ފަލަސްތީނުގައި މެދު ނުކެނޑި ގަތުލްއާންމު ހިންގަމުންދާ އިޒްރޭލުން ޔަމަނުގެ ބަނދަރުމަތީ ރަށް ހުދައިދާ އަށް ބޮން އަޅައިފި އެވެ.

އިޒްރޭލުން ޔަމަނަށް ބޮންއެޅީ އިޒްރޭލަށް ދިން ޑްރޯން ހަމަލާއެއްގެ ޒިންމާ ޔަމަނުގެ ހޫތީން ނެގިތާ އެއް ދުވަސް ފަހުންނެވެ. ޑްރޯން ހަމަލާގައި އިޒްރޭލުގެ އެކަކު މަރުވެ، 10 މީހުން ޒަހަމްވި އެވެ.

ޔަމަނުގެ މީޑިއާތަކުން ބުނީ އެ އިޒްރޭލުން ދިން ހަމަލާ އަމާޒުވީ ތެޔޮ ރައްކާކުރާ ކޮށާރަކާއި ޕަވަ ޕްލާންޓަކަށް ކަމަށާއި އެ ސަރަހައްދުތަކުގައި ވަރަށް ބޮޑަށް އަލިފާން ރޯވި ކަމަށެވެ.

ނަމަވެސް ހަމަަލާއާ ގުޅިގެން އިޒްރޭލުން ބުނީ ހަމަލާތައް އަމާޒުކުރީ ޔަމަނުގެ މިލިޓަރީ ފެސިލިޓީތަކަށް ކަމަށެވެ. ޔަމަނުން ވަނީ އެކަން ދޮގުކުރެ އެވެ.

އިޒްރޭލުގެ ހަމަލާތަކާ ގުޅިގެން ޔަމަނުގެ ހޫތީންގެ މިސައިލްތަކެއް އިޒްރޭލަށް އަމާޒުކުރި އެވެ. ނަމަވެސް އޭގެ ތެރެއިން ގިނަ މިސައިލްތައް ވަނީ ނާކާމިޔާބުވެފަ އެވެ.

މެދުއިރުމަތީގެ ގައުމުތަކުން އަންނަނީ ފަލަސްތީނާއެކު އޮތްކަން ހާމަކޮށް، އިޒްރޭލާ ދެކޮޅަށް މަސައްކަތް ކުރަމުންނެވެ. އިޒްރޭލުން ފަލަސްތީނުގައި ހިންގަމުންދާ ގަތުލްއާންމު ހުއްޓާލުމަށް ދުނިޔޭގެ ގިނަ ގައުމުތަކުން އަންނަނީ ގޮވާލަމުންނެވެ.