ޓްރީ ޓޮޕް ހޮސްޕިޓަލުގެ ހަތް ވަނަ އަހަރީ ދުވަހާ ގުޅުވައިގެން ކަސްޓަމަރުންނަށް ހާއްސަ ޑިސްކައުންޓުތަކެއް ދޭން ފަށައިފި އެވެ.

ޓްރީޓޮޕުން ބުނީ މާޗު 1، އިން ފެށިގެން މާޗު 7، ގެ ނިޔަލަށް އެ ހޮސްޕިޓަލުން ސީޓީ ސްކޭން އަދި އެމްއާރްއައި ހިދުމަތުން 15 ޕަސަންޓު ޑިސްކައުންޓު ލިބޭނެ ކަމަށެވެ. މި މުއްދަތުގައި ބޯން މިނަރަލް ޑެންސިޓީ ޓެސްޓްތަކުން 10 ޕަސަންޓުގެ ޑިސްކައުންޓު ލިބޭނެ ކަމަށް ވެސް އެ ހޮސްޕިޓަލުން ބުންޏެވެ.

މާޗު 8، އިން މާޗު 14، ގެ ނިޔަލަށް ހަންގަނޑު ތާޒާ ކުރުން ނުވަތަ ސްކިން ރިޖޫވިނޭޝަން ހިދުމަތާއި އެކްނީ ސްކާ ޓްރީޓްމަންޓް ނުވަތަ އޮށާޅަ، ލަކުނު ފިލުވުމުގެ ހިދުމަތުގެ އިތުރުން ޓެޓޫ ފިލުވުމުގެ ހިދުމަތްތަކުން 20 ޕަސަންޓު ޑިސްކައުންޓެއް ދިނުމަށް ވަނީ ހަމަޖެހިފަ އެވެ.

މާޗު 15، އިން މާޗު 31، ގެ ނިޔަލަށް ސްކޭލިން ނުވަތަ ދަތް ސާފުކުރުމުގެ ހިދުމަތާއި ބްލީޗިން ނުވަތަ ދަތް ހުދު ކުރުމުގެ ހިދުމަތުގެ އިތުރުން ފިޝާ ސީލަންޓް ނުވަތަ ފުޓުނި އެޅުމުގެ ހިދުމަތުން 15 ޕަސަންޓުގެ ޑިސްކައުންޓެއް ވެސް ދިނުމަށް ވަނީ ހަމަޖެހިފަ އެވެ.

ރާއްޖޭގައި ސިއްހީ ހިދުމަތުގެ ދާއިރާގައި އިސް ދައުރެއް އަދާކުރަމުން އަންނަ ޓްރީ ޓޮޕްގެ އަމާޒަކީ އައު އުސޫލުތަކާއި ހިދުމަތްތައް ތައާރަފުކޮށް، ދިވެހި ރައްޔިތުން ބޭރު ގައުމުތަކަށް ސިއްހީ ފަރުވާ ހޯދަން ދާންޖެހޭ ސަބަބު މަދުކުރުމާއި، ސިއްހީ ހިދުމަތުގެ ހަރަދުތައް ކުޑަކުރުމެވެ.

ޓްރީ ޓޮޕްގައި 210 އެނދުގެ ކެޕޭސިޓީއާ އެކު 30 އަށްވުރެ ގިނަ ސްޕެޝަލިސްޓު ދާއިރާތަކުގެ ތަޖުރިބާކާރު ޑޮކްޓަރުންގެ ޓީމެއް މަސައްކަތްކުރެ އެވެ. އަދި އައިސީޔޫ، ކެތު ލެބް، އެންއައިސީޔޫ، އެޗްޑީޔޫ، ފާޓިލިޓީ ސެންޓަރު، ޑަޔަލިސިސް އަދި ކީމޯތެރަޕީގެ ހިދުމަތް ވެސް އެ ހޮސްޕިޓަލުން ފޯރުކޮށްދެ އެވެ.

މިދިޔަ އަހަރު ޓްރީޓޮޕުން ވަނީ އައިވީއެފް މެދުވެރިކޮށް ކުއްޖަކު ވިހެއުމުގެ އިތުރުން 1،000 އަށްވުރެ ގިނަ ކަކުލު ހުޅު ބަދަލުކުރުމުގެ ކާމިޔާބު ސާޖަރީ ހަދާފަ އެވެ. އަދި ފުރަތަމަ ފަހަރަށް ލީޑްލެސް ޕޭސްމޭކަރެއް ޓްރީ ޓޮޕުން ލެއްވީ ވެސް މިދިޔަ އަހަރު އެވެ.

ޓްރީ ޓޮޕުން މިދިޔަ އަހަރު ރާއްޖޭގެ އެކި ސަރަހައްދުތަކުގައި ހެލްތު ކޭމްޕްތައް ބާއްވައި، 1،500 އަށްވުރެ ގިނަ މީހުންނަށް ސްޕެޝަލިސްޓުންނަށް ދެއްކޭނެ މަގުފަހިކޮށްދިނެވެ. އެ ހޮސްޕިޓަލުން ވަނީ މިދިޔަ އަހަރު ގޭގައި ތިބެގެން ފިޒިއޯތެރަޕީ ހެދޭނެ ހިދުމަތް ވެސް ގާއިމުކޮށް، މާލޭގައި ހުންނަ ޓްރީ ޓޮޕްގެ ކްލިނިކުން ދޭ ހިދުމަތްތައް ވެސް ފުޅާކޮށްފަ އެވެ.