ޓޫރިސްޓު ފެސިލިޓީތަކުން ރާއްޖޭގެ ބޭންކުތަކަށް ޑޮލަރު މާރު ކުރަން މަޖުބޫރުކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް ގެނައި ބަދަލަށް އަމަލު ކުރެވެން ނެތް ކަމަށް، ރާއްޖޭގެ ގިނަ ރިސޯޓުތަކުން އަންގަން ފެށުމުން، އެ ވިޔަފާރިވެރިންނަކީ ރައްޔިތުންނަށް ފައިދާއެއް ވާން ނޭދޭ ސިޔާސީ ބައެއް ކަމަށް ސިފަ ކުރައްވައި ވަރުގަދަ ބަހުގެ ހަމަލާއެއް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފި އެެވެ.

ވަކި ބައެއްގެ ނަން ފާހަގަ ނުކުރައްވައި ރައީސް މުއިއްޒު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ކުރިއަށް އޮތް ތަނުގައި ރައްޔިތުންނަށް ވަރަށް ސާފުވާނެ ކަމަށެވެ.

"ތަނަވަސްކަން ނެތް ރައްޔިތުންނަށް ފައިދާއެއް ވާން ނޭދޭ ސިޔާސީ ވެރީން ރައްޔިތުންނަށް ވަރަށް ސާފު ވާތަން ކުރިޔަށް އޮތް ތާނގައި އިތުރަށް ފެންނާނެ! މި ސަރުކާރު ކުރިޔަށްދާނީ ރައްޔިތުންގެ ފަޅީގައި އޮވެ ހުރިހާ ރައްޔިތުންނަށް އިންސާފުވެރިކަމާއެކު ތަނަވަސްކަން ހޯދައިދިނުމުގައި!" އެ މަނިކުފާނު ވިދާޅުވި އެވެ.

ރައީސްގެ އެ ޕޯސްޓާ ގުޅޭ ގޮތުން އިތުރު މައުލޫމާތު ހޯދުމަށް ސަރުކާރުގެ ތަރުޖަމާނު، ހީނާ ވަލީދުއަށް ގުޅައި މެސެޖު ކުރުމުން ޖަވާބެއް ނުދެއްވަ އެވެ.

މިިދިޔަ އޮކްޓޯބަރު 1، ގައި އެމްއެމްއޭއިން އިއުލާނު ކުރި ގަވާއިދުގައިވާ ގޮތުން ރާއްޖޭގެ ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުވެ އެވެ.

މި ގަވާއިދާ އެއްގޮތަށް ޑޮލަރު މާރު ނުކުރެވޭނެ ކަމަށް އެންގި ކުންފުނިތަކުގެ ތެރޭގައި ރައީސް ޑރ. މުހައްމަދު މުއިއްޒުގެ ޓޫރިޒަމް އެޑްވައިޒަރު މުހައްމަދު ހަލީލު މެނޭޖިން ޑިރެކްޓަރަކަށް ހުރި ޕަލްސް ކުންފުންޏާއި، އެމްޔޫ މުހައްމަދު އުމަރު މަނިކުގެ ޔުނިވާސަލް އަދި މުހައްމަދު މޫސާ (އުއްޗު)ގެ ރިސޯޓުތައް ހިމެނެ އެވެ.

ނަމަވެސް އެ ގަވާއިދަށް އަމަލު ނުކުރާނެކަން ރާއްޖޭގެ 50 އަށްވުރެ ގިނަ ރިސޯޓުގެ ވެރިން ވަނީ އެމްއެމްއޭއަށް އަންގައިފަ އެވެ. އޭގެތެރޭގައި ޔުނިވާސަލް ގްރޫޕާއި ޗަމްޕާ ބްރަދާސްގެ ރިސޯޓުތަކާއި ޕަލްސް ހޮޓެލްސް އެންޑް ރިސޯޓްސްގެ ރިސޯޓުތައް ހިމެނެ އެވެ.

ގުޅޭ ބައެއް ލިޔުންތައް