ސަރުކާރުގެ ކުންފުނިތައް ބަލަހައްޓާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އަށް އޮޅިގެން، އެމްޓީޑީސީގެ ޗެއާމަން، އަބްދުﷲ ފާއިޒު އެ މަގާމުން ވަކިކުރެވިއްޖެ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުން ފެށިގެން އެމްޓީސީޑީގެ ޗެއާމަންގެ މަގާމުގައި ހުންނެވި ފާއިޒު ވަކިކޮށްފައި ވަނީ ބުރާސްފަތި ދުވަހު އެވެ. އެ ސިޓީގައި ސޮއި ކުރައްވާފައި ވަނީ ޕީސީބީގެ ރައީސް ހަމްދީ އަގީލެވެ.

މަގާމުން ވަކިކުރިކަން އެންގި ސިޓީ އިއްޔެ މެންދުރު އެމްޓީޑީސީގެ އިސްވެރިންގެ ވަޓްސްއަޕް ގްރޫޕަށް ހިއްސާ ކުރެއްވުމަށް ފަހު އެ ގްރޫޕު ދޫކުރައްވައި ފާއިޒު ނުކުމެވަޑައިގަތެވެ. ނަމަވެސް މިއަދު ޕީސީބީން އެންގީ ފާއިޒު ވަކިކުރީ އޮޅުމަކުން ކަމަށެވެ.

ކުއްލި އަކަށް އެފަދަ ސިޓީއެއް ލިބުމުން އެމްޓީޑީސީން ޕީސީބީއާ މުއާމަލާތް ކުރި އެވެ. އެ މައުލޫމާތު އެނގޭ މީހަކު ބުނީ ފާއިޒު މަގާމުން ވަކިކުރެވުނީ ދިމާވި ޓެކްނިކަލް މައްސަލައަކުން ކަމަށާއި "އެހެން ކަމުން އެމްޓީޑީސީގެ ބޯޑުގެ ޗެއާމަން އަކަށް އަދިވެސް ހުންނަވާނީ އަބްދުﷲ ފާއިޒު" ކަމަށެވެ.

ފާއިޒު މަގާމަށް އަލުން އައްޔަން ކުރިކަމުގެ ލިޔުން މާދަމާ ފޮނުވާނެ ކަމަށް ދެންނެވި ކަމަށް އެމްޓީޑީސީގެ އޮފިޝަލަކު ވިދާޅުވިވެ އެވެ.

އެމްޓީޑީސީގެ ބޯޑު މެންބަރެއްގެ ގޮތުގައި އޭނާ އައްޔަން ކުރެވުނީ ފެބްރުއަރީ 6، 2019 ގަ އެވެ. އެއަށް ފަހު ބޯޑުގެ ޗެއާމަން އަކަށް އައްޔަން ކުރީ ފެބްރުއަރި 13، 2019 ގަ އެވެ.