އަންނަ އޮކްޓޯބަރު 1، ގައި ދިރާގަށް 36 އަހަރު ފުރުމާ ކައިރިކޮށް 1.6 މިލިއަން ރުފިޔާގެ އަގުހުރި "މެޖެލަން 32" ސްޕީޑް ބޯޓެއް ލިބޭ ޕްރޮމޯޝަނެއް އެ ކުންފުނިން މިއަދު ފަށައިފި އެވެ.

އަލްޝާލީ މެރިން މޯލްޑިވްސްގެ އެ އުފެއްދުން ނަސީބުވެރި ފަރާތަަށް ދިނުމަށް ހަމަޖެހިފައި ވަނީ ޔަމަހާގެ އޮތޮރައިޒްޑް ޑިސްޓްރިބިއުޓާ އެލިއާއިން ފޯރުކޮށްދޭ 175 ހޯސްޕަވާގެ ދެ އިންޖީނާއެކުގަ އެވެ.

"ކަނޑު އުޅަނދެއް ހޯދުމުގެ ފުރުސަތު ކަސްޓަމަރުންނަށް ހުޅުވާލީ އެކި ކަންކަމަށް އޭތި ބޭނުން ކުރެވޭނެތީ. ޕްރޮމޯޝަން ފަރުމާކުރީ ވީހާވެސް ގިނަ ކަސްޓަމަރުންނަށް ބައިވެރިވެވޭ ގޮތަށް. އެގޮތުން މިފަހަރު ޕްރިޕެއިޑް ކަސްޓަމަރުންނަށް ވެސް ބައިވެރިވެވޭނެ،" ދިރާގުގެ ޑިރެކްޓާ، ބްރޭންޑް އެންޑް މާކެޓިން ކޮމިއުނިކޭޝަންސް މުހައްމަދު މިރްޝާން ހަސަން ވިދާޅުވި އެވެ.

ދިރާގުގެ ކަސްޓަމާ ވެލިއު މެނޭޖާ ހައްސާން ހުސްނީ ވިދާޅުވީ ޕްރޮމޯޝަންގައި ޕޯސްޓްޕެއިޑްގެ 400ރ. އަށްވުރެ މަތީ ޕެކޭޖް ނަގާ ކަސްޓަމަރުންނާއި، ކޮންމެ މަހަކު 400ރ. އަށްވުރެ މަތިން ހޭދަކުރާ ޕްރިޕެއިޑް ކަސްޓަމަރުންގެ އިތުރުން ފައިބާ ބްރޯޑްބޭންޑްގެ 30 އެމްއަށް ވުރެ ގިނައިން ނަގާ ކަސްޓަމަރުންނަށް ބައިވެރިވެވޭނެ ކަމަށެވެ.

އޭގެއިތުރުން ޕްރޮމޯޝަންގެ މުއްދަތުގައި ކޮންމެ މަހަކު ދިރާގުގެ އެހެން ކަސްޓަމަރުންނަށް ވެސް އަގުހުރި އެހެން އިނާމުތައް ލިބޭނެ މަގު ފަހިކޮށްދީފައިވާކަން ފާހަގަކުރައްވާ ހައްސާން ވިދާޅުވީ އެ ޕްރޮމޯޝަންތަކަށް މެގަ ޕްރޮމޯޝަނަށް އެންރޯލްވާ ކަސްޓަމަރުން އޮޓޮމެޓިކުން ބައިވެރިވެވޭނެ ކަމަށެވެ.

އެގޮތުން, ހާއްސާން ވިދާޅުވީ 400ރ. އަށްވުރެ ދަށް ޕޯސްޓްޕެއިޑް ޕެކޭޖް ނަގާފައި ތިބި ކަސްޓަމަރުންނާއި، 200ރ. އާއި 400ރ. އާ ދެމެދު ހޭދަކުރާ ޕްރިޕެއިޑް ކަސްޓަމަރުންގެ އިތުރުން ފައިބާ ބްރޯޑްބޭންޑްގެ 30 އެމްއަށްވުރެ ދަށް ޕެކޭޖް ނަގާފައިވާ ކަސްޓަމަރުންނަށް ކޮންމެ މަހަކު އިނާމު ލިބޭ ޕްރޮމޯޝަންގައި ބައިވެރިވެވޭނެ ކަމަށެވެ.

އެ ޕްރޮމޯޝަންގެ ދަށުން ލިބޭ އިނާމުތަކުގެ ތެރޭގައި މިނީ ޑްރޯން، ފްރީ ޑައިވިން ވޮޗް، އެންމެ ފަހުގެ ގޯޕްރޯ އަދި ސްޕީޑް ބޯޓާ ގުޅުވާފައި ވެސް ބައެއް ސާމާނު ހިމެނޭ ކަމަަށް އޭނާ ވިދާޅުވި އެވެ.

މިރްޝާން ވިދާޅުވީ ސްޕީޑް ބޯޓް ލިބޭ ޕްރޮމޯޝަންގައި ބައިވެރިވުމުގެ ފުރުސަތު ޑިސެމްބަރު 31، ގެ ނިޔަލަށް ކުރިއަށްދާއިރު ޕްރޮމޯޝަންގެ ގުރު ނެގުން އޮންނާނީ އަންނަ އަހަރުގެ ޖެނުއަރީގެ ތެރޭގައި ކަމަށެވެ.

ޕްރޮމޯޝަންގެ ދަށުން ލިބޭ "މެޖެލަން 32" އަކީ މިދިޔަ އަހަރު ރާއްޖޭގެ މާކެޓަށް ނެރުނު މަސްވެރި ކަމަށާއި އެކްސްކާޝަންތަކަށް ހާއްސަ 32 ފޫޓުގެ ބޯޓެކެވެ.

ފެނަށް ތިލަކޮށް 12 މީހުންގެ ޖާގައަށް ފަރުމާ ކޮށްފައިވާ އެ ބޯޓުން ފަސޭހަކަމާއެކު ސޭންޑް ބޭންކްތަކަށް ދިޔުމުގެ އިތުރުން ފާހާނާގެ އިތުރުން ކެބިންއެއް ވެސް ހުރެ އެވެ. އަދި ލުއި ބައެއް ކާނާތައް ވެސް އެ ބޯޓުގައި ތައްޔާރު ކުރެވެ އެވެ.

އެ ބޯޓު ޕްރޮމޯޝަނުގެ ނަސީބުވެރިޔާއަށް އިންޖީނާއެކުއެކު ދޭއިރު އެލިއާއިން ބުނީ ވޮރެންޓީ ހިމެނޭ މުއްދަތުގައި އިންޖީނަށް ދިމާވާ ކޮންމެ ކަމަކަށް އެ ކުންފުނިން ޒިންމާ ނަގާނެ ކަމަށެވެ.