ޑިފެންސް މިނިސްޓަރު ޣައްސާން މައުމޫން ރަޝިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ލިވާން ޒަގަރްޔާންއާ ބައްދަލު ކުރައްވައިފި އެވެ.

އެ ބައްދަލު ކުރެއްވުމުގައި ދެ ގައުމުގެ ގުޅުމުގެ މައްޗަށް އަލިއަޅުވާލައި، ދެ ގައުމުގެ ވެސް މަސްލަހަތު ހިމެނޭ ކަންކަމާ ގުޅޭ ގޮތުން މަޝްވަރާ ކުރި އެވެ.

އެ ބައްދަލު ކުރެއްވުމުގައި ރާއްޖެއަށް ރަޝިއާގެ ގިނަ ފަތުރުވެރިން ޒިޔާރަތް ކުރާތީ އިގްތިސާދަށް ފައިދާ ކުރާ ކަމަށް ޣައްސާން ފާހަގަ ކުރެއްވި އެވެ.

ރަޝިއާ ސަފީރު ވަނީ ރާއްޖެއަކީ ރަޝިއާ ރައްޔިތުންގެ މެދުގައި މަގުބޫލު ފަތުރުވެރިކަމުގެ މަންޒިލެއްކަން ފާހަގަ ކުރައްވައި، އެކި ގޮތް ގޮތުން ރާއްޖެއަށް އެހީތެރިކަން ދޭން ބޭނުންވާ ކަމަށް ވިދާޅުވެފަ އެވެ.

ޣައްސާންގެ އިތުރުން ޑިފެންސް މިނިސްޓަރުގެ ނައިބު މިޒްނާ އަލީ ވެސް ވަނީ ލިވާންއާ ބައްދަލު ކުރެއްވައި، މަޝްވަރާތަކެއް ކުރައްވާފަ އެވެ.

އޭގެ އިތުރުން، ރަޝިއާ ސަފީރު ވަނީ ފޮރިން މިނިސްޓްރީގެ ސެކްރެޓަރީ ބައިލެޓަރަލް، ޑރ. ހާލާ ހަމީދުއާ ވެސް ބައްދަލު ކުރައްވައި ދެ ގައުމުގެ ގުޅުން ބަދަހި ކުރުމަށް މަޝްވަރާ ކުރައްވާފަ އެވެ.