ރާއްޖޭގައި އަންނަ ޖުލައި މަހު އިންޓަނޭޝަނަލް ބޮޑީބޯޑިން މުބާރާތެއް ބޭއްވުމުގެ ކަންކަން ކުރެވެމުން އަންނަ ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް 2022 ވަނަ އަހަރުގެ މުބާރާތް ނިމުމުގެ ރަސްމިއްޔާތު ޝަރަފްވެރި ކޮށްދެއްވުމަށް އިއްޔެ ދެއްކެވި ވާހަކަފުޅުގެ ތެރެއިންނެވެ.
"އުފާވެރި ހަބަރަކަށް މި އޮތީ. މިހާރު އަޅުގަނޑުމެންނާ (ސަރުކާރާ) އެސޯސިއޭޝަނާ (އެމްބީބީއޭ)އާ ގުޅިގެން މި އަހަރު އައިބީސީގެ އިންޓަނޭޝަނަލް މުބާރާތެއް ރާއްޖޭގައި ބޭއްވުމަށް މިހާރު ވަނީ އެ މީހުންގެ ކަލަންޑަރަށް ވެސް ލެވިފައި. އިރާދަކުރެއްވިއްޔާ، މި ފަހަރު ރާއްޖޭގައި އެކަން ކުރެވޭނެ،" މިނިސްޓަރު ވިދާޅުވި އެވެ.
އައިބީސީ ވެބްސައިޓްގައިވާ މައުލޫމާތުތަކަށް ބަލާއިރު، މި އަހަރު ޖުލައި 29 އިން އޮގަސްޓް 7 ވަނަ ދުވަހަށް ޝެޑިއުލްކޮށްފައިވާ އައިބީސީ މޯލްޑިވްސް ބޮޑީބޯޑް ޕްރޯ އަކީ 70،000 ޑޮލަރުގެ މުބާރާތެކެވެ. މި މުބާރާތް ރާއްޖޭގައި ބާއްވަން ޝެޑިއުލްކޮށްފައިވީ ނަމަވެސް އެއްކޮށް ހުރިހާ ކަމެއް ފައިނަލް ވެގެންދާނީ މީގެ ރާއްޖޭން ކުރަންޖެހޭ މަސައްކަތްތައް ފުރިހަމަ ވުމުންނެވެ.
ބުރުނު ޝިކާރު ބޮޑީބޯޑިން ޗެލެންޖްގެ ނިންމުމުގެ ރަސްމިއްޔާތުގެ ތެރެއިން މިނިސްޓަރު މަހުލޫފް ވާހަކަ ދައްކަވަނީ.-- ފޮޓޯ: އަބްދުﷲ އިޔާން/ އަދަދު
މިނިސްޓަރު މަހުލޫފް އިއްޔެ ވިދާޅުވީ އެ މަސައްކަތް އެމްބީބީއޭ އާއި މިނިސްޓްރީން ގުޅިގެން ކުރަމުން އަންނަ ކަމަށެވެ.
އެންމެ ފަހުން ރާއްޖޭގައި ބޭއްވި ބައިނަލްއަގުވާމީ ބޮޑީބޯޑިން މުބާރާތަކީ 2015 ވަނަ އަހަރު ބޭއްވި މޯލްޑިވްސް އޯޕަން އެވެ. އައިބީސީ ޕްރޯ މުބާރާތް ރާއްޖޭގައި ބޭއްވިއްޖެނަމަ އެ ވެގެންދާނީ މިހާތަނަށް ރާއްޖޭގައި ހޯސްޓްކުރެވޭ އެންމެ މަތީ ފެންވަރުގެ ބޮޑީބޯޑިން އިވެންޓަށެވެ.
މި ފަހަރުގެ ބޮޑީބޯޑިން ސީޒަން ފަށަން ބޭއްވި ބުރުނު ޝިކާރު ޗެލެންޖްގައި މި ފަހަރު ރާއްޖޭން ވަނީ ވަކިން މުޅިން އަލަށް ދެ ޑިވިޝަނެއް ހިމަނައިފަ އެވެ. އެ ގޮތުން ފުރަތަމަ ފަހަރަށް އަންހެން ޑިވިޝަނާއި ޖޫނިއާ މެންސް ޑިވިޝަން މުބާރާތުގައި ކުރިއަށްދިޔައިރު، އެ ކަންތައްތަކަށް މިނިސްޓަރު މަހުލޫފް ވެސް ވަނީ ތަރުހީބު ދެއްވައިފަ އެވެ.
"ހާއްސަކޮށް މޫދު ކުޅިވަރުތަކަށް ސާފިން އަދި ބޮޑީބޯޑިން މީގެ ތެރެއަށް މިހާރު އަންހެން ކެޓަގަރީތަކެއް ވަދެ، އާ ކަންތައްތަކެއް ލީގު ފެށުން. މި ކަހަލަ ކަންތައްތަކެއް ވެގެންދާ ކަމީ އަޅުގަނޑަށް ވެސް ވަރަށް ބޮޑު ހިތްހަމަޖެހުމެއް. އަޅުގަނޑުމެންގެ މިނިސްޓްރީން މިހާރު ވެސް ދެމުންދާ އެހީތެރިކަމަށް ވުރެ ބޮޑަށް އެ ސަޕޯޓް ދޭނެ ވާހަކަ ބުނެލަން ބޭނުން،" މަހުލޫފް ވިދާޅުވި އެވެ.
އިއްޔެ ނިމިގެންދިޔަ އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖަކީ މި ފަހަރު މުޅިން އަލަށް ފެށި ގައުމީ ބޮޑީބޯޑިން ލީގުގެ ހަ މުބާރާުތުގެ ތެރެއިން ފުރަތަމަ މުބާރާތެވެ. ދެ ވަނަ މުބާރާތަކީ މެއި 26 އިން ޖޫން 4 އަށް އޮތް ލަބޭރާ ބޮޑީބޯޑިން ޗެލެންޖެވެ. އެ މުބާރާތް ނިމުމުން، ބުރުނު ޝިކާރާ އެއްކޮށްލައިގެން ޖުމްލަ ރޭންކެއް ހަދައި، މި އަހަރުގެ ނިޔަލަށް ގައުމީ ބޮޑީބޯޑިން ޓީމެއް އެކުލަވާލައި، ޖޫނިއާ ސްކޮޑެއް ނަގައިގެން ޑިވެލޮޕްމަންޓްގެ މަސައްކަތް ފަށާނެ އެވެ.
