ބަންގްލަދޭޝްގެ ތާރީހުގައި ވެރިކަން ކުރެއްވި ފުރަތަމަ އަންހެން ބޮޑުވަޒީރު ހާލިދާ ޒިއާ އަވަހާރަވެއްޖެ އެވެ.

ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށް ފަހު ހާލިދާ އަވާހަރަވީ ރޭގެ ވަގުތެއްގަ އެވެ. މި އަހަރުގެ ކުރީކޮޅު ފަރުވާ ހޯދުމަށް ލަންޑަނަށް ވެސް ހާލިދާ ވަޑައިގަތެވެ. އެ ސިޓީގައި ހަތަރު މަސްދުވަހު ފަރުވާ ހޯއްދެވުމަށް ފަހު އަނބުރާ ގައުމަށް ވަޑައިގަތެވެ.

ހާލިދާ ސިޔާސީ މަސަައްކަތަށް ނުކުމެވަޑައިގެންނެވީ އެކަމަނާގެ ފިރިކަލުން އަދި 1981 ގައި ރައީސަކަށް ހުންނެވި ޒިއާއު ރަހުމާން ބަގާވާތެއްގައި އަވަހާރަކޮށްލުމުންނެވެ. އޭގެ ތިން އަހަރު ފަހުން ބަންގްލަދޭޝް ނެޝަނަލިސްޓު ޕާޓީ (ބީއެންޕީ) ގެ ލީޑަރަކަށް ވެވަޑައިގެންނެވި އެވެ.

އެއަށް ފަހު ބަންގްލަދޭޝްގެ ފައުންޑަރުގެ އަންހެން ދަރިފުޅު އަދި އަވާމީ ލީގުގެ ލީޑަރު ޝެއިހު ހަސީނާ އާއެކު މިލިޓަރީ ސަރުކާރު ބަދަލުކުރުމުގެ ހަރަކާތެއް ފެއްޓެވި އެވެ. އެ ހަރަކާތް ވަރުގަކޮށް އަސްކަރީ ވެރިކަމެއް ކުރަމުން އައި ހުސައިން މުހައްމަދުގެ ވެރިކަން 1990 ވައްޓާލި އެވެ.

ދެ ބޭފުޅުން މާ ގިނަ ދުވަހަކު އެކުގައި މަސައްކަތް ކުރެއްވޭ ގޮތެއް ނުވެ އެވެ. ހިޔާލު ތަފާތުވުންތަކާއެކު ދެ ލީޑަރުންގެ ވާދަވެރިކަން ބޮޑުވެ 1991 ގެ އިންތިހާބަށް ނުކުމެވަޑައިގަތެވެ. ގިނަ ބަޔަކު ހައިރާން ކޮށްލުމަށް ފަހު ބޮޑުވަޒީރަކަށް އިންތިހާބުވީ ހާލިދާ އެވެ.

އެކަމަނާގެ ދައުރުގައި ބަންގްލަދޭޝްގައި އޮތް ރިޔާސީ ނިޒާމު އުވާލައި ބަރުލަމާނީ ނިޒާމަކަށް ބަދަލުކުރެއްވި އެވެ. އޭގެ ފަހުން 1996 ގައި ހަސީނާއަށް ބާރުތައް ފުރޮޅިގެންދިޔައިރު އޭގެ ފަސް އަހަރު ފަހުން އަނެއްކާ ވެސް ހާލިދާ އިންތިހާބު ކާމިޔާބު ކުރެއްވި އެވެ. ހާލިދާއަށް ވެރިކަން ގެއްލުނީ 2006 ވަނަ އަހަރު އެވެ.

ހާލިދާ އާއި ހަސީނާގެ ވާދަވެރިކަން މަޝްހޫރުވެފައިވަނީ "ބެޓްލް އޮފް ބޭގަމްސް" ގެ ގޮތުގަ އެވެ.

އަންނަ ފެބްރުއަރީ މަހު އޮންނަ ބަންގްލަދޭޝްގެ މަޖިލިސް އިންތިހާބު ކާމިޔާބު ކުރާނެ ކަމަށް ބެލެވެނީ ހާލިދާގެ ބީއެންޕީ ޕާޓީންނެވެ.