ހިޒްބުﷲ ގެ ލީޑަރުކަމާ ހަވާލުވާނެ ކަމަށް ބެލެވުނު ހާޝިމް ސަފީއުއްދީން މި މަހު ކުރީކޮޅު މަރާލާފައިވާ ކަމަށް އިޒްރޭލުން އިއުލާން ކޮށްފި އެވެ.

އިޒްރޭލުން ބުނީ ހާޝިމް ސަފީއުއްދީން މަރާލީ ލުބްނާނަށް ދިން ވައިގެ ހަމަލާއެއްގައި ކަމަށާއި އެ ހަމަލާގައި އޭނާގެ އިތުރުން ހިޒްބުﷲ އަށް ނިސްބަތްވާ ބައެއް މީހުން ވެސް މަރުވި ކަމަށެވެ.

ނަމަވެސް ހާޝިމް ސަފީއުއްދީން މަރުވިކަން ހިޒްބުﷲ އިން މިހާތަނަށް ކަށަވަރު ކޮށްދީފައެއް ނުުވެ އެވެ.

ހިޒްބުﷲ ގެ ކުރީގެ ލީޑަރު ހަސަން ނަސްރަﷲ އާ އާއިލީ ގޮތުން ގުޅުން އޮތް ހާޝިމް ސަފީއުއްދީންއާ މި މަހު ކުރީ ކޮޅުން ފެށިގެން ހިޒްބުﷲ އަށް ގުޅޭ ގޮތް ނުވާ ކަމަށް ރިޕޯޓްތައް ދިޔައީ ބުނަމުންނެވެ.

އުމުރުން 60 އަހަރުގެ ހާޝިމް ސަފީއުއްދީން އަކީ ހިޒްބުﷲ ގެ އެގްޒެކެޓިވް ކައުންސިލްގެ ހެޑެވެ. އޭނާ ދިޔައީ އެ ޖަމާއަތަށް އެކި ގޮތްގޮތުން ހިދުމަތް ކުރަމުންނެވެ.

އިޒްރޭލުން ހިޒްބުﷲ ގެ ލީޑަރު ހަސަން ނަސްރަﷲ މިދިޔަ ސެޕްޓެމްބަރު މަހު ފަހުކޮޅު އަވަހާރަކޮށްލުމާ ގުޅިގެން އެ ޖަމާއަތުގެ ލީޑަރުގެ މަގާމު ވަނީ ހުސްވެފަ އެވެ. މިހާތަނަށް ލީޑަރުކަމާ ހަވާލުވާނީ ކާކު ކަމެއް ހާމަކޮށްފައެއް ނުވެ އެވެ.

އިޒްރޭލުން ދަނީ ލުބްނާނުގެ ހިޒްބުﷲ ގެ އިތުރުން ގާޒާގެ ހަމާސްއާ ދެކޮޅަށް ވަރުގަދަ ހަމަލާތައް ދެމުންނެވެ. އެ ހަމަލާތަކުގައި މަރުވާ އާންމުންގެ އަދަދު ކަންބޮޑުވާ ދަރަޖައަށް އިތުރުވެ، މެދުއިރުމަތީގައި ހަމަނުޖެހުންތައް ވަނީ ވަރަށް ބޮޑުވެފަ އެވެ.