މި އަހަރުގެ ބާ އިމްތިހާން 183 ކެންޑިޑޭޓުންނާއެކު ބާ ކައުންސިލުން މިއަދު ވިލާ ކޮލެޖުގައި ބާއްވައިފި އެވެ.

ބާ ކައުންސިލުން ބުނީ 190 ކެންޑިޑޭޓުންނަށް ހުޅުވާލި ބާ އިމްތިހާނުގައި 183 ކެންޑިޑޭޓުން ބައިވެރިވެފައިވާއިރު، 2022 ގައި ތައާރަފްކުރި އެ އިމްތިހާނުގައި މިހާތަނަށް ޖުމްލަ 505 ކެންޑިޑޭޓުން ބައިވެރިވެފައިވާ ކަމަށެވެ.

މި އަހަރުގެ އިމްތިހާނުގައި ކޮންޓްރެކްޓް ލޯ އެންޑް ޕްރެކްޓިސް، ކްރިމިނަލް ލޯ އެންޑް ޕްރޮސީޖާ، ލޭންޑް ލޯ އެންޑް ޕްރެކްޓިސް، ކޮންސްޓިޓިއުޝަނަލް އެންޑް އެޑްމިނިސްޓްރޭޓިވް ލޯ، ޓޯޓް ލޯ އަދި މޯލްޑިވިއަން ލީގަލް ސިސްޓަމްއިން އިނގިރޭސި އަދި ދިވެހި ބަހުން 120 "މަލްޓިޕަލް-ޗޮއިސް" ސުވާލު ހިމެނުނެވެ.

ބާ އިމްތިހާނުގެ ސިލަބަސް އެކުލަވާލާފައި ވަނީ ރާއްޖޭގެ ގާނޫނީ ދާއިރާގައި މަސައްކަތް ކުރާ ތަޖުރިބާކާރު ގާނޫނީ ވަކީލުންނާއި، ގާނޫނީ ތައުލީމު އުނގަންނައިދޭ ބޭފުޅުންގެ އަދި ފަނޑިޔާރުން ހިމެނޭ ގޮތަށް އެކުލަވާލާފައިވާ ބާ އިމްތިހާނުގެ "ކޮމިޓީ އޮފް އެކްސްޕާޓްސް" އިންނެވެ.

ބާ އިމްތިހާނަކީ ރާއްޖޭގެ ގާނޫނީ ހިދުމަތް ދިނުމަށް ބޭނުންވާ އެންމެ އަސާސީ ގަނޫނީ އިލްމާއި ހުނަރު އަދި އަލަށް ނުކުންނަ ގާނޫނީ ވަކީލުންގެ ކިބައިގައި ހުރިކަން ކަށަވަރު ކުރުމަށާއި ފެންވަރު ވަޒަން ކުރުމަށް ދެވޭ ގާނޫނީ ދާއިރާއަށް ގުޅުމަށް ބޭނުންވާ އިމްތިހާނެވެ.

އެ އިމްތިހާނުން ފާސްވުމަކީ ރާއްޖޭގައި ގާނޫނީ ވަކީލަކަށްވުމަށް ކަނޑައަޅާފައިވާ ތިން އަސާސީ ޝަރުތުގެ ތެރޭގައި ހިމެނޭ އެއް ޝަރުތެވެ.

ގަނޫނީ ވަކީލުކަމުގެ ހުއްދަ ހޯދުމަށް ބޭނުންވާ ފުރަތަމަ ޝަރުތަކީ ބާ ކައުންސިލުން ގަބޫލު ކުރާ ގާނޫނީ ދާއިރާގެ ފުރަތަމަ ޑިގްރީ ހާސިލު ކުރުމެވެ. ދެވަނަ ޝަރުތަކީ ގާނޫނީ ދާއިރާގެ އަމަލީ ތަޖުރިބާ ހޯދުމަށް ފުރިހަމަ ކުރަން ޖެހޭ ލައިންސަންސިން ތަމްރީނެއް ފުރިހަމަ ކުރުމެވެ.