ތިލަފުށީގައި ހުރި މެރިންޑޯ މެރިންވޯކްސް ވޯކްޝޮޕުގައި ރޯވިއިރު، އެތެރޭގައި ތިބި ހުރިހާ އެންމެން ރައްކާތެރިކަމާއެކު ބޭރަށް ނުކުމެފައިވާ ކަމަށް އެ ކުންފުނިން ބުނެފި އެވެ.

މެރިންޑޯގެ އޮފިޝަލަކު "އަދަދު" އަށް ބުނީ ވޯކްޝޮޕުގައި ރޯވިއިރު، އެތެރޭގައި 30 މުވައްޒަފުން ތިބި ކަމަށެވެ. ނަމަވެސް އެ ހުރިހާ އެންމެން މިހާރު ރައްކާތެރިކަމާއެކު ބޭރަށް ނުކުމެފައިވާ ކަމަށް އޭނާ ބުންޏެވެ.

އެތަނުގެ ތެރޭގައި ތިބި މުވައްޒަފުންގެ ތެރެއިން އެކަކު ސަލާމަތްވާން، 15 ވަރަކަށް ފޫޓު އުސް ބެލްކަންޏަކުން ފުންމާލި ކަމަށް މަންޒަރު ދުށް މީހަކު ބުންޏެވެ.

އެ ވޯކްޝޮޕުގައި ރޯވެފައިވާ އަލިފާންގަނޑު ނިވައިލުމުގެ މަސައްކަތް ސިފައިން ދަނީ ކުރަމުންނެވެ.

ގުޅީފަޅުގައި ތިބި ބައެއް މީހުން "އަދަދު" އަށް މައުލޫމާތު ދިން ގޮތުގައި އެ ސަރަހައްދުން ކަޅު ދުމާ އެކީ އެއްޗެހި ގޮވާ އަޑު ވެސް އެބަ އިވެ އެވެ. ރޯވި ތަނުގައި ހުރީ ކޮން އެއްޗެއް ކަމެއް އަދި ނޭނގެ ނޫނެވެ.

ތިލަފުށީގައި އިންޑަސްޓްރިއަލް ގިނަ މަސައްކަތްތަކެއް ހިނގަ އެވެ. އަދި، ނުރައްކާތެރި އެތައް ކެމިކަލްތަކާއި ތަފާތު އެކި މައުދަންތައް އެ ރަށުގެ ގުދަންތަކުގައި ރައްކާކޮށްފައި ހުރެ އެވެ.

މީގެ ކުރިން ވެސް ތިލަފުށީގައި އަލިފާނުގެ ހާދިސާތައް ހިނގައި އެކި ވަރުގެ ގެއްލުންތައް ލިބިފައިވެ އެވެ. މިދިޔަ ޖޫންގައި ވެސް އެފަދަ ހާދިސާއެެއް ހިނގައި، "ރާއްޖެ ލޮޖިސްޓިކްސް" ގުދަނުގައި ހުރި ގިނަ ސާމާނު ވަނީ ބޭނުންނުކުރެވޭ ވަރަށް ހަލާކުވެފަ އެވެ.