ޓްރީ ޓޮޕް ހޮސްޕިޓަލުން 2024 ގެ ދެވަނަ ހިތާނީ ކޭމްޕްގައި ރަޖިސްރީ ކުރުމަށް ހުޅުވާލައިފި އެވެ.

އެ ކޭމްޕުގައި ބައިވެރިވުމަށް ޝައުގުވެރިވާ ފަރާތްތަކަށް ނޮވެމްބަރު 10، އިން ފެށިގެން ޑިސެމްބަރު 27، ގެ ނިޔަލަށް ނަން ނޯޓުކުރުމުގެ ފުރުސަތު ވަނީ ހުޅުވާލައިފަ އެވެ.

Advertisement

ޓްރީ ޓޮޕުން ބުނީ އެ ކޭމްޕުގައި ހިދުމަތް ދިނުމަށް ހަމަޖެހިފައި ވަނީ އޮޕަރޭޝަނަށް ފަރުވާއަށް ހާއްސަ ޑޮކްޓަރުންނާއި، ކުޑަކަމުދާ ނިޒާމުގެ ހާއްސަ ޑޮކްޓަރުން ހިމެނޭ ގޮތަށް ތަޖުރިބާކާރު މެޑިކަލް ޓީމެކެވެ.

އެ ޓީމުގައި ހިމެނެނީ ޑރ. ހުސައިން ހަދީވް، ޑރ. އުކްތަމް އަބްދުއްލާޔެވް، ޑރ. މައުމޫން އާސިމް، ޑރ. އިބްރާހީމް މުއުމިން، ޑރ. މުހައްމަދު ޝަރީފް، ޑރ. އަބްދުﷲ އުބައިދު އަދި ކުޑަކަމުދާ ނިޒާމުގެ ހާއްސަ ޑޮކްޓަރު ޑރ. މެހްމެތު އޮޑަރެވެ.

ޓްރީ ޓޮޕްގެ ސީއީއޯ ޑރ. ސްރިވަސްތަން ސްރީދާރް ވިދާޅުވީ މި އަހަރުގެ ކުރީ ކޮޅު ހިތާނީ ކޭމްޕުތަކަށް ލިބުނު ތަރުހީބު މި އަހަރުގެ ޑިސެމްބަރުގައި ލިބޭނެ ކަމަށް އުއްމީދުކުރާ ކަމަށެވެ.

Advertisement

އަދި ހިތާނީ ކޭމްޕު ކުރިއަށް ގެންދާއިރު ކުދިންނާއި މައިންބަފައިންނަށް ހިތްހަމަޖެހޭ މާހައުލެއް ގާއިމުކުރުމަށް އިސްކަން ދޭ ކަމަށާއި އެންމެ ފުރިހަމައަށް ހިދުމަތްތައް ދިނުމަށް ޑޮކްޓަރުންގެ ޓީމެއް އެކުލަވާލާފައިވާކަން ވެސް އޭނާ ފާހަގަކުރެއްވި އެވެ.

ހިތާނީ ޕެކޭޖުގެ އަގު ކަނޑައަޅާފައިވަނީ 5,000ރ. އެވެ. މީގެ އިތުރުން، ކޮޓަރި އަޕްގްރޭޑް ކުރުމަށާއި ޕްރައިވެޓް ކޮޓަރިތަކަށް ހާއްސަ އަގުތަކެއް ވެސް ވަނީ ހަމަޖައްސާފަ އެވެ.

ޙިތާނީ ކޭމްޕްގައި ބައިވެރިވުމަށް އަދި އިތުރު މައުލޫމާތު ހޯދުމަށް ޓްރީ ޓޮޕްގެ 3351610 ނަންބަރަށް ގުޅުމަށް އެ ހޮސްޕިޓަލުން އެދެ އެވެ.