ފާއިތުވެދިޔަ ދުވަސްތަކުގައި ފުލުހުންގެ މުއައްސަސާއަށް ލިބުނު ކުރިއެރުމާއެކު، އެ މުއްސަސާ ފަހަތަށް ސޮއްސައިނުލުމަކީ މުހިއްމު ކަމެއް ކަމަށް ކުރީގެ ކޮމިޝަނާ އޮފް ޕޮލިސް މުހައްމަދު ހަމީދު މިއަދު ވިދާޅުވެއްޖެ އެވެ.

ފުލުހުންގެ ހިދުމަތުގެ ދުވަހުގެ މުނާސަބަތާ ގުޅުވައި "އެކްސް" ގައި ކުރެއްވި ޕޯސްޓެއްގައި ހަމީދު ވިދާޅުވީ ޒަމާނީ ޕޮލިސިން އުސޫލުތަކަށް ފުލުހުން ބޯ ލަނބައި ރައްޔިތުންގެ އިތުބާރު ދެމެހެއްޓުމުގައި ދެމި ތިބެން ޖެހޭ ކަމަށެވެ.

"އެ މުއައްސަސާއަށް ބޮޑެތި ކުރިއެރުންތަކެއް ލިބިފައިވާއިރު، މިއަދު އެއަށްވުރެ ބޮޑަށް ފަހަތަށް ނުޖެހުމަކީ ވަރަށް މުހިންމު ކަމެއް،" ފުލުހުންގެ ހިދުމަތުން ރިޓަޔާ ކުރައްވާފައިވާ ހަމީދު ވިދާޅުވި އެވެ.

ފުލުހުންގެ ހިދުމަތުގެ ދުވަހުގެ ތަހުނިޔާ އޭނާ އެންމެހައި ފުލުހުންނަށް ވިދާޅުވި އެވެ.

ފުލުހުންގެ ހިދުމަތުން ޝަރަފްވެރިކަމާއެކު ހަމީދު ރިޓަޔާ ކުރެއްވީ މިދިޔަ އަހަރުގެ ނޮވެމްބަރު މަހުގެ ތެރޭގަ އެވެ.

ރާއްޖެއަކީ ކުށް މަދު އަމާން ތަނެއްގެ ގޮތުގައި ހެދުމަށް ފުލުހުން ކުރަމުންގެންދާ މަސައްކަތަކުގައި އަބަދުވެސް އެންމެ ކުރީ ސަފުގައި ހުންނަވާނެ ކަމަށް ރިޓަޔާ ކުރެއްވި ދުވަހު ހަމީދު ވިދާޅުވި އެވެ.