ޖިންސީ ގޯނާގެ މައްސަލައެއްގައި މާފުށީ ޖަލުގައި ބަންދުކޮށްފައި ހުރި ދިވެއްސަކު މިއަދު އަމިއްލައަށް މަރުވެއްޖެ އެވެ.

ސަރުކާރުގެ އޮފިޝަލަކު "އަދަދު" އާ ވާހަކަ ދައްކަވަމުން ވިދާޅުވީ 62 އަހަރުގެ އެ މީހާ އަމިއްލައަށް މަރުވީ ބެޑްޝީޓެއް ބޭނުން ކޮށްގެން ދަން ޖެހިގެން ކަމަށެވެ.

"އެ ގޮޅީގައި އުޅުނީ އޭނާ އެކަނި. މަރުވީ ބެޑްޝީޓެއް ބޭނުން ކޮށްގެން. އެ މައްސަލައިގައި ބަލަން ޖެހޭ ކަންކަން މިދަނީ ބަލަމުން،" އޮފިޝަލު ވިދާޅުވި އެވެ.

މި ނޫހަށް އެނގިފައިވާ ގޮތުގައި މަރުވި އެ މީހާ ޝަރީއަތް ނިމެންދެން ބަންދުކޮށްފައި ހުރީ 15 އަހަރުގެ އަންހެން ކުއްޖަކަށް ޖިންސީ ގޯނާ ކުރި ކަމަށް ތުހުމަތު ކުރެވޭ މައްސަލައެއްގަ އެވެ.

އުސޫލުގެ ތެރެއިން ޖަލުގައި މަރުވާ ކޮންމެ މީހެއްގެ އޮޓޮޕްސީ ހަދާނެ ކަމަށް ހޯމް މިނިސްޓަރު އަލީ އިހުސާން ކުރިން ވަނީ ވިދާޅުވެފަ އެވެ. އެހެންކަމުން މިއަދު މަރުވި މީހާގެ އޮޓޮޕްސީ ވެސް ހަދާނެ ކަމަށް ބެލެވެ އެވެ.

ފުލުހުންގެ ބެލުމުގެ ދަށުގައި ހުއްޓާ އަމިއްލައަށް މަރުވާން މަސައްކަތްކޮށްގެން ފަރުވާ ދެމުން ދަނިކޮށް ސެޕްޓެމްބަރު 2، ގައި އާދަމް އަތުހަރު، 32، މަރުވި އެވެ. އޭނާގެ ހަށިގަނޑުގެ އޮޓޮޕްސީއެއް ހެދުމަށްފަހު މަރުވީ ދަންޖެހިގެން ކަމަށް ވަނީ ކަނޑައަޅާފަ އެވެ.