ކުރިއަށް އޮތް ރޯދަ މަހާ ދިމާކޮށް މާލޭ ވިޔަފާރި ބަނދަރަށް އެއް ފަހަރާ ގިނަ އަދަދެއްގެ މުދާ އުފުލާ ބޯޓުތައް އަންނަމުންދާތީ، މުދާ ބޭލުމުގައި ދަތިތަކެއް ދިމާވެއްޖެ އެވެ.

އެމްޕީއެލްގެ މާކެޓިން އެންޑް ޕަބްލިކް ރިލޭޝަންސްގެ ޑެޕިއުޓީ މެނޭޖަރު، ހަސަން ޝިފާން އަދަދު އަށް ވިދާޅުވީ މާލޭ ވިޔަފާރި ބަނދަރުން މުދާ ބޭލުމުގައި ދަތިތަކެއް ދިމާވީ އެ ބަނދަރުގެ ޖާގައިގެ ދަތިކަމާ ގުޅިގެން ކަމަށެވެ.

ޖެނުއަރީ 12، ގައި މާލޭ ވިޔަފާރި ބަނދަރުން ބާލަން ހުރީ 3،901 ކޮންޓެއިނަރު ކަމަށްވާއިރު، ލޯޑްކުރަން ހުރީ 2،700 ކޮންޓެއިނަރު ކަމަ ޝިފާން މައުލޫމާތު ދެއްވި އެވެ.

އެހެން ނަމަވެސް، މިއަދު 12:00 ޖެހުމާ ހަމައަށް މިހާރު ނުބޭލި ހުރީ 1،250 ކޮންޓެއިނަރު ކަމަށްވާއިރު، ލޯޑުކުރަން ހުރީ 1،118 ކޮންޓެއިނަރު ކަމަށް އޭނާ ވިދާޅުވި އެވެ.

އޭގެއިތުރުން، ޖެނުއަރީ 12، އިން ފެށިގެން މިއަދު 12:00 ޖެހުމާ ހަމައަށް މާލެ ވިޔަފާރި ބަނދަރަށް ޖުމްލަ ހަތް ކާގޯ އުޅަނދު ލޯޑު ކުރި ކަމަށާއި އެގެތެރެއިން މިހާތަނަށް ހުސް ނުކުރެވި އޮތީ ދެ ބޯޓު ކަމަށް ޝިފާން ވިދާޅުވި އެވެ.

މާލޭ ވިޔަފާރި ބަނދަރުގެ ޖާގައިގެ ދަތިކަމާ ގުޅިގެން އެއްފަހަރާ ބޯޓުތައް އަންނަ ކޮންމެ ފަހަރަކު ވެސް މުދާ ބޭލުމުގައި ދަތިތައް ދިމާވާ ކަމަށް އެމްޕީއެލް އިން ބުންޏެވެ.

މާލޭ ވިޔަފާރި ބަނދަރާއި ހުޅުމާލެ ޓަރމިނަލްގެ ކެޕޭސިޓީއަކީ 2،750 ކޮންޓޭނަރެވެ. ނަމަވެސް އެ ޓާމިނަލްތަކުގައި މިވަގުތު ވެސް 5،338 ކޮންޓޭނަރު އެބަހުއްޓެވެ.

ކޮންޓޭނަރު އުލާ ބޯޓު ފަހަރާއި ޕެރިޝަބަލް މުދާ އުފުލާ ބޯޓު ފަހަރު ހިމެނޭ ގޮތަށް ޖުމްލަ އަަށް އުޅަނދެއް މިވަގުތު ވެސް މާލޭ ވިޔަފާރި ބަނދަރުގައި އެބައޮތެވެ.