މަހުގެ 29 ވަނަ ދުވަހު މާލޭގައި ބޭއްވުމަށް ހަމަޖެހިފައިވާ އިންޓަނޭޝަނަލް ބޮޑިބޯޑިން ކޯޕަރޭޝަން (އައިބީސީ)ގެ ބޯޑީބޯޑިން ވޯލްޑް ޓުއާގެ އެއް ލެގު، "ވިޒިޓް މޯލްޑިވްސް ޕްރޯ 2022" އަކީ ރާއްޖޭގެ އެއް ވަނަ ބޮޑީބޯޑަރު ކުޑަ އައްޔަގެ ކެރިއަރުގެ އެންމެ ބޮޑު މުބާރާތް ކަމަށް ބުނެފި އެވެ.
ދުނިޔޭގެ ޗެމްޕިއަން ބޮޑީބޯޑަރުން ވާދަކުރާ މި މުބާރާތުގައި އެކި ގައުމުތަކުން 150 އެއްހާ އެތުލީޓުން ވާދަކުރާނެ އެވެ. ހަތަރު ކެޓަގަރީއަކުން ބައިވެރިވާ ވާދަކުރާ މި އިވެންޓަކީ ވޯލްޑް ޓުއާގެ ލެގެއް އޭޝިއާ ސަރަހައްދުގައި ބާއްވާ ފުރަތަމަ ފަހަރެވެ. އަދި މިއީ ޓުއާގައި ހިމެނޭ މުބާރާތްތަކުގެ ތެރެއިން ދެ ވަނަ އަށް އެންމެ ފައިސާގެ އިނާމްވެސް ބޮޑު މުބާރާތެވެ. މިގޮތުން އިނާމް ފައިސާގެ ގޮތުގައި 70،000 ޑޮލަރު ހަތަރު ކެޓަގަރީ އަކަށް ބަހާލެވޭނެ އެވެ.
މާލޭ ރާޅުގަނޑު ސަހަރަައްދުގައި ބާއްވާ މި މުބާރާތުގެ ޓަރަޔަލްސް ދާދި ފަހުން ނިންމާލިއިރު، މެންސް އޯޕަން ކެޓަގަރީ އާއި ޑްރޮޕްނީ ކެޓަރަގީ ކާމިޔާބުކުރީ ކުޑަ އައްޔަ އެވެ. އެހެންވެ، ކުޑަ އައްޔަ އަށް ވަނީ މޯލްޑިވްސް ޕްރޯގައި ވާދަކުރުމުގެ ފުރުސަތު ލިބިފަ އެވެ.
ކުޑަ އައްޔަ އޭނާގެ ރަސްމީ ސޯޝަލް މީޑިއާ އެކައުންޓްތަކުގައި ލިޔެފައިވަނީ މޯލްޑިވްސްޕްރޯގެ ޓްރަޔަލްސްގައި ޑްރޮޕްނީ އާއި އޯޕަން ކެޓަގަރީގެ އެއް ވަނަ ލިބުމަކީ ވަރަށް ބޮޑު ޝަރަފެއްގެ ގޮތުގައި ދެކޭ ކަމަށެވެ.
"މިހާރު ދެން މިއޮތީ އަހަރެންގެ ކެރިއަރުގެ އެންމެ ބޮޑު މުބާރާތް، މޯލްޑިވްސް ޕްރޯ،" ރާއްޖޭގެ އެއް ވަނަ ބޮޑީބޯޑަރު، ކުޑަ އައްޔަ ލިޔެފައިވެ އެވެ.
ކުޑަ އައްޔަ ވަނީ އޭނާގެ އާއިލާ އާއި ރަހުމަތްތެރިން ދޭ އެއްބާރުލުން ފާހަގަކޮށް ޝުކުރު އަދާކޮށްފަ އެވެ. އަދި މި މަހު 29 އިން އަންނަ މަހު ހަތް ވަނަ ދުވަހަށް ރާޅުގަނޑުގައި ކުރިއަށްދާ މުބާރާތް ބަލަން އައުމަށް ކުޑަ އައްޔަ ވަނީ ސަޕޯޓަރުންނަށް ދައުވަތު ދީފަ އެވެ.
މޯލްޑިވްސްޕްރޯގެ ޓްރަޔަލްސްގެ މެންސް އޯޕަން ޑިވިޝަންގެ ޗެމްޕިއަންކަން ކުޑަ އައްޔަ ހޯދީ ފައިނަލުގައި އަލީ ޖާވިދު (ޖާއްޓެ) ބަލިކުރުމަށް ފަހު އެވެ ފޯރިގަދަކޮށް ދިޔަ ފައިނަލް ހީޓު ކުޑައައްޔަ އަށް ކާމިޔާބުވީ 14.07 ޕޮއިންޓުންނެވެ. ދެ ވަނަ އަށް ދިޔަ ޖާއްޓެ އަށް ސްކޯ ކުރެވުނީ 13.47 ޕޮއިންޓެވެ.
އެމްޓީސީ ބުރުނު ޝިކާރު ބޮޑީބޯޑިން ޗެލެންޖްގެ ތެެރެއިން ކުޑަ އައްޔަ ރާޅާއަޅަނީ.-- ފޮޓޯ: އެމްބީބީއޭ/ހުޕާ
ޖާއްޓެ އާއި ކުޑަ އައްޔަ ވެސް ވަނީ ފައިނަލް ހީޓުގައި ހަތް ރާޅުގައި އަޅައިފަ އެވެ. ހަތް ރާޅުން ސްކޯ ގުނަނީ އެންމެ ރަނގަޅު ދެ ރާޅަށް ކަމަށްވާއިރު، ކުޑައައްޔަ އެޅި ދެ ރާޅުގެ ސްކޯ އަކީ 7.57 އާއި 6.50 އެވެ. އަދި ޖާއްޓެ އެޅި ދެ ރާޅުގެ ސްކޯ އަކީ 7.17 އާއި 6.30 އެވެ.
ޑްރޮޕްނީ ފައިނަލް ހީޓުގައި ކުޑައައްޔަ ވާދަކުރީ ރާއްޖޭގެ ޖޫނިއާ ޗެމްޕިއަން، އަބްދުﷲ ޝިމާލް ޝަމީމްއާ އެވެ. ކުޑައައްޔަ ވަނީ ފައިނަލުގައި 8.84 ޕޮއިންޓް ސްކޯކޮށްފަ އެވެ. ޝިމާލް އަށް ސްކޯ ކުރެވުނީ 3.23 ޕޮއިންޓެވެ.
ބޮޑީބޯޑިން އެސޯސިއޭޝަނުން މައުލޫމާތު ދޭ ގޮތުގައި މި ފަހަރުގެ ވިޒިޓް މޯލްޑިވްސްޕްރޯ އަކީ ދުނިޔޭގެ އެންމެ މަތީ ލެވަލްގެ ބޮޑީބޯޑަރުން ބައިވެރިވާނެ ފޯރިގަދަ މުބާރާތަކަށް ވާނެ ކަމަށެވެ.
