މާލޭ ރާޅުގަނޑު ސަރަހައްދުގައި މިހާރު ކުރިއަށްދާ ވިޒިޓް މޯލްޑިވްސް ޕްރޯ 2024ގެ މެންސް ކެޓަގަރީގެ ދެ ވަނަ ބުރުން ރާއްޖޭގެ އާމިން އުމަރު މޫސާ، ޝާމް ރާފިއު އަދި އަހުމަދު ނަޒްމީން ފުރުސަތު ހޯދައިފި އެވެ.
އެންމެ ފުރަތަމަ ދެ ވަނަ ބުރުގެ ޖާގަ ހޯދީ ނަޒްމީން އެވެ. އޭނާ ވަނީ ހީޓު ހަތަރެއްގައި ވާދަކޮށް ދެ ވަނަ ހޯދައިފަ އެވެ. ހީޓުގެ އެއް ވަނައިގައި ނިންމި، ޕޯޗުގަލްގެ ފްރެޑެރީކޯ ކަސްޓެލޯ ބްރާންކޯ، 11.15 ޕޮއިންޓް ސްކޯކުރިއިރު، ދެ ވަނަ އަށް ދިޔަ ނަޒްމީންގެ ސްކޯ އަކީ 6.4 ޕޮއިންޓެވެ. ދެން، މި ހީޓުގައި ވާދަކުރި، މޮރޮކޯގެ ޒިދާން އަލް ހަކީމީ 6 ޕޮއިންޓް ސްކޯކުރިއިރު، މޮރޮކޯގެ ބްރަކްމީ ތޯރިގުގެ ސްކޯ އަކީ ފަސް ޕޮއިންޓެވެ.
ހީޓު ފަހެއްގައި ވާދަކުރި އާމިން ވަނީ، އެއް ވަނަ ހޯދި ޖޯޖް ހެނާންޑޭޒް ފަހަތުން، 10.9 ޕޮއިންޓް ސްކޯކޮށްފަ އެވެ. ޖޯޖް ހެނާންޑޭޒްގެ ސްކޯ އަކީ، 13.5 ޕޮއިންޓެވެ. ދެން، މި ހީޓުގައި ވާދަކުރި، މޮރޮކޯގެ އަބްދީ މުހައްމަދު އަށް 9.25 ޕޮއިންޓް ލިބުނުއިރު، ރާއްޖޭގެ ދާއޫދު ފަޒީހު ވަނީ 4.6 ޕޮއިންޓް ސްކޯކޮށްފަ އެވެ.
ރާއްޖޭގެ ބޮޑީބޯޑަރު، ޝާމް ވެސް ދެ ވަނަ ބުރަށް ދަތުރުކުރީ ހީޓުގެ ދެ ވަނަ ހޯދައިގެންނެވެ. އެ ގޮތުން، ހީޓު އަށެއްގެ އެއް ވަނަ ހޯދި، މޮރޮކޯގެ ސާމީ ލާބީ އަށް 10.75 ޕޮއިންޓް ލިބުނުއިރު، ދެ ވަނަ ހޯދި ޝާމް އަށް ލިބުނީ، 9.1 ޕޮއިންޓެވެ، ތިން ވަނަ ހޯދި ރާއްޖޭގެ މުހައްމަދު ކައިފް އަށް 7.3 ޕޮއިންޓް ލިބުނުއިރު، މި ހީޓުގެ ފުލަށް ދިޔަ، އާވިން ކްލޮއަރެކް އަށް ލިބުނީ، 6.1 ޕޮއިންޓެވެ.
ރާއްޖޭގެ އެއް ވަނަ ބޮޑީބޯޑަރު، އަލީ ހުޝްރުވާން (ކުޑަ އައްޔަ) ދިޔައީ ވާދަކުރި ހީޓުގެ ތިން ވަނަ އެވެ. އެ ގޮތުން، ކުޑައައްޔަ އަށް ވުރެ ކުރިން ނިންމި، ޖޯލް ރޮޑްރިގޭޒް އަށް 11.25 ޕޮއިންޓް ލިބުނުއިރު، ދެ ވަނަ ހޯދި ވެެނެޒުއޭލާގެ އެޑްވިން އަލްޑާނާ އަށް 9.75 ޕޮއިންޓް ލިބުނުއިރު، ކުޑައައްޔަގެ ސްކޯ އަކީ، 8.15 ޕޮއިންޓެވެ. މި ހީޓުގައި ވާދަކުރި ރާއްޖޭގެ، ނޫހު މުހައްމަދު އިރުޝާދު އަށް ވަނީ 3 ޕޮއިންޓް ލިބިފަ އެވެ.
ރާއްޖޭގެ ބޮޑީބޯޑަރު، އަލީ ޖާވިދު (ޖާއްޓެ) ދިޔައީ، ހީޓު ތިނެއްގައި ވާދަކޮށް، ހަތަރު ވަނަ އެވެ. މި ހީޓުގެ އެއް ވަނަ ހޯދީ، 10.8 ޕޮއިންޓް ސްކޯކުރި، މޮރޮކޯގެ ޔާސީން އަލްގަޒާލް އެވެ. ދެ ވަނަ އަށް ދިޔަ، ސްޕެއިންގެ އީތަން ޕެރޭޒް އަށް 10.75 ޕޮއިންޓް ލިބުނުއިރު، ތިން ވަނަ ހޯދި، އެމެރިކާގެ ޑްރޭކް ކިންގަމް އަށް 9 ޕޮއިންޓް ވަނީ ލިބިފަ އެެވެ. ޖާއްޓެގެ ސްކޯ އަކީ، 8.05 ޕޮއިންޓެވެ.
މިއީ، ވިޒިޓް މޯލްޑިވްސް ޕްރޯ ބާއްވާ ތިން ވަނަ ފަހަރެވެ. މިމަހުގެ ނުވަ ވަނަ ދުވަހުގެ ނިޔަލަށް ކުރިއަށްދާ މި ފަހަރުގެ މުބާރާތުގައި، މުޅި އެއްކޮށް، 14 ގައުމަކުން 86 އެތުލީޓުން ވާދަކުރެ އެވެ.
