ރާއްޖެއަށް ބިދޭސީން ގެނައުމުގައި ގާނޫނީ ގަވާއިދާ ހިލާފަށް ވިޔަފާރިކޮށް، ކުށް ކޮށްގެން ފައިސާ ހޯދައި އެ ފައިސާ ލޯންޑާ ކުރި ކަމުގެ ތުހުމަތުގައި ބަންގްލަދޭޝްގެ ރައްޔިތެއްގެ މައްޗަށް ދައުވާ ކޮށްދިނުމަށް ޕްރޮސެކިއުޓާ ޖެނެރަލްގެ އޮފީހަށް ހުށަހަޅައިފި އެވެ.
މި މައްސަލައިގެ ތުހުމަތުގައި ހައްޔަރުކުރީ ޝަހާދަތު ހުސައިން ނަމަކަށް ކިޔާ މީހެކެވެ. މިވަގުތު ވެސް ފުލުހުންގެ ބެލުމުގެ ދަށުގައި ހުރި ޝަހާދަތުގެ ފޯނާއި އިލެކްޓްރޯނިކް ސާމާނު ވެސް ވަނީ ކޯޓު އަމުރެއްގެ ދަށުން ހިފަހައްޓާފަ އެވެ.
"ޝަހާދަތު ހުސައިންގެ މި މަސައްކަތްތަކުގެ ފަހަތުގައި މޯލްޑިވްސް އިމިގްރޭޝަންގައި މަސައްކަތް ކުރާ ބަޔަކާއި، ދިވެހިންގެ އާންމު އެތައް ބަޔަކު ޝަހާދަތު ހުސައިންއާ ގުޅިގެން ކުންފުނިތަކުގެ ކޯޓާ ނަގައި، ބިދޭސީން އެތެރެކޮށް، އެ ބިދޭސީންނަށް ވަޒީފާއެއް ނުދީ، މާލެ ތެރެއަށް ދޫކޮށްލައި އޯޕަން ކޯޓާގެ ނަމުގައި މާލީ މަންފާ ހޯދާ ކަމަށް ބެލެވޭ،" ފުލުހުން ހާމަކޮށްފައިވެ އެވެ.
އޭނާއަކީ 2014 ވަނަ އަހަރުން ފެށިގެން ޖުމުލަ ހަތަރު ވޯކް ޕާމިޓެއްގައި ރާއްޖޭގައި އުޅެމުންދިޔަ މީހެއްކަން ތަހުގީގަށް ވަނީ ހޯދިފަ އެވެ. އޭނާގެ ނަމުގައި ބޭންކް އޮފް މޯލްޑިވްސް (ބީއެމްއެލް) ގެ ނަމުގައި ހަ އެކައުންޓް ހުޅުވާފައިވާއިރު އޭގެ ތެރޭގައި ތިން ޑޮލަރު އެކައުންޓް ހިމެނެ އެވެ. އޮކްޓޯބަރު 2019 އިން ފެށިގެން އޭނާގެ އެކައުންޓުތަކުން އަށް މިލިއަން ދިވެހި ރުފިޔާ ދައުރުކޮށްފައިވާ ކަމަށް ތަހުގީގަށް ވަނީ އެނގިފަ އެވެ.
"ޝަހާދަތު ހުސައިން ގެންގުޅޭ ފޯނާއި ލެޕްޓޮޕްގައި އެކު ކުންފުނިތަކުގެ ރަޖިސްޓްރީ އާއި، ލޯގޯ، ސްޓޭމްޕް، އެކި މީހުންގެ ސޮއެ ބިދޭސީން ހިމެނޭ ގޮތަށް، އަދި ވޯކް ޕާމިޓް ކޯޓާ ނެގުމަށް ބޭނުންވާ ޑޮކިއުމެންޓްސް، ބިދޭސީންގެ ޕާސްޕޯޓް ކޮޕީ، އަދި ބައެއް ދިވެހިންގެ އައިޑީ ކާޑު ފޮޓޯ ފެނިފައިވޭ،" މިއަދު ބޭއްވި ނޫސްވެރިންގެ ބައްދަލުވުމެއްގައި ފުލުހުން ހާމަކުރި އެވެ.
އަމިއްލަ ފަރުދުންގެ ވިޔަފާރިތަކުގެ ނަމުގައި 103 އެކައުންޓް އޭނާ އެކްސްޕެޓް ސިސްޓަމަށް ލޮގިން ވުމަށް ބޭނުންކުރި ކަމަށް ފުލުހުން ބުނެފައިވެ އެވެ. އަދި 283 ކުންފުންޏެއްގެ ނަމުގައި ޕާސްވޯޑާއި އައިޑީ ހޯދިފައިވާ ކަމަށް ވެސް ފުލުހުން ބުނެ އެވެ.
މި މައްސަލާގައި ހިމެނޭ އިމިގްރޭޝަން މުވައްޒަފުންގެ ބަޔާއި އާންމުންގެ ބައި ވަކިން ތަހުގީގު ކުރަމުންދާ ކަމަށް ފުލުހުން ބުނެ އެވެ. އެކަމުގެ އިތުރު ތަފްސީލެއް މިއަދު ފުލުހުން ހާމަނުކުރެ އެވެ.
