މި ހަފުތާ ކަކުލުގެ އޮޕަރޭޝަން ކުރި ފުޓްސަލް ތަރި، ހުސެއިން ޝަރީފް (އޮންލީ) އަށް ބޮޑު ދެ މުބާރާތުގައި (ގޯލްޑަން ފުޓްސަލް ޗެލެންޖް އާއި ކްލަބް މޯލްޑިވްސް ކަޕްގައި) ނުކުޅެވޭނެކަން ކަށަވަރުވެއްޖެ އެވެ.

ރާއްޖޭގެ ފުޓްސަލް ކިންގުންގެ ތެރޭގައި ގުނާލެވޭ އޮންލީ އަށް އަނިޔާވީ, ކުޑަ އީދުގައި ށ. މިލަންދޫގައި ކުރިއަށްދިޔަ މުބާރާތެއްގެ ތެރެއިންނެވެ. އެއާ އެކު, އޮންލީ ވަނީ މި ހަފުތާ އަނިޔާ އިން ސަލާމަތްވުމަށް ކަކުލުގެ އޮޕަރޭޝަނެއް ކޮށްފަ އެވެ.

"އަދަދު" އާ ވާހަކަ ދައްކަމުން އޮންލީ ބުނީ, ޑޮކްޓަރު ލަފާ ދެނީ 7-8 މަސް ކުޅުމާ ދުރުގައި ހުރުމަށް ކަމަށެވެ. އެހެންވެ, ކުރިއަށް ހުރި މުބާރާތްތަކުގައި ނުފެންނާނެ ކަމަށާއި, އެކަމަކު ޓީމާއެކު ހުންނާނެ ކަމަށް އޮންލީ ބުނެފައިވެ އެވެ.

"ޑޮކް ބުނީ 7-8 މަސް ތެރޭގައޭ ކުޅެވޭނީ. އެހެންވެ, ކުރިއަށް އޮތް ގޯލްޑަން ނުކުޅެން ނިންމައިގެން މި ހުރީ. ޓީމާއެކު ހުންނާނީ އެކަމަކު. ގޯލްޑަންގެ ފަހުން ކުޅެން ފަށާނީ. އިންޝާ الله" ގައުމީ ފުޓްސަލް ޓީމާ އެކު، އޭޝިއާ މުބާރާތުގެ ކޮލިފައިންގައި ވެސް ވާދަކޮށްފައިވާ އޮންލީ ބުންޏެވެ.

އޮންލީ ބުނީ ކުލަބް މޯލްޑިވްސްގައި އެޗްޑީސީ ޓީމަށް އަދި ގޯލްޑަންގައި ލ. ގަން ޓީމަށް ދެވޭ އެންމެ ބޮޑަކަށް ސަޕޯޓުދޭނެ ކަމަށެވެ.

ރާއްޖޭގައި ބާއްވާ ގިނަ ފުޓްސަލް މުބާރާތްތަކުގައި އެންމެ ޑިމާންޑް ބޮޑު އެއް ކުޅުންތެރިޔަކީ އޮންލީ އެވެ. އޭނާ ވަނީ ރާއްޖޭގައި ބާއްވާ ބޮޑު ހުރިހާ ފުޓްސަލް މުބާރާތެއް ކަހަލަ ގޮތަކަށް އެންމެ މޮޅު ފުޓްސަލް ކުޅުންތެރިޔާގެ މަގާމަށް ދޭ ކިންގް އޮފް ފުޓްސަލްގެ މަގާމު ހޯދާފަ އެވެ.

އޮންލީގެ އެންމެ ފާހަގަ ކޮށްލެވޭ ކާމިޔާބީ އަކީ އޭނާގެ ކެޕްޓަންކަމުގެ ދަށުން, 2022 ވަނަ އަހަރު ބޭއްވި ކްލަބް މޯލްޑިވްސް ކަޕް ފެނަކަ ޓީމާއެކު ކާމިޔާބު ކުރުމާއި, އޭގެ ފަހުން 2023 ވަނަ އަހަރު ބޭއްވި ގޯލްޑަން ފުޓްސަލް މުބާރާތް ލ. ގަން ޓީމާއެކު ކާމިޔާބު ކުރުމުވެ. އެ ފަހަރުގެ ކިންގް އޮފް ދި ޓޯނަމެންޓަކީ ވެސް އޮންލީ އެވެ.

މި އަހަރު ކުރިއަށްދިޔަ ގޯލްޑަން ފުޓްސަލް މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ވެސް އޮންލީ ހިމެނުނެވެ.