ސީރިޔާގައި 24 އަހަރު ވެރިކަން ކުރި ބައްޝާރުލް އަސަދުގެ ވެރިކަން ވެއްޓި، އެ ގައުމަށް ހިން ދެމިލަން ފުރުސަތު ނުދީ އިޒްރޭލުން ވަރުގަދަ ހަމަލާތަކެއް ދޭން ފަށައިފި އެވެ.

ސީރިޔާގެ ވެރިކަން ވައްޓާލީ އިދިކޮޅު ހަނގުރާމަވެރިން ކުރި މަސައްކަތުން މިދިޔަ އާދީއްތަ ދުވަހު އެވެ. އެއާ އެކު އެ ގައުމުގައި އުފާ ފާޅު ކުރުމުގެ ހަރަކާތްތައް ވެސް ކުރިއަށް ގެންދިޔަ އެވެ.

ނަމަވެސް އިޒްރޭލުން އިއްޔެއިން ފެށިގެން ސީރިޔާއަށް ދަނީ ވަރުގަދަ ހަމަލާތައް ދެމުންނެވެ. އެގޮތުން ތިން އެއާޕޯޓަކާއި މިލިޓަރީ ތަންތަނަށް ވެސް ވަނީ ހަމަލާތައް ދީފަ އެވެ.

އިޒްރޭލުގެ އަމަލުތައް ހުރި ގޮތުން އެ ގައުމުން ސީރިޔާ ހިފަން އުޅޭ ކަމަށް ރިޕޯޓްތަން ބުނަމުންދާއިރު، އިޒްރޭލުން އަންނަނީ ސީރިޔާގެ ބޯޑަރު ހުރަސްކޮށް އެތެރެއަށް ވަންނަމުންނެވެ.

އިޒްރޭލުން ސީރިޔާއަށް ދެމުން އަންނަ ހަމަލާތައް ގިނަ ބަޔަކު އަންނަނީ ކުށްވެރި ކުރަމުންނެވެ. އޭގެ ތެރޭގައި ގަތަރު ސައުދީ އަރަބިއްޔާ އަދި އިރާގު ހިމެނެ އެވެ.

އޭގެ އިތުރުން އދ. އިން ވަނީ އިޒްރޭލުން ބައިނަލްއަގުވާމީ އެއްބަސްވުންތަކާ ހިލާފަށް މަސައްކަތް ކުރަމުންދާ ކަމަށް ތުހުމަތުކޮށް، އެކަން ވަގުތުން ހުއްޓާލަން ގޮވާލައިފަ އެވެ.

އިޒްރޭލުން ސީރިޔާއަށް ދޭ ހަމަލާތައް ވަރުގަދަ ކުރީ އެ ގައުމުން ލުބްނާނަށް ދެމުންދާ ހަމަލާތައް ހުއްޓާލިތާ ދުވަސްތަކެއް ފަހުންނެވެ. އިޒްރޭލުން ދަނީ މިދިޔަ އަހަރުގެ އޮކްޓޯބަރު 7، އިން ފެށިގެން ފަލަސްތީނުގައި ގަތުލް އާންމު ހިންގަމުންނެވެ.