މާލޭގެ އުސް އިމާރާތަކުން ފުރާޅެއްގެ މައްޗަށް ވެއްޓިފައި އޮއްވާ ފެނުނު ޒުވާނާއަށް އިންސާފު ހޯދައިދޭން ސިލްސިލާކޮށް ކުރަމުންދިޔަ ސުލްހަވެރި މުޒާހަރާއިން ރޭ ހައްޔަރު ކުރި އައިޝަތު ޝިމަން އަހުމަަދާއި އަބްދުﷲ މަހްޒޫމް މާޖިދު ތިން ދުވަހަށް ބަންދު ކުރަން ކްރިމިނަލް ކޯޓުން އަމުރުކޮށްފި އެވެ.

މިއަދު އޮތް މުއްދަތު މަޖިލީހުގައި ފުލުހުންގެ ފަރާތުން އެދުނީ އެ ދެމީހުން 15 ދުވަހަށް ބަންދުކޮށްދިނުމަށެވެ. ޝިމަން އާއި މަހުޒޫމްގެ މައްޗަށް ވެސް ފުލުހުން ކުރަނީ އަމުރަށް ނުކިޔަމަންތެރިވުމުގެ ކުށުގެ ތުހުމަތެވެ. އޭގެއިތުރުން ފުލުހަކަށް ހަމަލާ ދޭން މަސައްކަތް ކުރި ކަމުގެ ތުހުމަތު ވެސް މަހުޒޫމްގެ މައްޗަށް ފުލުހުން ކުރެ އެވެ.

ނަމަވެސް އެކަން ސާބިތު ކޮށްދިނުމަށް ފުލުހުން އެއްވެސް ވީޑިއޯ ހެއްކެއް ހުށަހަޅައިފައެއް ނުވެ އެވެ. ހެކީގެ ގޮތުގައި ފުލުހުން ހުށަހެޅީ ހަމައެކަނި ފުލުހުންގެ ބަޔާންތަކެވެ. އެ ދެ މީހުން ބަންދު ކުރަން ގާޒީ އިބްރާހިމް ޒިހުނީ ނިންމެވީ ފުލުހުންގެ ބަޔާނަށް އެކަނި ބެލުމަށްފަހު އެވެ.

"ފުލުހުން އެ ވަގުތު ދަމާފައި ހުރި ލައިނު ފަޅާލާފައި އެތަނުން ދާން އުޅުމުން [ޝިމަން ހައްޔަރު ކުރެެވިފައި ވަނީ]،" އެ މައްސަލަ ބަލާ ފުލުުހުންގެ އައިއޯ ކޯޓުގައި ބުންޏެވެ.

ޝިމަން އާއި މަހުޒޫމް ތިން ދުވަހަށް ބަންދު ކުރަން ކޯޓުން އަމުރު ކުރީ ފުލުހުން ހުށަހެޅި ބަޔާންތަކުން ކުށެއްގެ ތުހުމަތު އުފެދޭ ކަމަށް ބުނެ އެވެ.

މުއްދަތު މަޖިލީހުގައި ވަކާލާތު ކުރައްވަމުން، ޝިމަންގެ ގާނޫނީ ވަކީލު، އައިޝަތު ޝީނާ މުހައްމަދު ވިދާޅުވީ ފުލުހުން ހައްޔަރު ކުރަން އުޅުމުން ޝިމަން ދެކޮޅު ހަދާފައި ނުވާ ކަމަށާއި ފެންނަން ހުރި ވީޑިއޯތަކުން ވެސް އެކަން ސާފުވާ ކަމަށެވެ.

"[ފުލުހުން] ހައްޔަރު ކުރަން އުޅުމުން ޝިމަން ދެކޮޅެއް ނުހަދާ. އެކަމަކު ފުލުހުން ވަނީ ހާލަތާ ނުބައްދަލު ބާރު ބޭނުންކޮށްފައި، ފުލުހުން އެއްވެސް ވީޑިއޯ ހެއްކެއް ހުށަހަޅާފައެއް ނުވޭ، އެއީ ވީޑިއޯތަކުން ވެސް އެބަ ދައްކާ ފުލުހުން ތުހުމަތު ކުރާ ފަދަ ކަމެއް ޝިމަން ނުކުރާކަން،" ޝިމަންގެ ގާނޫނީ ވަކީލު، ޝީނާ ވިދާޅުވި އެވެ.

ޝިމަން އާއި މަހްޒޫމް ހައްޔަރު ކުރީ ސީދާ އެ ދެ މީހުންނަށް ޓާގެޓުކޮށްގެން ކަމަށް ވެސް ދިފާއީ ވަކީލު ވިދާޅުވި އެެވެ.

"ހައްޔަރު ކުރަން ނުޖެހޭ ބަޔަކު، ޓާގެޓު ކުރުމަށްފަހު، އެމީހުންގެ މައްޗަށް އަރައިގަނެ، ހައްޔަރު ކުރީ،" ޝީނާ ވިދާޅުވި އެވެ.

މަހުޒޫމްގެ ކޮނޑަށްވެފައި ހުރި އަނިޔާގެ ސަބަބުން އާމް ސްލިންގެއް އަޅަން ޑޮކްޓަރު އަންގާފައިވީ ނަމަވެސް އާމްސްލިންގެއް ފުލުހުން ފޯރު ކޮށްދީފައި ނުވާ ކަމަށް ވެސް މުނާ ވިދާޅުވި އެވެ.

ޝިމަން، 19، އާއި މަހްޒޫމް، 28، ހައްޔަރު ކުރީ ސުލްހަވެރިކަމާއެކު މުޒާހަރާ ކުރަމުން ދަނިކޮށް މުޒާހަރާ ރޫޅާލާނެ ކަމުގެ އިންޒާރެއް ވެސް ނުދީ އެވެ. މުޒާހަރާ ރޫޅާލި ހަމައެކަނި ސަބަބަކީ މަގުމަތީ މުޒާހަރާ ކުރުމުން ވިޔަފާރިތަކަށް ދަތިވުމާއި އޯލެވެލް ޓެސްޓު ހަދާ ކުދިންނަށް މުޒާހަރާގެ ސަބަބުން އުނދަގޫވުން ކަމަށް ފުލުހުން ބުންޏެވެ.

މުޒާހަރާގެ ތެރެއިން އެ ދެމީހުން ހައްޔަރު ކުރީ ހާލަތާ ނުބައްދަލު ބާރު ބޭނުން ކޮށްގެން ކަމަށް އެ ވަގުތު އެ ސަރަހައްދުގައި ތިބި މީހުން ބުންޏެވެ. ހައްޔަރު ކުރުމަށް ފުލުހުން އަމަލު ކުރި ގޮތުން އެ ދެމީހުންނަށް ވެސް ހުރީ އަނިޔާތަކެއް ލިބިފަ އެވެ.

އެގޮތުން މަހުޒޫމްގެ ކޮނޑަށް ވަރަށް ބޮޑަށް ތަދުވެ، އަނިޔާވެފައިވާއިރު، ޝިމަންގެ އަތް ހުރީ ދުޅަވެފައި ކަމަށް އެ ދެމީހުންގެ ގާނޫނީ ވަކީލުން އަދަދު އަށް މައުލޫމާތު ދެއްވި އެވެ.

ޝިމަން އާއި މަހުޒޫމް ހައްޔަރު ކުރުމާއި މުޒާހަރާގެ ތެރެއަށް ފުލުހުން ވަދެގަނެ އަމަލު ކުރި ގޮތް އިދިކޮޅު އެމްޑީޕީ އާއި ޑިމޮކްރެޓްސް އިތުރުން ސިޔާސީ ބައެއް ބޭބޭފުޅުން ވެސް ވަނީ ކުށްްވެރިކޮށްފަ އެވެ. އޭގެތެރޭގައި ކުރީގެ ރައީސް، މުހައްމަދު ނަޝީދު އާއި އިބްރާހިމް މުހައްމަަދު ސޯލިހު އަދި އެމްޑީޕީގެ ޗެއާޕާސަން ފައްޔާޒް އިސްމާއިލްގެ އިތުރުން އެ ޕާޓީގެ ރައީސް އަބްދުالله ޝާހިދު ހިމެނެ އެވެ.