އަންނަ އެޕްރީލް މަހު ބާއްވާ ލޯކަލް ކައުންސިލް އިންތިހާބާ ދިމާކޮށް ސަރުކާރުން ދޭ ވަޒީފާތަކާއި ފަށާ މަޝްރޫއުތަކާ ގުޅޭގޮތުން އެންޓި ކޮރަޕްޝަން ކޮމިޝަން (އޭސީސީ) އިން އެއްޗެއް ނުބުނި އެވެ.

މިކަމާ ގުޅޭގޮތުން އަދަދު އިން ތަކުރާރުކޮށް އޭސީސީއަށް ގުޅައި މެސެޖުކުރުމުން ވެސް އެ ކޮމިޝަނުން އެއްޗެއް ބުނަން ވަނީ ދެކޮޅު ހަދާފަ އެވެ.

އަދަދު އަށް އެނގިފައިވާ ގޮތުގައި ކައުންސިލް އިންތިހާބާ ދިމާކޮށް އެކި މިނިސްޓްރީތަކާއި އެސްއޯއީތަކަށް އަދި އެކި އިދާރާތަކަށް މުވައްޒަފުން ދަނީ ނަގަމުންނެވެ.

މިގޮތުން ޕަބްލިކް ވޯކްސްއަށް 500 އަށްވުރެ ގިނަ މުވައްޒަފުން ނަގަން އުޅޭ ކަމަށް ދާދި ފަހުން ލޯކަލް ގަވަމަންޓް މިނިސްޓަރު އާދަމް ޝަރީފް ވަނީ ވިދާޅުވެފަ އެވެ. އެކަމާ ގުޅޭގޮތުން އޭސީސީއާ ސުވާލުކުރުމުން ވެސް އެއްޗެއް ބުނެފައެއް ނުވެ އެވެ.

މީގެއިތުރުން ކައުންސިލް އިންތިހާބާ ދިމާކޮށް ސަރުކާރުން ދަނީ ބޯހިޔާވެހިކަމުގެ އެކި މަޝްރޫއުތަކަށް ކުރިމަތިލާން ހުޅުވާލަމުންނެވެ.

ސަރުކާރުން ހުޅުވާލި ބޯހިޔާވެހިކަމުގެ މަޝްރޫއުތަކުގެ ތެރޭގައި ރަސްމާލެއިން ދޫކުރާ 15،000 ބިމާއި 7،900 ފްލެޓަށް ކުރިމަތިލާން ހުޅުވާލިއިރު، ބ. ތުޅާދޫ އާއި ތ. ވިލުފުށީގައި އިމާރާތްކޮށްފައިވާ 100 ހައުސިން ޔުނިޓަށް ކުރިމަތިލުމުގެ ފުރުސަތު ވެސް އިންތިހާބާ ދިމާކޮށް ސަރުކާރުން ވަނީ ހުޅުވާލާފަ އެވެ.

ތުޅާދޫގައި އިމާރާތްކޮށްފައިވާ 100 ހައުސިން ޔުނިޓަށް ކުރިމަތިލާން ސަރުކާރުން ހުޅުވާލީ އެކަން ކައުންސިލުން ކުރިއަށް ގެންދަނިކޮށް، ކައުންސިލް އަތުން އަތުލުމަށްފަހު އެވެ.

ވޯޓު ގަންނަ ކެންޑިޑޭޓުންނަކީ ރައްޔިތުންގެ ބާރުވެރިކަން ނިގުޅައިގަނެ އެ މީހުންގެ އަމިއްލަ މަސްލަހަތަށް މަސައްކަތް ކުރާ ބައެއް ކަމަށާއި ކުރިއަށް އޮތް ލޯކަލް ކައުންސިލް އިންތިހާބުގެ ދުވަސްވަރު ތާއީދު ހޯދުމަށް ރިޝްވަތު ދީފި ނަމަ ރިޕޯޓު ކުރުމަށް އޭސީސީން ޖެނުއަރީ 12، ގައި އެދުނެވެ.

ރިޝްވަތު ދިނުމާއި ހިފުމަކީ ގާނޫނީ ކުށެއްކަން ހަނދާން ކޮށްދީ އޭސީސީން ވަނީ އެފަދަ ކަމެއް ފާހަގަކުރެވިއްޖެ ނަމަ ރިޕޯޓު ކުރުމަށް އެދިފަ އެވެ. އަދި އެފަދަ އެއްވެސް މައްސަލައެއް ނުބަލައި ދޫކޮށްނުލާނެ ކަމުގެ ޔަގީންކަން ވެސް އެ ކޮމިޝަނުން ވަނީ ދީފަ އެވެ.

ނަމަވެސް އިންތިހާބާ ދިމާކޮށް ސަރުކާރުން ކުރަމުންދާ ކަންކަމާ ގުޅިގެން އަދި އެ ކޮމިޝަނަށް މިހާތަނަށް އެއްވެސް ރިޕޯޓެއް ލިބިފައިވާކަން ވެސް އޭސީސީން ހާމަކޮށްފައެއް ނުވެ އެވެ.