ވިޒިޓް މޯލްޑިވްސް ޕްރޯ ބޮޑީބޯޑިން މުބާރާތް ނިމުމާ އެކު، ސާފިން އާއި ބޮޑީބޯޑިން އެރީނާގެ މަސައްކަތް، މާލޭގެ ވަރުނުލާ ރާޅުގަނޑު ސަރަހައްދުގައި ފެށިގެންދާނެ ކަމަށް ކުޅިވަރާ ބެހޭ ވަޒީރު އަބްދުالله ރާފިއު (ރާއްޕެ) ވިދާޅުވެއްޖެ އެވެ.
އިއްޔެ ހަވީރު ވިޒިޓް މޯލްޑިވްސް ޕްރޯ ބޮޑީބޯޑިން 2024 މުބާރާތުގެ ހުޅުވުމުގެ ރަސްމިއްޔާތު ބޭއްވިއިރު, މި ފަހަރުގެ މުބާރާތުގައި ދުނިޔޭގެ އެކި ކަންކޮޅުތަކުން 84 ބޮޑީބޯޑަރުން ވަނީ ބައިވެރިވެފަ އެވެ. އޭގެ ތެރޭގައި ދުނިޔޭގެ ޗެމްޕިއަނުންވެސް ހިމެނެ އެވެ.
މި ފަހަރުގެ މުބާރާތް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ކުޅިވަރާ ބެހޭ ވަޒީރު، ރާފިއު ވަނީ ބޮޑީބޮޑިން އަދި ސާފިން ކޮމިއުނިޓީ އަށް އުފާވެރި ހަބަރެއްގެ ގޮތުގައި މި މުބާރާތް ނިމުމާ އެކު, ސާފިން އެރީނާގެ މަސައްކަތް ފެށިގެންދާނެ ކަމަށް ވިދާޅުވެފަ އެވެ.
ވިޒިޓް މޯލްޑިވްސް ޕްރޯ ހުޅުވުމުގެ ރަސްމިއްޔާތުގެ ތެރެއިން، މިނިސްޓަރު ރާފިއު (ކ) އާއި އެމްބީބީއޭގެ ރައީސް، ނިޒާމް ވާހަކަ ދައްކަވަނީ.-- ފޮޓޯ: އަތޫފް އާތިފް / އަދަދު
"މި ތަނުގައި ސާފިން އަދި ބޮޑީބޯޑިން އެރީނާ އެއް އެޅުން އެއީ ސަރުކާރުން ވެފައިވާ ވައުދެއް. އަޅުގަނޑުމެން އެ މަސައްކަތް ނުފަށާ, މަޑުކޮށްލައިގެން މިތިބީ މި މުބާރާތް ނިމެންދެން. އިރާދަކުރެއްވިއްޔާ މި މުބާރާތް ނިމުމާއެކު, މި ތަނުގައި (ވަރުނުލާ ރާޅުގަނޑު ސަރަހައްދު) އެ މަސައްކަތް ފެށިގެންދާނެ" ރާފިއު ވިދާޅުވި އެވެ.
މި ފަހަރުގެ މުބާރާތުގައި ގިނަ މޮޅު ބޮޑީބޯޑަރުން ބައިވެރިވާ ކަމީ މި މުބާރާތް އިތުރަށް ފުރިހަމަވެގެންދާ ކަމެއް ކަމަށް މިނިސްޓަރު ވިދާޅުވި އެވެ.
ރާފިއު ވިދާޅުވީ، މި ފަހަރުގެ މުބާރާތް ނިމުމާ އެކު، އެޅުމުގެ މަސައްކަތް ފެށުމަށް ހަމަޖެހިފައިވާ ސާފިން އެރީނާގެ ސަބަބުން ބައިނަލްއަގްވާމީ ގިނަ މުބާރާތްތަކެއް ރާއްޖޭގައި ބޭއްވުމުގެ ފުރުސަތު ލިބިގެންދާނެ ކަމަށެވެ.
ވިޒިޓް މޯލްޑިވްސް ޕްރޯ 2024 ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އެމްބީބީއޭގެ ރައީސް ނިޒާމް --- ފޮޓޯ: އަތޫފް އާތިފް / އަދަދު
ބޮޑީބޯޑިން އެސޯސިއޭޝަނުގެ ރައީސް ހުސެއިން ނިޒާމް ވިދާޅުވީ, ވިޒިޓް މޯލްޑިވްސް ޕްރޯ ކުރިއަށް މި ގެންދެވެނީ އެ އިރެއްގައި އޮންނަ ސަރުކާރެއްގެ ބޮޑު އެއްބާރުލުމަކާއެކުގައި ކަމަށެވެ.
މީގެ އިތުރުން ނިޒާމް ވިދާޅުވީ، ބޮޑީބޯޑިންގައި ރާއްޖެގެ ނަން މުޅި ދުނިޔޭގެ ޗާޓުގައި މިހާރު ވަނީ ފަވާލެވިފައި ކަމަށެވެ. އެއާ އެކު, މި މުބާރާތުގައިވެސް ރާއްޖޭގެ އެތުލީޓުންނަށް ރަން ވަނަ ތަކެއް ލިބޭނެ ކަމަށް އުންމީދުކުރާ ކަމަށް އޭނާ ވިދާޅުވި އެވެ.
މިއީ، ރާއްޖޭގައި މި މުބާރާތް ބޭއްވޭ ތިން ވަނަ ފަހަރެވެ. މީގެ ކުރިން ދެ އަހަރުގައި ރާއްޖޭގެ އެތުލީޓުން ވަނީ މި މުބާރާތުގައި ވާދަކޮށް ބޮޑެތި ކުރިއެރުންތަކެއް ހޯދައިފަ އެވެ.
އެ ގޮތުން، މި މުބާރާތުގައި ރާއްޖޭގެ ބޮޑީބޯޑަރުންގެ ތެެރެއިން، ރާއްޖޭގެ އެއް ވަނަ ބޮޑީބޯޑަރު، އަލީ ހުޝްރުވާން އަހުމަދު (ކުޑަ އައްޔަ) އާއި އިންޓަނޭޝަނަލް ބޮޑީބޯޑިން ކޯޕަރޭޝަން (އައިބީސީ) ވޯލްޑް ޓުއާގެ ޖޫނިއާ ރޭންކިން 10 ވަނައިގައި ވެސް އެއް ފަަަހަރު އޮތް، ރާއްޖޭގެ އާމިން އުމަރު މޫސާ ވަނީ ދުނިޔޭގެ ލެވަލްގެ ސަމާލުކަން ލިބޭ ވަރުގެ ޕާފޯމަންސެއް ދައްކައިފަ އެވެ.
މި ފަހަރުގެ މުބާރާތުގެ ފޯރިގަދަ އިވެންޓްތައް މިއަދު ހެނދުނުން ފެށިގެން ކުރިއަށްދާނެ އެވެ.
