އެމެރިކާ އާއި އިޒްރޭލުން އިރާނުގެ ވެރިރަށް ތެހެރާންގައި ހުރި ތެޔޮ ރައްކާކުރާ ގުދަންތަކާއި ތެޔޮ ސާފުކުރާ މަރުކަޒުތަކަށް ވަރުގަދަ ހަމަލާތަކެއް ދީފިއެވެ. މިއީ މިފަދަ މަރުކަޒުތަކަށް އަމާޒުކޮށް މި ފަހަރުގެ ހަނގުރާމައިގައި ހަމަލާދިން ފުރަތަމަ ފަހަރެވެ.

މި ހަމަލާތަކާ ގުޅިގެން ތެހެރާންގެ އެކި ސަރަހައްދުތަކުގައި ބޮޑެތި އަލިފާންގަނޑުތައް އުފެދި، މުޅި ސިޓީގެ އުޑުމަތި ދުމުން ބައްދާލާފައިވާ ކަމަށް ރިޕޯޓްތައް ބުނެއެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ އިރާނުން "ޝަރުތެއް ނެތި އަމާންދިނުމަށް" އަނެއްކާވެސް ގޮވާލައްވާފައެވެ.

ޓްރަމްޕް ވިދާޅުވީ މި ހަނގުރާމަ ހުއްޓާލާނީ އިރާނުގެ ވެރިން ބަލި ގަބޫލުކޮށް އަމާންދިނުމުން ނުވަތަ އެ ގައުމުގެ އަސްކަރިއްޔާ އެއްކޮށް ހަލާކުވެ، ހަރަކާތް ނުކުރެވޭ ވަރުވުމުން ކަމަށެވެ.

އިރާނުގެ އިސް ލީޑަރެއްކަމުގައިވާ އަލީ ލަރީޖާނީ ވަނީ އެމެރިކާގެ މި އަމަލުތަކަށް ހަރުކަށި ބަހުން ރައްދު ދެއްވާފައެވެ. އޭނާ ވިދާޅުވީ މި ހަނގުރާމައިގެ ގެއްލުމުގެ ބަދަލު އެމެރިކާއިން އަދާކުރަން ޖެހޭނެ ކަމަށާއި، އެމެރިކާގެ ލަނޑުދަނޑިތައް ނާކާމިޔާބުވަމުންދާ ކަމަށެވެ.

އެމެރިކާއިން ތެޔޮ ކާރުހާނާއަށް ހަމަލާ ދިން އިރު، ގަތަރާއި، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް (ޔޫއޭއީ) އިން ވަނީ އިރާނުން އެ ގައުމުތަކަށް އަދިވެސް ހަމަލާދެމުންދާ ކަމަށް ރިޕޯޓްކޮށްފައެވެ. އީރާނުގެ ރައީސް މަސްއޫދު ޕެޒެޝްކިއަން މީގެ ކުރިން ހަމަލާތައް ހުއްޓާލާނެ ކަމުގެ ޔަގީންކަން ދެއްވައި، މައާފަށް އެދިވަޑައިގެންފައިވީ ނަމަވެސް، ހަމަލާތައް ދިނުން ހުއްޓައެއް ނުލައެވެ.

އިރާނު ހަނގުރާމަ ފެށި ފަހުން ދުނިޔޭގެ ބާޒާރުގައި ތެލުގެ އަގު ރެކޯޑު މިންވަރަކަށް ވަނީ އުފުލިފަ އެވެ.