ރާއްޖޭގައި މިހާރު ކުރިއަށްދާ ވިޒިޓް މޯލްޑިވްސް ޕްރޯ 2024 ވަނަ އަހަރުގެ ބޮޑީބޯޑިންގް މުބާރާތުގެ ޖޫނިއާ ކެޓަގަރީގެ ދެ ވަނަ ބުރުން ރާއްޖޭގެ އިޔަން އަހުމަދު ޖާގަ ހޯދައިފި އެވެ.
މި މުބާރާތުގެ ޖޫނިއާ ކެޓަގަރީގެ ރައުންޑްތައް މިއަދު ކުރިއަށްދާއިރު, ރާއްޖެއިން ދެވަނަ ބުރަށް ދަތުރުކުރީ އިޔަން އެކަންޏެވެ.
އިޔަން ދެވަނަ ބުރަށް ދަތުރުކުރީ ރައުންޑް 1، ހީޓް ހައެއްގައި ވާދަކޮށް ހީޓުގެ ދެ ވަނަ ހޯދައިގެންނެވެ. މި ހީޓުގައި އިޔަންއާ އެކު ދެން ވާދަކުރީ ހީޓްގެ އެއް ވަނަ ހޯދި ޕޯޗުގަލްގެ ފެޑްރީކޯ ކާސްޓެލޯ ބްރާންކޯ އާއި, ސްޕެއިންގެ ކެވިން ޕެރޭޒް އެވެ.
ހީޓްގެ އެއް ވަނަ ހޯދި ފެޑްރީކޯ އަށް 11.05 ގެ ސްކޯއެއް ލިބުނުއިރު, ދެ ވަނަ އަށް ދިޔަ އިޔަން އަށް ލިބުނީ 8.05 ގެ ސްކޯ އެކެވެ. އަދި ތިން ވަނަ އަށްދިޔަ ކެވިން އަށް ލިބުނީ 7.45 ގެ ސްކޯ އެކެވެ.
"އަދަދު ސްޕޯޓްސް"އާ ވާހަކަ ދައްކަމުން އިޔަން ބުނީ ހީޓު ކުރިއަށްދިޔައިރު ހެދުނު ބެރަލް ރޯލާ އެކު، ދެ ވަނަ ބުރަށް ދިޔުމުގެ އުންމީދުއާވި ކަމަށެވެ. އަދި މި ފަހަރުގެ މުބާރާތުގައި ޕޯޑިއަމް ފިނިޝް އަކަށް މަސައްކަތް ކުރާނެ ކަމަށް އިޔަން ބުންޏެވެ.
"ޕޯޑިއަމް ފިނިޝެއް ބޭނުންވަނީ، އެއީ ގަދަ ހަތަރެއް،" އިޔަން ބުންޏެވެ.
އިޔަންގެ ހީޓު ބައްލަވާލަން ކުރީގެ ރައީސް އިބްރާހީމް މުހައްމަދު ސޯލިހް އާއި އެމަނިކުފާނުގެ އަނބިކަނބަލުން މެޑަމް, ފަޒްނާ އަހުމަދު ވަޑައިގެންނެވި އެވެ.
ހީޓަށް ފަހު "އަދަދު" ނޫހާ ވާހަކަ ދައްކަވަމުން ރައީސް ސޯލިހް, ވިދާޅުވީ, ރާއްޖޭގެ އެތުލީޓުންނަށް ފުރިހަމަ ކާމިޔާބީ އަށް އެދޭ ކަމަށެވެ. އަދި މޫދު ކުޅިވަރުތައް ކުރިއެރުވުން އެއީ އޭގެ ސަބަބުން ރާއްޖެ އަށް ގިނަ ފައިދާތަކެއް ލިބޭނެ ކަމެއް ކަމަށް އެ މަނިކުފާނު ވިދާޅުވި އެވެ.
މީގެ އިތުރުން ރައީސް ސޯލިހް ވިދާޅުވީ, ބޮޑީބޯޑިން އާއިލާއަށް ފުރުސަތުތައް ހޯދައިދޭން އަދިވެސް އެ މަނިކުފާނު މަސައްކަތް ކުރައްވާނެ ކަމަށާއި, ބޮޑީބޯޑިން އަށް ހެދުނު ޕްލޭންތަކާ އެއްގޮތައް މިހާރުގެ ސަރުކާރުން މަސައްކަތް ކުރައްވާނެ ކަމަށް އުންމީދު ކުރައްވާ ކަމަށެވެ.
