ބުޅާމަސް އަޅައިގެން ކާތަކެތި ތައްޔާރުކުރި ކަމުގެ އެއްވެސް ހެއްކެއް ނުފެނުމުން ތަހުގީގު ނިންމާލައި އެ މައްސަލައިގެ ތުހުމަތުގައި ހައްޔަރުކުރި އަރަފާތު ހޮސެއިން، 32، ރާއްޖެއިން ޑީޕޯޓު ކޮށްލައިފި އެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ މިހާތަނަށް ކުރި ތަހުގީގުން ބުޅާމަސް އަޅައިގެން އެއްވެސް ކާއެއްޗެއް އަރަފާތު ތައްޔާރުކުރި ކަމުގެ ހެއްކެއް ނުފެންނަ ކަމަށެވެ. އަދި، އޭނާ ޑީޕޯޓު ކޮށްފައި ވަނީ އިމިގުރޭޝަނާ ހަވާލުކުރުމުން އެ އިދާރާއިން ކަމަށް ފުލުހުން ބުންޏެވެ.
"މައްސަލައިގައި ހައްޔަރުކުރި މީހާގެ މައްޗަށް ޖިނާއީ ތަހުގީގެއް ހިންގޭ ވަރަށް ހެކި ގަރީނާ ލިބިފައި ނުވާތީ އެ މައްސަލައިގައި ފުލުހުން ކުރަމުންދިޔަ ތަހުގީގު ވަނީ ނިންމާލާފައި، މައްސަލައިގެ ތުހުމަތުގައި ހައްޔަރުކުރި މީހާ ފުލުހުން އިމިގުރޭޝަނާ ހަވާލު ކުރުމުން އެމީހާ ވަނީ ޑީޕޯޓު ކޮށްފައި،" ފުލުހުން ފޮނުވި މެސެޖުގައި ބުނެފައިވެ އެވެ.
ގ. ރަނައުރާގޭއާގޭ ގޯޅިގަނޑު ތެރޭގައި އަރަފާތު ހިންގަމުންދިޔަ ބަދިގޭގައި ބުޅާ ގެންގުޅޭ ކަމަށް ތުހުމަތު ކުރީ އެ ގޭގެ އެހެން ބައިބައިގައި ދިރިއުޅޭ މީހުންނެވެ. އެމީހުން ތުހުމަތު ކުރީ އެތަނުގައި އަރަފާތު އަބަދުވެސް ބުޅާ ގެންގުޅޭ ކަމަށެވެ.
އެ ބަދިގެއަށް އިމިގުރޭޝަން އޮފިސަރުން ވަދެ، އެތަން ބަންދު ކުރީ ގަވާއިދާ ހިލާފަށް ރާއްޖޭގައި ވިޔަފާރި ކުރާ ބިދޭސީން ހޯދުމަށް ކުރިއަށް ގެންދާ އޮޕަރޭޝަނުގެ ތެރެއިންނެވެ. ނަމަވެސް ބުޅާމަސް އަޅައިގެން އެއްވެސް ކާއެއްޗެއް އޭނާ ތައްޔާރުކުރި ކަމުގެ ހެއްކެއް އޭރު ވެސް ފެނިފައި ނުވާ ކަމަށް ފުލުހުން ބުންޏެވެ.
ނަމަވެސް އާންމުން ކުރަމުންދިޔަ ޝަކުވާތަކާއި ބުޅަލުގެ ހައްގުގައި މަސައްކަތް ކުރާ ޖަމިއްޔާތަކުން ސޯޝަލްމީޑިއާގައި ފާޅުކުރަމުންދިޔަ ކަންބޮޑުވުންތަކާ ގުޅިގެން ބުޅާމަސް އަޅައިގެން އެއްވެސް ކާއެއްޗެއް ތައްޔާރުކުރިތޯ ބަލަން އެތަނުން ސާމްޕަލް ނަގައި ތަހުގީގު ފެށީ އެވެ.
އެކަމާ ގުޅިގެން ހޯމް މިނިސްޓަރު، އަލީ އިހުސާން މީގެ ކުރިން ވިދާޅުވީ އަރަފާތުގެ ބަދިގެއިން ސާމްޕަލް ނެގި ނަމަވެސް އޭނާ ހައްޔަރު ކޮށްފައި ހުރީ ވިސާގެ މައްސަލައެއްގައި ކަމަށެވެ.
