މިހާރު ކުރިއަށްދާ އެމްޑަބްލިއުއެސްސީ އިންޓަ ސްކޫލް އެތުލެޓިކްސް ޗެމްޕިއަންޝިޕްގެ 20 އަހަރުން ދަށުގެ އަންހެން 200 މީޓަރު ރޭސް ވެސް ޖަލާލުއްދީން ސްކޫލްގެ އަހުނާ ނިޒާރް ކާމިޔާބު ކޮށްފި އެވެ.

މި ފަހަރުގެ މުބާރާތުގެ އެންމެ ވާދަވެރި އެއް ކެޓަގަރީ އަކީ 20 އަހަރުން ދަށުގެ ދުވުމުގެ ކެޓަގަރީތަކެވެ. މީގެ ކުރިން މި މުބާރާތުގައި އަހުނާ ވަނީ 100 މީޓަރު ދުވުމުގެ ވެސް ރަން މެޑަލް ހޯދައިފަ އެވެ.

އިއްޔެ ކުރިއަށްދިޔަ އަންހެން 200 މީޓަރު ދުވުމުގެ ރަން މެޑަލް އަހުނާ ހޯދީ 25.88 ސިކުންތުން ރޭސް ނިންމައިގެންނެވެ. އަހުނާއާ އެންމެ ގާތުން، ދެ ވަނައިގައި ނިންމި ދާންދޫ ސްކޫލްގެ އާމިނަތު ލަޔާނާ މުހައްމަދު ރޭސް ނިންމީ 27.45 ސިކުންތުންނެވެ. އަދި ތިން ވަނަ އަށް ރޭސް ނިންމި އައްޑޫ ހައި ސްކޫލްގެ އާމިނަތު ޒަފާ ޒައިން ރޭސް ނިންމީ 28.55 ސިކުންތުންނެވެ.

މީގެ އިތުރުން އިއްޔެ ވަނީ 20 އަހަރުން ދަށުގެ ފިރިހެން 200 މީޓަރު ދުވުމުގެ ވެސް ފައިނަލް ހީޓުތައް ކުރިއަށް ގޮސްފަ އެވެ. ފިރިހެން ކެޓަގަރީގެ ރަން މެޑަލް ހޯދީ އައްޑޫ ހައި ސްކޫލްގެ އަހުމަދު އަބްސަލް މުހައްމަދު ޖަލީލް އެވެ. އޭނާގެ ޓައިމިން އަކީ 22.70 އެވެ. ދެ ވަނަ އަށް ދިޔަ އައިސަކް ޔައުބް ހަސަން ރޭސް ނިންމީ 23.57 . ސިކުންތުންނެވެ. އަދި ތިން ވަނަ އަށްދިޔަ ޖަލާލުއްދީން ސްކޫލްގެ އަހުމަދު ސައްމާހް އަލީ ރޭސް ނިންމީ 24.31 ސިކުންތުނެނެވެ.

މި ފަހަރުގެ މުބާރާތުގައި ކާމިޔާބު އެތުލީޓުންނަށް ބަލާއިރު، ގދ. އަތޮޅު ތައުލީމީ މަރުކަޒުގެ އަހްނަފު ރައްޔާން ވަނީ ވާދަކުރި އިވެންޓްތަކުން ރަން މެޑަލް ހޯދައިފަ އެވެ. އެއީ، 17 އަހަރުން ދަށުގެ ބައިން 100 މީޓަރާއި 200 މީޓަރު ދުވުމުގެ އިތުުރުން، ލޯންގް ޖަމްޕް އެވެ. މީގެ ތެރެއިން، 200 މީޓަރު ރޭސް، ރައްޔާން ކާމިޔާބުކުރީ، މީޓް ރެކޯޑަކާ އެކު އެވެ. އެ ގޮތުން، 200 މީޓަރު ރޭހުގައި ރައްޔާންގެ ޓައިމިން އަކީ، 23:12 ސިކުންތެވެ. ކުރިން ރެކޯޑް ހެދި ނާހިލް ނިޒާރުގެ ޓައިިމިން އަކީ، 23:25 ސިކުންތެވެ.