މި އަންނަ އާދީއްތަ ދުވަހުގެރޭ ދަރުބާރުގޭގައި ބާއްވަން ނިންމާފައި އޮތް ރެހެންދި އެވޯޑު އިއްޔެ ހިނގި އަލިފާނުގެ ހާދިސާ އާ ގުޅިގެން ފަސްކޮށްފި އެވެ.

ސޯޝަލް އެންޑް ފެމިލީ ޑިވެލޮޕްމެންޓް މިނިސްޓްރީން އެކްސްގައި ކުރި ޕޯސްޓެއްގައި ބުނީ އެ ހަފުލާ ބާއްވާނެ ދުވަހެއް އެ ހަފުލާއަށް ދައުވަތު ދިން މީހުންނަށް ފަހުން އަންގާނެ ކަމަށެވެ.

ރެހެންދި އެވޯޑު ފަސްކޮށްފައި މިވަނީ، އެ އެވޯޑު ހަފުލާ ބާއްވަން ނިންމާފައި އޮތް ދަރުބާރުގެއަށް އިއްޔެ އަނދައިގެންދިޔަ ތިން މިނިސްޓްރީ ހިންގުން ވަގުތީގޮތުން ބަދަލު ކުރުމާ ގުޅިގެންނެވެ.

ސަރުކާރުން މަަސައްކަތް ކުރަނީ އަންނަ ހަފުތާގެ ރަސްމީ ދުވަސްތައް ފެށެންވާއިރަށް ދަރުބާރުގޭގައި ވަގުތީ އޮފީސް ސެޓަޕްތައް ގާއިމުކޮށް އަލުން މަސައްކަތް ފެށުމަށް ކަމަށް މި ނޫހަށް މައުލޫމާތު ލިބިފައިވެ އެވެ.

އިއްޔެ ހެނދުނު ހިނގި އަލިފާނުގެ ހާދިސާގައި ހައުސިން، އިންފްރާސްޓްރަކްޗާ އަދި އެންވަރަމެންޓު މިނިސްޓްރީ ވަނީ އަނދައިގެން ގޮސްފަ އެވެ. އެއާއެކު އެ ތިން މިނިސްޓްރީގެ އިތުރުން، ސިޓީ ކައުންސިލުގެ ވައިޓަލްސްގެ ހިދުމަތްދޭ ޑިޕާޓްމެންޓާއި އެންވަރެމެންޓް ޕްރޮޓެކްޝަން އެޖެންސީގެ ހިންގުން ވެސް ވަނީ ހުއްޓިފަ އެވެ.

ދަރުބާރުގޭގައި މިރޭ ބާއްވަން ހަމަޖެހިފައި އޮތް މަސްވެރިންގެ ދުވަހުގެ ޖަލްސާ ވެސް އަލިފާނުގެ ހާދިސާ އާ ގުޅިގެން ވަނީ ފަސްކޮށްފަ އެވެ.