ބަންގްލަދޭޝްއިން އެ ގައުމުގެ ކުރީގެ ބޮޑުވަޒީރު ޝައިހް ހަސީނާ ހޯދަން އިންޓަޕޯލް ރެޑް ނޯޓިސްއަކަށް އެދެން އުޅޭ ކަމަށް އެ ގައުމުން އިއްޔެ ބުނެފި އެވެ.

ބަންގްލަދޭޝްގެ ސަރުކާރުން ބުނީ ހަސީނާގެ އިތުރުން ރެޑް ނޯޓިސް ނެރެން ނިންމާފައި ވަނީ އެ ގައުމުގައި މިދިޔަ އޯގަސްޓުގައި ކުރިއަށްދިޔަ މުޒާހަރާތަކުގައި ހިނގި ކަންތައްތަކަށް ޒިންމާވާ މީހުންނަށް ކަމަށެވެ.

ބަންގްލަދޭޝްގެ ވެރިކަން ވެއްޓުނީ މިދިޔަ ޖުލައިއިން ފެށިގެން ކުރަމުންދިޔަ މުޒާހަރާތައް ކޮންޓްރޯލުން ނެއްޓުމާ ގުޅިގެންނެވެ. އެގޮތުން ހަސީނާ ވަނީ އިސްތިއުފާ ދެއްވުމަށްފަހު ގައުމު ދޫކުރުައްވާ ފިއްލަވައިގެން އިންޑިއާއަށް ވަޑައިގެންފަ އެވެ.

ޔުނިވާސިޓީގެ ދަރިވަރުން އިސްވެ އެ މުޒާހަރާތައް ކުރަން ފެށީ، އަސްކަރިއްޔާގައި މަސައްކަތްކޮށްފައިވާ މީހުންގެ ދަރިންނަށް ވަޒީފާގެ ކޯޓާތައް ދޭ އުސޫލު ކުރިން އޮތް ގޮތަށް ރުޖޫއަ ކުރުމާ ގުޅިގެންނެވެ. އަދި މުޒާހަރާތައް ހޫނުވީ ފުލުހުންނާއި ބައެއް އިދިކޮޅު ސަޕޯޓަރުން ދިން ހަމަލާތަކުގައި މުޒާހަރާގެ ބައިވެރިންތަކެއް މަރުވުމާ އެކީގަ އެވެ.

"ޖުލައި އަދި އޯގަސްޓް މަހުގައި ހިނގި ހަމަނުޖެހުންތަކުގައި ގިނަ އަދަދެއްގެ ބަޔަކު މަރުވި ހާދިސާއާ ގުޅިގެން ޒިންމާވާ ފަރާތްތައް ހުރި ތަނަކުން އަނބުރާ ގައުމަށް ގެންނާނަން،" ބަންގްލަދޭޝްގެ އިންޓަރިމް ސަރުކާރުގެ ލޯ އެޑްވައިޒަރު އާސިފް ނަޒްރުލް ވިދާޅުވި އެވެ.

ބަންގްލަދޭޝްގައި ސަރުކާރާ ދެކޮޅަށް ކުރިއަށްދިޔަ މުޒާހަރާތަކުގައި ހިނގި ހަމަނުޖެހުންތަކުގައި 700 އަށްވުރެ ގިނަ މީހުން މަރުވެފައިވާ ކަމަށް ރިޕޯޓްތައް ބުނެ އެވެ.

އިންޓަޕޯލްއިން ރެޑް ނޯޓިސް ނެރެނީ ގައުމުތަކުން ހައްޔަރު ކުރުމުގެ އަމުރަކާ އެކު ނޯޓިސް ނެރެދިނުމަށް އެދުމުންނެވެ.