ކޮޕަ އެމެރިކާގެ ފައިނަލުގައި މަޝްހޫރު ލަވަކިޔުންތެރިޔާ ޝަކީރާގެ ޕާފޯމަންސް މީޑިއާނެޓުގެ އައިސްޓީވީ-2 އިން ބަލައިލެވޭ ގޮތަށް ހަމަޖެހިއްޖެ އެވެ.

އަންނަ އާދީއްތަ ދުވަހުގެ ރޭ ފަތިހު 05:00 ޖަހާއިރު މިއާމީގެ ހާޑްރޮކް ސްޓޭޑިއަމްގައި ކުޅޭ މުޅި މެޗު އައިސްޓީވީން ބެލޭނެ އެވެ.

ސެމީގައި ކެނެޑާއާ ދެކޮޅަށް މެޗު ކާމިޔާބުކޮށް އާޖެންޓީނާ ވަނީ މުބާރާތުގެ ފައިނަލުގެ ފުރަތަމަ ޖާގަ ކަށަވަރުކޮށްފަ އެވެ. ފައިނަލުގެ ދެވަނަ ޖާގަ ކަށަވަރު ކުރުމަށް މިރޭ ފަތިހު ނިކުންނާނީ އުރުގުއޭ އަދި ކޮލަމްބިއާ އެވެ.

ސައުތު އެމެރިކަން ފުޑްބޯލް ކޮންފެޑެރޭޝަންގެ ރައީސް އެލެޖެންޑްރޯ ޑޮމިންގުއޭޒް ވިދާޅުވީ ފައިނަލެއްގައި ޕާފޯމްކުރަން އެންމެ ރަނގަޅު ލަވަކިޔުންތެރިޔަކީ ޝަކީރާ ކަމާމެދު އެކަކު ވެސް ދެބަސް ނުވާނެ ކަމަށެވެ.

ބްރެޒިލްގައި 2021 ގައި ބޭއްވި ކޮޕަ އެމެރިކާގެ ރަސްމީ ލަވަ ހެދި ޝަކީރާ ވަނީ އެ އަހަރުގެ ފައިނަލުގައި ވެސް ޕާފޯމް ކޮށްފަ އެވެ.