މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) ގެ އެކްރެޑިޓޭޝަން ގަވާއިދާއި އެކްރެޑިޓޭޝަން ދީފައިވާ ޕްރޮގްރާމްތައް ރާއްޖެއިން ބޭރުގައި ހިންގުމާބެހޭ ގަވާއިދާ ހިލާފަށް އެވިޑް ކޮލެޖުން ސްރީ ލަންކާގައި ޕްރޮގްރާމްތައް ހިންގާތީ އެ ކޮލެޖަށް ފިޔަވަޅު އަޅައިފި އެވެ.

އެމްކިއުއޭއިން ނެރުނު އިއުލާނެއްގައި ބުނީ އެވިޑުން ގަވާއިދާ ހިލާފަށް ލަންކާގައި ޕްރޮގްރާމްތައް ހިންގާތީ އެމްކިއުއޭގެ އެޑްވައިޒަރީ ބޯޑުގެ ލަފަޔާއެކު އަޅާ ފުރަތަމަ ފިޔަވަޅެއްގެ ގޮތުން އެ ކޮލެޖަށް ނަސޭހަތްތެރިވުމާއެކު އެކަން އިއުލާންކުރާ ކަމަށެވެ.

އެމްކިއުއޭއިން ބުނީ އެ އޮތޯރިޓީން އެކްރެޑިޓޭޝަން ދީފައިވާ ޕްރޮގްރާމްތައް ރާއްޖެއިން ބޭރުގައި ހިންގުމާބެހޭ ގަވާއިދާ ހިލާފަށް އެވިޑުން ލަންކާގެ "އެމަޒޯން ކޮލެޖް" އަދި ވަކި ގައުމެއް ނޭނގޭ "އަލްޒެޓް ޔުނިވާސިޓީ" ގައި ޕްރޮގްރާމްތައް ހިންގައި، ދަރިވަރުންނަށް އެވިޑުން ސަނަދު ދީފައިވާ ކަމަށެވެ.

"މިކަން ފާހަގަކުރެވިފައިވަނީ، އެވިޑް ކޮލެޖުން ހިންގުމަށް ހުއްދަ ދީފައިވާ ބައެއް ޕްރޮގްރާމް، ސްރީލަންކާގެ އެމަޒޯން ކޮލެޖު އަދި އަލްޒެޓް ޔުނިވާސިޓީ ގައި ހިންގައި، އެފަދަ ޕްރޮގްރާމްތައް ފުރިހަމަކޮށް ގްރެޖުއޭޓްވެގެން ހޯދާފައިވާ އެވިޑް ކޮލެޖްގެ ސަނަދުތަކުގެ ސައްހަކަން ކަށަވަރުކުރަން ދަރިވަރުންނާއި، އެކި ގައުމުތަކުގެ ކޮލިފިކޭޝަން އެޖެންސީތަކުންނާއި އެވިޑް ކޮލެޖުން މި އޮތޯރިޓީއަށް ހިއްސާކޮށްފައިވާ މައުލޫމާތުން،" އެމްކިއުއޭއިން ބުންޏެވެ.

ސްރީލަންކާގެ "ޗެސްޓާ ކޮލެޖް އޮފް ހަޔާ އެޑިއުކޭޝަން" އާއި "އިމްޕީރިއަލް ވިސްޑަމް ގްރެޖުއޭޓް ކެމްޕަސް" އާއި "އިނޮވޭޓަސް ކެމްޕަސް" އާއި ސިލޯން ކޮލެޖް އޮފް އެޕްލައިޑް ސްޓަޑީޒް" އަދި "ބިޓްވިން ކެމްޕަސް" ގައި އެވިޑް ކޮލެޖުގެ ޕްރޮގްރާމްތައް ލަންކާގައި ހިންގުމަށް އިޝްތިހާރުކޮށްފައިވާކަން ފާހަގަކުރެވިފައިވާ ކަމަށް ވެސް އެމްކިއުއޭއިން ބުންޏެވެ.

އެ ތަންތަނަކީ ސްރީލަންކާގެ TVEC, UGC އަދި މިނިސްޓްރީ އޮފް އެޑިއުކޭޝަން، ހަޔާ އެޑިއުކޭޝަން އެންޑް ވޮކޭޝަނަލް އެޑިއުކޭޝަން ގައި މަތީ ތައުލީމް ދިނުމަށް ރަޖިސްޓްރީ ކުރެވިފައިވާ ތަންތަން ނޫންކަން އެމްކިއުއޭއިން ފާހަގަކުރެ އެވެ.

އެމްކިއުއޭއިން ބުނީ އޮގަސްޓް 29، 2024، އިން ފެށިގެން އެ އޮތޯރިޓީން ދިޔައީ އެކްރެޑިޓޭޝަން ދީފައިވާ ޕްރޮގްރާމްތައް އެކްރެޑިޓޭޝަން ދިން ގޮތާ ހިލާފަށް ނުހިންގަން ތަކުރާރުކޮށް އެވިޑަށް ނަސޭހަތްތެރިވަމުން ކަމަށާއި ނަމަވެސް އެވިޑުން އަމަލުކުރީ ގަވާއިދާ ހިލާފަށް ކަމަށެވެ.

އެމްކިއުއޭއިން ބުނީ މަތީ ތައުލީމުދޭ މަރުކަޒުތަކަށް އެކްރެޓިޓޭޝަން ދީފައިވާ ޕްރޮގްރާމްތައް ރާއްޖެއިން ބޭރުގައި އެ އޮތޯރިޓީގެ ހުއްދަ ނުހޯދާ ނުހިންގުމަށް ހުރިހާ މަރުކަޒުތަކަށް މިދިޔަ އަހަރުގެ ފެބްރުއަރީ 17، ގައި އިލްތިމާސްކޮށް އެކަން ޖެހިގެން އައި ދުވަހު އިއުލާން ވެސް ކުރި ކަމަށެވެ.

މީގެއިތުރުން މިދިޔަ އަހަރުގެ ސެޕްޓެމްބަރު 30، ގައި ސަރުކާރުގެ ގެޒެޓުގައި އެމްކިއުއޭއިން އެކްރެޑިޓޭޝަން ދީފައިވާ ޕްރޮގްރާމްތައް ރާއްޖެއިން ބޭރުގައި ހިންގުމާބެހޭ ގަވާއިދުގެ ދަށުން، އެ އޮތޯރިޓީގެ ހުއްދަ ހޯދައިގެން ޕްރޮގްރާމްތައް ހިންގަން އިލްތިމާސްކޮށްފައިވާނޭ ކަމަށް އެމްކިއުއޭއިން ބުންޏެވެ.

އެވިޑް ކޮލެޖުން ގަވާއިދާ ހިލާފަށް އަމަލުކޮށްފައިވާތީ މީގެ ކުރިން ވެސް އެ ކޮލެޖަށް އެމްކިއުއޭއިން ފިޔަވަޅު އެޅި އެވެ. އެކަމަކު ފަހުން ފިޔަވަޅުތައް އުވާލީ އިސްލާހުކުރަން ބުނި ކަންކަން އިސްލާހުކުރުމުންނެވެ.