ރައީސް މުހައްމަދު މުއިއްޒަކީ އަމިއްލަ ނަފުސަށް އިތުބާރު ނެތް، ދެ މޫނުގެ ވެރިއެއް ކަމަށް ކުރީގެ ރައީސް އަބްދުﷲ ޔާމީން ބުރާސްފަތި ދުވަހު ވިދާޅުވެއްޖެ އެވެ.
ޕީޕަލްސް ނެޝަނަލް ފްރަންޓުން ރޭ ބޭއްވި ޖަލްސާއެއްގައި ވާހަކަ ދައްކަވަމުން ޔާމީން ވިދާޅުވީ، ދޮގުނުހަދާކަން ނުވަތަ ތިމަންމަނިކުފާނަކީ މުނާފިގެއް ނޫންކަން ސާބިތުކޮށްދެއްވަން މުއިއްޒު މަސައްކަތް ކުރައްވާ ކަމަށެވެ.
"މިއީކީ ދިވެހިރާއްޖޭގައި އަލަކަށް ރައީސްކަން ކުރައްވާ ލީޑަރެއް ނޫން. އެތައް ރައީސުންނެއް ހިނގައްޖެ މީނަގެ ކުރިން ވެސް އެނގޭތޯ. މި ނޫނިއްޔާ އަޅުގަނޑެއް އަޑެއް ނާހަން އެނގޭތޯ ރައީސަކު އަރާ ތިމަންނަ މިއީކީ މުނާފިގެއް ނޫނޭ، ތިމަންނަ މިއީކީ އަމިއްލައަށް މި ބުނަނީ ތިމަންނަ މިއީކީ ދޮގު ހަދާ މީހެއް ނޫނޭ، ތިމަންނަ ވައުދެއް ވެއްޖެއްޔާ ވައުދެއް ފުއްދާނަމޭ މި ނޫން މީހަކު ނުބުނޭ،" ޔާމީން ވިދާޅުވި އެވެ.
އެފަދަ ކަންކަން ސާބިތުކޮށްދޭން މުއިއްޒު އުޅުއްވަނީ އެމަނިކުފާނުގެ އިންސެކިއުރިޓީސްގެ ސަބަބުން ނުވަތަ އަމިއްލަ ނަފުސަށް އިތުބާރު ނެތުމުގެ ސަބަބުން ކަމަށް ޔާމީން ވިދާޅުވި އެވެ.
"އެއިން އެ ފެންނަނީ އޭނަގެ އިންސެކިއުރިޓީ. ނޫނީ އޭނަގެ ސެކަންޑް ފޭސް. ނޫނީ ޑަބަލްފޭސްޑްނަސް. ދެ މޫނުގެ އަހުލުވެރިޔެއްކަން އެނގޭތޯ. އެހެންނޫނިއްޔާ ރައީސުލްޖުމްހޫރިއްޔާއަކު ގައުމާ މުހާތަބުކޮށް ދައްކާ ވާހަކައެއް ނޫނޭ. ރައްޔިތުންނެއް އިންތިޒާރެއް ނުކުރޭ ފަހަރުގައި ވެސް ރައީސުލްޖުމްހޫރިއްޔާއަކަށް އަންނަ މީހަކު ރައްޔިތުންނަށް ދޮގު ހަދާފާނެ ކަމަށް. އަނެއްކާ ދޮގު މަތީ ދެމިހުންނަފާނެ ކަމަކަށް. ރައްޔިތުންނަށް ކެހި ދީފާނެ ކަމަކަށް. ރައްޔިތުންގެ މަސްލަހަތު ގެއްލޭ ކަންކަން ކޮށްފާނެ ކަމަކަށް އެނގޭތޯ،" އެމަނިކުފާނު ވިދާޅުވި އެވެ.
ރައީސް މުއިއްޒަކީ ދެއްކުންތެރި ބޭފުޅެއް ކަމަށް ވެސް ރޭ ޔާމީން ވިދާޅުވި އެވެ.
"މިއީ ރައީސުލްޖުމްހޫރިއްޔާގެ މަގާމުގެ އަހުލިއްޔަތު ގެއްލޭ ކަންކަން ހައްތަހާވެސް މި ހުންނަނީ. އެކަމަކު މި ނޫން ރައީސަކު އަމިއްލައަކަށް އަރާ ޕަބްލިކްގައި ނުބުނެއޭ ތިމަންނައެއް ދޮގެއް ނަހަދާނެއޭ. ތިމަންނައަކީ މުނާފިގެއް ނޫނޭ. އެހެންވީމަ މިއުޅެނީ މީނަގެ މައްސަލަތަކެއް ދެއްތޯ. ދެއްކުންތެރިކަމުގެ ގޮތުން ނަމަވެސް މިއުޅެނީ އެނގޭތޯ. މިހާރު އެ ނުކުންނަނީ މީނަ ހިތުގައި އެތެރޭގައި އޮތް އެއްޗެއް އެނގޭތޯ ﷲ އެ މިންވަރުކުރައްވަނީ ރައްޔިތުންނަށް އެނގެން. އެހެން ނޫނިއްޔާ މިކަހަލަ ވާހަކައެއް ނުދައްކާނެ. އެއީ އެނގޭތޯ އަޅުގަނޑުމެންނަށް އެބަ ފެނޭ މީނަ އާއި މީނަގެ އާރުކާޓީ،" ޔާމީން ވިދާޅުވި އެވެ.
ޔާމީން އާއި ސަރުކާރާ ދެމެދު މި ދުވަސްވަރު ވަރަށް ހޫނު ބަހުގެ ހަމަލާތަކެއް ދަނީ ބަދަލު ކުރަމުންނެވެ. ވެރިކަން ކުރާ ޕާޓީ ޕީޕަލްސް ނެޝަނަލް ކޮންގްރެސް އިން މި މަހު ބޭއްވި ޖަލްސާއެއްގައި ޔާމީންއާ ދިމާލަށް ވަރަށް ހުތުރުކޮށް ވަނީ އެއްޗެހި ކިޔައިފަ އެވެ.
އެ ޖަލްސާ ސިފަ ކުރައްވަމުން ރާއްޖޭގެ އެންމެ ފުރަތަމަ އަންހެން މިނިސްޓަރު ރާޝީދާ ޔޫސުފް ވިދާޅީ އެ ދުވަހު ޕޯޑިއަމަށް އެރި ޕީއެންސީ މެންބަރުން ރައީސް ޔާމީންއާ މުހާތަބު ކުރައްވާ ވާހަކަ ދެއްކީ "އެންމެ ހުތުރު ބަހުން" އަދި "އެންމެ ދަށު ދަރަޖައިގެ އިބާރާތުން" ކަމަށެވެ.
"2026 އައިއިރު [ޕީއެންސީގެ] މުޅިން ރާގު ބަދަލުވެއްޖެ. ބަހުރު އަދި އެއަށް ވުރެ ހުތުރުވެއްޖެ. މި ދައްކަނީ ގައުމެއްގެ އިސް ސަފުގައި ތިއްބެވި ބޭފުޅުންގެ ވާހަކަ. ދިވެހި ބަހުން މުހާތަބު ކުރެވޭނެ އެންމެ ހުތުރު ބަހުން، އެންމެ ދަށު ދަރަޖައިގެ އިބާރާތުން ރައީސް ޔާމީންއަށް މަލާމާތް ކުރާ އަޑު ގަދަވެއްޖެ. މަޖިލިސް މެންބަރުން ވެސް ހަމަ އެފަދަ،" ފޭސްބުކްގައި ރާޝިދާ ވިދާޅުވެފައިވެ އެވެ.
އޭގެ ފަހުން ޔާމީންއަށް ދައުލަތުން ކުރާ ރިޝްވަތު ގަބޫލު ކުރުމާއި މަނީ ލޯންޑަރިންގެ ދައުވާގެ ޝަރީއަތަށް ހާޒިރުވާން އެމަނިކުފާނަށް ވަނީ ޗިޓެއް ފޮނުވައިފަ އެވެ. އެ މައްސަލައިގެ އަޑުއެހުން އޮންނާނީ އަންނަ އަންގާރަ ދުވަހެވެ.
ޔާމީންއަށް އެ ދެ ދައުވާ ކުރަނީ އެމަނިކުފާނުގެ ވެރިކަމުގައި ވ. އާރަށް ވިއްކާލުމުގެ މުއާމަލާތް ހިންގުމަށްޓަކައި އެއް މިލިއަން ޑޮލަރުގެ ރިޝްވަތެއް ނެންގެވި ކަމަށް ބުނެ އެވެ. ދައުލަތުން ބުނަނީ ޔާމީން އެ ފައިސާ އިންވެސްޓްމަންޓް އެކައުންޓަކަށްލުމަށްފަހު ލޯންޑާ ކުރީ ކަމަށެވެ.
