ބްރެޒިލްގެ މަތިންދާބޯޓެއް 62 މީހުންނާއެކު ދަތުރުކުރަމުން ދަނިކޮށް އެ ގައުމުގެ ސައޮ ޕައުލޯ ކައިރިއަށް ވެއްޓިއްޖެ އެވެ.

ބޯޓު ވެއްޓުނުކަން ކަށަވަރުކޮށްދީ އެއާލައިނުން މީޑިއާއަށް މައުލޫމާތު ދެމުން ބުނީ މިހާތަނަށް އެއްވެސް މީހަކު ސަލާމަތްވިކަން ކަށަވަރުވެފައި ނުވާ ކަމަށާއި ދަތުރުކުރީ 58 ފަސިންޖަރުންނާއި ދެ ކްރޫއިން ކަމަށެވެ.

"ވަރަށް ހިތާމަވެރި ހަބަރެއް. ބޯޓުން ދަތުރުކުރި ހުރިހާ އެންމެންގެ އާއިލާއާއި ރައްޓެހިންނާއެކު މިތިބީ،" ބްރެޒިލްގެ ރައީސް ލުއިޒް އިނާސިއޯ ލޫލާ ޑަ ސިލްވާ "އެކްސް" ގައި ވިދާޅުވި އެވެ.

ރިޕޯޓްތައް ބުނާ ގޮތުން ބޯޓުން ދަތުރުކުރި އެންމެން ވަނީ މަރުވެފަ އެވެ. ނަމަވެސް މިހާތަނަށް ކަމާބެހޭ އެއްވެސް ފަރާތަަކުން އެކަން ކަށަވަރުކޮށްދީފައެއް ނުވެ އެވެ.

ސޯޝަލް މީޑިއާގައި ދައުރުވަމުންދާ ވީޑިއޯތަކާއި ފޮޓޯތަކުން ފެންނަ ގޮތުގައި އެ ބޯޓު އެނބުރެމުން އައިސް ވެއްޓުނީ ގެއެއް މައްޗަށެވެ. ނަމަވެސް ބޯޓު ވެއްޓުނުއިރު އެ ގޭގައި އެއްވެސް މީހަކު ނޫޅޭ ކަމަށް ރިޕޯޓްތައް ބުނެ އެވެ.

ބޯޓު ވެއްޓުނު ސަރަހައްދުގައި ސިއްހީ ހިދުމަތްތެރިންނާއި ފަޔާ ފައިޓަރުންގެ އިތުރުން އަސްކަރިއްޔާއިން އަންނަނީ ހަރަކާތްތެރިވަމުންނެވެ.

އޭޓީއާރް 500-72 ގެ އެ ބޯޓު ދަތުރުކުރަމުން ދިޔައީ ބްރެޒިލްގެ ކަސްކަވެލް އެއާޕޯޓުން ސައޮ ޕައުލޯއަށެވެ.