ޖެނުއަރީ މަހުގެ ފުރަތަމަ ފަސް ދުވަހު މޫސުން ގޯސްވާނެ ކަމަށް ލަފާކޮށް ޑިސެމްބަރު 31، ގައި މޫސުމާ ބެހޭ ގައުމީ އިދާރާ (މެޓް އޮފީސް) އިން ކުރި ޕޯސްޓު ޑިލީޓް ކުރި ސަބަބު ވެދާ ސާވިސް ޑިވިޝަނާ ހަވާލުވެގެން ހުންނެވި މެޓް އޮފީހުގެ ޑެޕިއުޓީ ޑިރެކްޓާ ޖެނެރަލް އަލީ ޝަރީފަށް ވެސް ނޭގުނެވެ.

އަލީ ޝަރީފް "އަދަދު" އަށް ވިދާޅުވީ އެ ޕޯސްޓު ޑިލީޓްކުރުމާ ގުޅިގެން މުވައްޒަފުންނާ އެކަމާ ގުޅިގެން ސުވާލު ކުރުމުން ޕޯސްޓު ޑިލީޓް ކުރި ސަބަބު ނުބުނާ ކަމަށެވެ.

"އަޅުގަނޑަށް ތަންކޮޅެއް ފަހުން އެކަން އެނގުނީ. ޑިއުޓީގައި ހުރި ބޭފުޅާއާ ސުވާލުކުރީމަ އެބޭފުޅާ ވެސް އަޅުގަނޑަކަށް ކީއްވެގެން ކަމެއް އޭތި ދިޔައީކީ ނުބުނޭ. އެކަމަކު އޭތި އޮތީ އޭރު ހުރިހާ މީޑިއާއަކަށް އޭރު ގޮސް ބްރޭކް ކޮށްފައި،" އޭނާ ވިދާޅުވި އެވެ.

އެ ޕޯސްޓަކީ ޑިލީޓް ކުރަން ޖެހޭ ވަރު ޕޯސްޓެއްކަން ގަބޫލު ނުކުރައްވާކަން ފާހަގަކުރައްވާ އަލީ ޝަރީފް ވިދާޅުވީ އެއީ ސައްހަ ޕޯސްޓެއް ކަމަށެވެ.

"އެއީ ކޮންމެހެން ޑިލީޓް ކުރަން ޖެހޭ ޕޯސްޓެއް ނޫން އެއީކީ. އެއީ ސައްހަ ޕޯސްޓެއް،" އަލީ ޝަރީފް ވިދާޅުވި އެވެ.

މެޓް އޮފީހުން "އަދަދު" އާ ވާހަކަ ދެއްކި މުވައްޒަފަކު ބުނީ އެ ޕޯސްޓު ޑިލީޓްކުރީ މައްސަލަތަކެއް ދިމާވެގެން ކަމަށެވެ. ނަމަވެސް އެއީ ކޮން މައްސަލަތަކެއް ނޭނގޭ ކަމަށް އެ މުވައްޒަފު ބުންޏެވެ.

މެޓުން ކުރި ޕޯސްޓުގައި ބުނީ ސްރީލަންކާގެ އިރުދެކުނުގައި އުފެދިފައިވާ ކޮޅިގަނޑާއި ގުޅިފައިވާ ލޯޕްރެޝާ ޓްރަފުގެ ސަބަބުން، އާ އަހަރުގެ ބަންދު ތެރޭގައި ޖެނުއަރީ 1، އިން ފެށިގެން ޖެނުއަރީ 5، ގެ ނިޔަލަށް ރާއްޖޭގެ ބޮޑު ބަޔަކަށް ގުގުރުމާ އެކު ބޯކޮށް ވާރޭވެހި، ވަޔާއި ކަނޑު ގަދަވެ އަދި ބައެއް އަތޮޅުތަކަށް އުދަ އެރުމުގެ ފުރުސަތު ވެސް އޮތް ކަމަށް ލަފާ ކުރެވޭ ކަމަށެވެ.

މެޓުން ދުރާލައި ރާއްޖޭގެ މޫސުން ގޯސްވާނެ ކަމަށް ލަފާކޮށްފައި އޮތް ނަމަވެސް، ކަމާބެހޭ ފަރާތްތަކުން މޫސުން ގޯސްވެ ގެއްލުންތައް ލިބިދާނެ ކަމަށް ހަރުދަނާ ފިޔަވަޅުތަކެއް ދުރާލައި ނޭޅުމުން އާންމުން އަންނަނީ އެކަމާ ވަރަށް ބޮޑަށް ނުރުހުން ފާޅު ކުރަމުންނެވެ.