ޓްރީޓޮޕް ހޮސްޕިޓަލުން ވިލާ ކޮލެޖާ ގުޅިގެން ނަރުހުން ތަމްރީން ކުރަން ހަތަރު ސްކޮލަޝިޕް ފުރުސަތު މިއަދު ދީފި އެވެ.

ޓްރީޓޮޕްގައި އޮތް ރަސްމިއްޔާތެއްގައި އެ ސްކޮލަޝިޕްތައް ހަތަރު ކުދިންނާ ހަވާލު ކޮށްދެއްވީ ހޮސްޕިޓަލުގެ ޑިރެކްޓާ އޮފް ނާސިން ސޫޒަން ހާބަޓް އެވެ.

ރަސްމިއްޔާތަށްފަހު ސޫޒަން "އަދަދު" އަށް ވިދާޅުވީ މިފަހަރު ސްކޮލަޝިޕަށް ހުޅުވާލުމާ އެކު 15 ކުދިން އެކަމަށް ޝައުގުވެރިވި ކަމަށެވެ.

އެގޮތުން ސިލެކްޝަން ހެދުމުގައި ވަރަށް ކޮމްޕެޓިޓިވްވިކަން ފާހަގަކުރައްވާ ސޫޒަން ވިދާޅުވީ ސްކޮލަޝިޕްގެ ސަބަބުން އެ ކުދިންނަށް ދަސްވާ ކަންކަމުގެ ބޭނުން ރަނގަޅު ގޮތުގައި ހިފާނެ ކަމަށް އުންމީދު ކުރާ ކަމަށެވެ.

ޓްރީޓޮޕް ހޮސްޕިޓަލުން ނަރުހުން ތަމްރީން ކުރަން ހަތަރު ސްކޮލަޝިޕް ފުރުސަތު ހަވާލު ކުރުން -- ފޮޓޯ؛ އިސްމާއިލް އިމްދާދު / އަދަދު

ވިލާ ކޮލެޖުން ނާސިން ދާއިރާއިން ޑިޕްލޮމާ ހާސިލު ކުރުމުގެ ފުރުސަތު ލިބުނީ ހަލީމަތު ހުލްވާ، އައިމިނަތު އިބްލާ، މަރިޔަމް މައިޝާ އަދި އައިމިނަތު އަތުފާއަށެވެ.

ޓްރީޓޮޕްގެ ސީއީއޯ ސްރިވާޓްސަން ސްރިދާރު ވިދާޅުވީ ނަރުހުން ތަމްރީން ކުރުމުގެ ޕްރޮގްރާމަކީ މީހުން ބިނާ ކުރުމަށް ކުރާ އިންވެސްޓެއް ކަމަށާއި އެގޮތުން ސްކޮލަޝިޕް ފުރިހަމަ ކުރާ ދަރިވަރުން ރާއްޖޭގައި ހިދުމަތް ކުރާނެ ކަމަށް އުންމީދު ކުރާ ކަމަށެވެ.

ޓްރީޓޮޕް ހޮސްޕިޓަލުން ނަރުހުން ތަމްރީން ކުރަން ހަތަރު ސްކޮލަޝިޕް ފުރުސަތު ހަވާލު ކުރުން -- ފޮޓޯ؛ އިސްމާއިލް އިމްދާދު / އަދަދު

ޓްރީޓޮޕުން 2021 އިން ފެށިގެން ކުރިއަށް ގެންދާ ސްކޮލަޝިޕް ޕްރޮގްރާމްގެ ދަށުން މިހާތަނަށް 15 ނަރުހުން ވަނީ ތަމްރީން ކޮށްފަ އެވެ. އޭގެ ތެރެއިން ހަތް ނަރުހުން ޓްރީޓޮޕްގައި އަންނަނީ މަސައްކަތް ކުރަމުންނެވެ.

ރާއްޖެއަށް ފުޅާ ދާއިރާއެއްގައި ސިއްހީ ހިދުމަތް ދެމުން އަންނަ ޓްރީޓޮޕުން އަންނަނީ ޒަމާނީ ޓެކްނޮލޮޖީގެ އެހީގައި މުޅިން އާ ހިދުމަތްތައް ތައާރަފް ކުރަމުންނެވެ. އަދި އެ ހޮސްޕިޓަލުން އަންނަނީ ރާއްޖޭގެ އެކި ރަށްރަށުގައި ހެލްތު ކޭމްޕްތައް ބާއްވައި ގިނަ ރައްޔިތުންނަށް ހިދުމަތްތައް ދެމުންނެވެ.