12 ބިލިއަން ޑޮލަރު ކަމަށެވެ. އަލައްބާރު ފަހުން ވިދާޅުވީ 20 ބިލިއަން ޑޮލަރަކީ އެތަނުގެ މަސައްކަތް ނިމުމުން ތަނުގެ އަގު ހުންނާނެ މިންވަރު ކަމަށެވެ.
