އިސްލާމީ ވެރިކަންތަކުގެ ތެރެއިން ހިނގަމުން އޭރު ދިޔައީ ޚަލީފާ މުޢާވިޔާގެ ދުވަސްވަރެވެ. ހަމަ އެދަރިކޮޅުން ޚަލީފާއެއްކަމުގައި ވަޑައިގެންނެވި މަރްވާން ބުނުލްޙަކަމް އެދުވަސްވަރު ހުންނެވީ މުޢާވިޔާގެފާނުގެ ފަރާތްޕުޅުން އައްޔަންކުރެވިފައިވާ މަދީނާގެ ވެރިޔާގެ ގޮތުގައެވެ. މަރްވާންގެ ދަރުބާރަށް މީހަކު އައިސް މާތް ޞަޙާބީ ސަޢީދު ބިން ޒައިދުގެ މައްޗަށް ދައުވާއެއް އުފުލިއެވެ. އެ މީހާ މަރުވާނަށް ހުށަހެޅި ދައުވާގައި ބުނަނީ، މާތް ޞަޙާބީ ސަޢީދުގެފާނު އޭނާގެ ބިމެއް ފޭރިގަނެފައިވާކަމަށެވެ. އަދި އެމީހާ ބުންޏެވެ. ތިމަންނާ އަތުން ފޭރުނު ބިން ތިމަންނާއަށް ހޯދައިނުދީފިއްޔާ މަސްޖިދުއްނަބަވީއަށް އެންމެ ގިނައިން މީހުން އެއްވާ ގަޑިއެއްގައި އަޑުހަރުކޮށް ސަޢީދު ބިން ޒައިދުގެ މައްޗަށް މި ތުހުމަތުކޮށް ހަޅޭލަވަމުން ގެންދާނަމެވެ. މާތް ނަބިއްޔާގެ ޞަޙާބީއަކަށް އެގޮތަށް އުނދަގޫ ނުކުރުމަށް މަރްވާން ބިން ޙަކަމް ވިދާޅުވުމުން ވެސް އެމީހާ ކަން ކުރާނީ އެގޮތަށް ކަމަށް ބުނެ އިންޒާރުދިނެވެ.

ދެން މަރުވާންގެ އަމުރުފުޅަށް ސަޢީދު ބިން ޒައިދު ހާޒިރުކުރެވި ޖަވާބުދާރީވުމަށް ފުރުސަތުދެވުނެވެ. އެހިނދު ސަޢީދުގެފާނުން ވިދާޅުވިއެވެ. އޭނާ އެ ދައުވާކުރާ އެއްޗެއް އޭނާއަށް ދެއްވާށެވެ. އޭނާގެ ބިމުން ތިމަންކަލޭގެފާނު އެއްޗެއް އަތުލަންވީ، މާތް ނަބިއްޔާގެ އަރިހުން ތިމަންކަލޭގެފާނަށް އިވުނު އެއްޗެއް އިވުމަށްފަހުގައިހެއްޔެވެ؟ އެހިނދު ދެންނެވުނެވެ. މާތް ﷲ ގެ ރަސޫލާގެ އަރިހުން ކަލޭގެފާނަށް އިވިފައި އޮތީ ކޮން އެއްޗެއްހެއްޔެވެ؟ އެހިނދު ސަޢީދުގެފާނުން ވިދާޅުވިއެވެ. މާތް ﷲ ގެ ރަސޫލާ ހަދީސްކުރައްވަނިކޮށް ތިމަން އެއްސެވީމެވެ. އަނިޔާވެރިކަމުން ބިމަކުން ކައިވަތެއްގެ މިންވަރު އަތުލި މީހާ، ހަތްބިމާ ޖެހެންދެން އެއެއްޗެއް އެމީހެއްގެ ކަރުގައި އެޅުއްވޭހުއްޓެވެ." އެއަށްފަހު ދުއާފުޅެއް ކުރެއްވިއެވެ. "އޭ ހައްދަވާ ބޮޑުކުރެއްވި ކަލާކޮ! އެމީހާއީ ދޮގުވެރިއަކު ނަމަ، އެމީހާގެ ލޮލުގެ ފެނުން އަނދިރިކުރައްވައި، އޭނާ ނުހައްގުން އަތުލައިގަތް ބިމުގައި އޭނާ ގަތުލުކުރައްވާށިއެވެ."

ރިވާވެގެންވާގޮތުގައި ސަޢީދުގެފާނުގެ މައްޗަށް މިދޮގު ދައުވާ އުފުލި މީހާ މަރުވެދިޔައީ، އޭނާ ނުހައްގުން އެ އަތުލައިގެން ބިމުގައި އަމިއްލަ އަތުން ކޮނެފައި ހުރި ވަޅުގަނޑެއްގެ ތެރެއަށް ވެއްޓިއެވެ. އޭރު އޭނާގެ ދެލޯވަނީ އަނދިރިވެފައެވެ. އަނިޔާލިބިވަޑައިގަތް ސައީދުގެފާނުގެ ބަދު ދުއާގެ އަސަރުޖެހިގެންނެވެ. މިއީ ރައްކާތެރިވާންޖެހޭ ފަރުވާތެރިވާންޖެހޭ ނުރައްކާތެރި މައްސަލައެކެވެ. ޝައްކެތް ނެތެވެ. މާތް ޞަޙާބީ ދުޢާފުޅެއް ކުރެއްވީ އަނިޔާލިބުނު ފަރާތެއްގެ ގޮތުގައިކަމުން، އެއީ ބަދުދުއާކުރުން ހުއްދަ ހާލަތެއް ވެސްމެއެވެ.

މާތް ނަބިއްޔާ ހަދީސްކުރައްވާފައިވެއެވެ. "އަނިޔާވެރިކަމުން ބިމަކުން ކައިވަތެއްގެ މިންވަރު ދަމައިގަތަސް، މާތް ﷲ، ހަތްބިމުން އެއެއްޗެއް އޭނާގެ ކަރުގައި ޤިޔާމަތް ދުވަހު އަޅުއްވާހުއްޓެވެ." ޞަޙީޙް މުސްލިމްގައި އައިސްފައިވާ މި ހަދީސް އިބާރާތުގެ ތަފާތަކާއެކު އިމާމް ބުޚާރީ އޭނާގެ ފޮތުގައިވެސް ގެންނަވާފައިވެއެވެ. މިހަދީސްގެ ސައްހަކަމާމެދުގައި އެހެންކަމުން ހިލާފެއް ނެތެވެ. ހަދީސް އިލްމުވެރިންކުރެ އެންމެ މަޝްހޫރު ދެބޭކަލުން މިހަދީސްގެ ސައްހަކަންމައްޗަށް އިއްތިފާގުވާތީއެވެ. ދެން މި ހަދީސްގެ ޝަރަހައިގައި މަޝްހޫރު އިލްމުވެރިން ބަޔާންކުރައްވާފައިވާ ކަންކަމަށް ބަލާލާނަމެވެ.

އަނިޔާވެރިކަމުން ބިމަކުން ބަޔެއް ދަމައިގަތުމަކީ، ބިމެއް ހައްގުވެފައިވާ މީހެއްގެ ކިބައިން އެބިމެއް ނިގުޅައިގަތުމެވެ. އެކަން ކުރަނީ ފަރުދެއް ވިޔަސް ޖަމާއަތެއް ވިޔަސް ނުވަތަ މިނިސްޓަރަކު ކަމަށްވިޔަސް، މީހެއްގެ ހައްގު ބިމެއް އެމީހާގެ ނުރުހުމުގައި ހައްގަކާ ނުލައި އެމީހެއްގެ ކިބައިން އަތުލުމަކީ ނުވަތަ ނުލިބޭ ގޮތް ހެދުމަކީ، އަނިޔާވެރިކަމުން ބިމެއް އަތުލައިގަތުމެވެ.

އިލްމުވެރިން ބަޔާންކުރައްވާ ގޮތުގައި ހަދީސްގައި ކައިވަތެއްގެ ވާހަކަ އައިސްފައިވަނީ، ހައްގަކާ ނުލައި މީހެއްގެ ބިމެއް އަތުލައިގަތުމުގެ ނުބައިކަމާއި އެކަމުގެ ފާފައިގެ ބޮޑުކަން އިތުރަށް ބަޔާންކޮށްދެއްވުމުގެ ގޮތުންނެވެ. މާނައަކީ ބިމަކުން ކައިވަތެއްގެ މިންވަރު ވެސް މީހެއްގެ ކިބައިން ނިގުޅައިގަތުމުގެ ނުބައިކަން އެފަދައެވެ. އަދި އެކަން ކުރާ މީހާއާއި އެކަމުގައި ބައިވެރިވާ މީހުންގެ އަޒާބު އެފަދައެވެ. ވީއިރު މީހެއްގެ ބިން އެއްކޮށް ހައްގަކާ ނުލައި ނިގުޅައިގަތުމުގެ އަޒާބު އަދި ކޮންފަދަވާނެހެއްޔެވެ؟

"ހަތްބިމުން އެއެއްޗެއް އޭނާގެ ކަރުގައި އަޅުއްވާހުއްޓެވެ." މިގޮތަށް އޮތް ބަސްފުޅުގެ ޝަރަހައިގައި، ބައެއް އިލްމުވެރިން ވިދާޅުވަނީ އޭގެ މާނައަކީ ފޭރިގަތް މިންވަރެއްގެ ހަތްގުނަ އެމީހެއްގެ ކަރުގައި ގިޔާމަތްދުވަހުން އެޅުވޭނެ ވާހަކަކަމަށެވެ. އަދި ބައެއް އިލްމުވެރިން ވިދާޅުވާ ގޮތުގައި އޭގެ މާނައަކީ އެމީހަކު ގިޔާމަތް ދުވަހުން ހަތްބިމާ ޖެހެންދެން ގަންބަވައިގަންނާނެ ވާހަކައެވެ. އިމާމް ބުޚާރީ އޭނާގެ ފޮތުގައި މިމައުލޫގައި ގެންނަވާ އެހެން ހަދީސަކުން މިމާނަކުރުމަށް އިތުރު ކަށަވަރުކަމެއް ވެސް ލިއްބައިދެއެވެ. އެއީ އިބްނު ޢުމަރު ރިވާކުރެއްވިކަމަށް އޮންނަ ބަސްފުޅެވެ. އެބަސްފުޅުގައި އޮންނަނީ، ހައްގަކާ ނުލައި ބިމަކުން ތަންފުކެއް އަތުލައިފި މީހާ، ގިޔާމަތް ދުވަހުން އެއަތުލި ބަޔަކާއެކު ހަތްބިމާ ޖެހެންދެން ގަންބަވައިގަނެވޭހުއްޓެވެ.

އިބްނު ޢައްބާސްގެފާނު ރިވާކުރައްވާފައިވެއެވެ. މާތް ނަބިއްޔާ މުޢާޒްގެފާނު ޔަމަނުކަރައަށް އަމީރެއްގެ ގޮތުގައި ފޮނުއްވިއިރު، މުޢާޒްގެފާނަށް މާތް ނަބިއްޔާ ހަދީސްކުރެއްވިއެވެ. "އަނިޔާލިބޭ މީހާގެ ދުއާއާމެދު ރައްކާތެރިވާށެވެ! ފަހެ އެފަދަ ދުއާއާއި ﷲ އާ ދެމެދު އެއްވެސް ހުރަހެއް ނުވެއެވެ." އެހެން ބަސްފުޅެއްގައި ހަދީސްކުރައްވާފައިވެއެވެ. "ތިން ދުއާއަކީ އިޖާބަވެގެންވާނެ ދުއާއެވެ. އަނިޔާލިބޭ މީހާގެ ދުއާއާއި.." މިއެވެ. އަދި އަހުމަދު އޭނާގެ މުސްނަދުގައި ގެންނަވާފައި ހަދީސެއްގައިވެއެވެ. އަނިޔާލިބޭ މީހާއީ ކާފަރެއްކަމުގައި ވިޔަސް އޭނާގެ ދުއާއާއި ﷲ އާ ދެމެދު ހުރަހެއް ނުވެއެވެ. އިމާމް ޠަބަރާނީގެ ރިވާޔަތެއްގައިވެއެވެ. އަނިޔާލިބޭ މީހާގެ ދުއާއާމެދު މާތް ﷲ ވަހީކުރައްވާނެއެވެ. "ތިމަންކަލާނގެ އިއްޒަތާއި މަތިވެރިވަންތަކަން ގަންދެއްވަމެވެ. ކުޑަވަގުތުކޮޅެއް ފަހުންނަމަވެސް ތިބާއަށް ނަސްރުދެއްވާހުށީމެވެ."

އިބްރާހީމް ސޫރަތުގެ 42 ވަނަ އާޔަތުގައި މާތް ﷲ ވަހީކުރައްވާފައިވެއެވެ. "އަނިޔާވެރިން ކުރާ ކަންތަކާމެދު، ﷲ، ޣާފިލުވެ ވޮޑިގެންވާކަމަށް ކަލޭގެފާނު ހީފުޅުނުކުރައްވާ ހުށިކަމެވެ! އެކަލާނގެ އެއުރެން ފަސްކުރައްވާކަން ކަށަވަރީ (ކަންތައް ބޮޑުވެ) ލޯތައް ހުޅުވޭ ދުވަހަކަށެވެ."

ދެން އަންނަޙްލު ސޫރަތުގެ 90 ވަނަ އާޔަތެވެ. "ހަމަކަށަވަރުން ﷲ އަމުރުކުރައްވަނީ އަދުލުވެރިވުމަށާއި އިހުސާންތެރިވުމަށެވެ." އަދި އަލްމާއިދާ ސޫރަތުގެ 8 ވަނަ އާޔަތެވެ. "... އަދި ބަޔަކުމީހުންދެކެ ތިޔަބައިމީހުންގައި އުފެދިފައިވާ ރުޅިވެރިކަމެއް އެއީ، ތިޔަބައިމީހުން އަދުލުވެރި ނުވުމުގެ މައްޗަށް ބާރުއަޅާކަމެއް ކަމުގައި ނަހަދާށެވެ! ތިޔަބައިމީހުން އަދުލުވެރިވާށެވެ! އެގޮތް ތަގުވާވެރިކަމާ ގާތްކަން ބޮޑެވެ .."

މީހަކަށް ނުވަތަ ބަޔަކަށް ލިބިފައި އޮންނަ ބިންވެރިކަމުގެ ހައްގަށް އަރިގަތުމަކީ ކުޑަ ކަމެއް ނޫނެވެ. އެކަމަކީ އަނިޔާވެރިކަމެއްގެ ގޮތުގައި ސިފަކުރެވިފައިވާ އަދި އެކަމުން އަނިޔާލިބޭ މީހާ، އެކަމުގައި އަނިޔާވެރިވާ މީހާގެ މައްޗަށް ބަދުދުއާކުރުން ހުއްދަވާ ސަބަބެއްވެސްމެއެވެ. އަދި އެފަދަ ބަދުދުއާ އިޖާބަކުކުރައްވާނެކަމުގެ ކަށަވަރުކަން މާތް ނަބިއްޔާގެ ދޫފުޅުން އުންމަތަށް ތަކުރާރުކޮށް ހަބަރުކުރައްވާފައިވާ ކަމެއްވެސްމެއެވެ.

ހަމަ އެފަދައިން އިމާމް ޠަބަރާނީގެ ރިވާޔަތުގައިވާ ފަދައިން އަނިޔާލިބޭ އަޅާއަށް މާތް ﷲ ނަޞްރުދެއްވާނެކަމަށް އެކަލާނގެ އިއްޒަތާއި މަތިވެރިކަން ގަންދެއްވައި ވައުދުވެވޮޑިގަންނަވައެވެ. އެކަލާނގެ ހިކުމަތްވަންތަކަމަށްޓަކައި ވަގުތުކޮޅެއް ލަސްކުރެއްވިނަމަވެސް، އަނިޔާވެރިޔާއަށް ދުނިޔޭގައިވެސް އެކަމުގެ ބަދުނަސީބާއި ބަދުކަމާއި ނިކަމެތިކަން ނުޖެހި ނުދާނެކަމީ ޝައްކެތް އޮތްކަމެއް ނޫނެވެ.