ސަރުކާރުން ވަރުނުލާ ރާޅުގަނޑު ސަރަހައްދުގައި އެޅުމަށް ނިންމާފައިވާ ސާފިން އަދި ބޮޑީބޯޑިން އެރީނާގެ އަމަލީ މަސައްކަތް އޮގަސްޓު މަހު ކުރިއަށްދާ މޯލްޑިވްސް ޕްރޯ މުބާރާތް ނިމުމުން ފަށާނެ ކަމަށް ކުޅިވަރާ ބެހޭ ވަޒީރު އަބްދުالله ރާފިއު (ރާއްޕެ) ވިދާޅުވެއްޖެ އެވެ.
އޮގަސްޓު މަހު ފަށާ ބޮޑީބޯޑިން މުބާރާތުގެ އެންމެ ފަހުގެ މައުލޫމާތު ދެއްވަން މިއަދު ހ. ބޯޅަގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރާފިއު ވިދާޅުވީ, މިދިޔަ އަހަރުތަކުގައި މުބާރާތް ބޭއްވިއިރު, ރާއްޖޭގެ އެކޮމަޑޭޝަންތައް ފުރިހަމަ ކަމަށް ވޯލްޑް ޓުއާ ހިންގާ ފަރާތްތަކުން ވިދާޅުވެފައިވާ ކަމަށެވެ.
އަދި މުބާރާތުގެ އިންތިޒާމުތަކަށް 100 އަކުން 85 ލިބިފައިވުން އެއީ އެކަމުގެ ހެއްކެތް ކަމަށް ވަޒީރު ވިދާޅުވި އެވެ.
ރާފިއު ވިދާޅުވީ، މި އަހަރުގެ މޯލްޑިވްސް ޕްރޯ ނިމުމުން ސަރުކާރުން ރާޅުގަނޑު ސަރަހައްދުގައި އަޅަން ނިންމާފައިވާ ސާފިން އަދި ބޮޑީބޯޑިން އެރީނާގެ އަމަލީ މަސައްކަތް ފަށާނެ ކަމަށެވެ. އަދި މި އެރީނާގައި މެޑިކަލް ފެސިލިޓީ އާއި އިކުއިޕްމަންޓް ރިޕެއާ އާއި މެއިންޓެނެންސް ކުރަން ހާއްސަ ފެސިލިޓީ އެއް ގާއިމު ވެގެންދާނެ ކަމަށެވެ.
"އެރީނާގެ މަސައްކަތް ނިމުމުން އެތުލީޓުންނަށް މެޑިކަލް ފެސިލިޓީ އާއި އިކުއިޕްމަންޓް ރިޕެއާ އަދި މެއިންޓެނެންސް ކުރަން ހާއްސަ ފެސިލިޓީ އެއް ގާއިމު ކުރެވިގެންދާނެ. އަޅުގަނޑަށް ހީވަނީ ރާއްޖެ އަކީ ބޮޑީބޯޑިންގައި ނަމްބަރު 1 އަށް ވެގެންދާނެ ތަނެއް ކަމަށް" ވަޒީރު ވިދާޅުވި އެވެ.
މި ފަހަރުގެ ވިޒިޓް މޯލްޑިވްސް ޕްރޯގައި ރާއްޖޭގެ 15 އެތުލީޓުން ވާދަކުރާނެ އެވެ. އޭގެ ތެރޭގައި ވައިލްޑް ކާޑް އެންޓްރީގެ ދަށުން ރައުންޑް 3 ގައި އެއް އެތުލީޓަކު ވާދަކުރާނެ އެވެ.
އެމްބީބީއޭ އިން ބުނީ މި މުބާރާތައް ތައްޔާރުވުމުގެ ގޮތުން ގައުމީ ޓީމުގެ އެތުލީޓުން އަންނަނީ ކޮންމެ މަހަކު 30 ގަޑިއިރު، ޕްރެކްޓިސް ކުރަމުން ކަމަށެވެ.
