މަތީ ތައުލީމާއި ތަމްރީން ދޭ ގިނަ މަރުކަޒުތަކުން ހިންގާ ގިނަ ކޯސްތައް ސޯޝަލް މީޑިއާގައި އިސްތިހާރު ކުރަމުންދާތީ ކޯސްތައް އިސްތިހާރުކޮށްފައި ވަނީ އެމްކިއުއޭއިން ހުއްދަ ދީފައިވާ ގޮތަށްތޯ ބަލައި އެކަން ކަށަވަރަން މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން އިލްތިމާސް ކޮށްފި އެވެ.

އެމްކިއުއޭއިން ކުރި އިއުލާނެއްގައި ބުނީ ކޯސްތަކަށް ކިޔަވަން ފެށުމުގެ ކުރިން އެ ކޯހާ ބެހޭ ފުރިހަމަ މައުލޫމާތު އެ އޮތޯރިޓީން ހޯދުމަށް އެދޭ ކަމަށެވެ.

"ކިޔަވާ ދަރިވަރުން އެ ޕްރޮގްރާމަކަށް އެންރޯލްވުމުގެ ކުރިން، އެ ޕްރޮގްރާމް އިސްތިހާރު ކޮށްފައި ވަނީ އެމްކިއުއޭއިން ހުއްދަ ދީފައިވާ ގޮތަށްކަން ކަށަވަރުކޮށް، ކިޔެވުން ފެށުމުގެ ކުރިން އެ ޕްރޮގްރާމަކާ ބެހޭ މައުލޫމާތު ހޯދުމަށް މި އޮތޯރިޓީން އިލްތިމާސްކުރަން،" އެމްކިއުއޭއިން ބުންޏެވެ.

މިއާއެކު އެމްކިއުއޭއިން ބުނީ ހުއްދަ ދީފައިވާ ކޯސްތަކުގެ ލިސްޓާއި އެހެނިހެން މައުލޫމާތު އެ އޮތޯރިޓީގެ ވެބްސައިޓުން ލިބޭނެ ކަމަށެވެ.

ފަހަކަށްް އައިސް ބައެއް އިންސްޓިޓިއުޓުތަކާއި ކޮލެޖުތަކުން އަންނަނީ އެމްކިއުއޭގައި ރަޖިސްޓްރީ ނުކޮށް ކޯސްތައް ހިންގަމުންނެވެ. އެއާއެކު، ބައެއް ފަހަރު ކުދިންނަށް އެއީ ރަޖިސްޓާޑް ކޯހެއްކަން އެނގެނީ ކިޔަވައި ނިމޭ ފަހުންނެވެ.

މީގެއިތުރުން ޔުނިވާސިޓީތަކާއި ކޮލެޖުތައް އަދި އިންސްޓިޓިއުޓްތަކުގެ ނަމުގައި އޮޅުވާލައިގެން ކޯސްތައް ހިންގާނެ ކަމަށް ބުނެ ސްކޭމްތަކެއް ވެސް އަންނަނީ ހިންގަމުންނެވެ.