އަންނަ އަހަރުގެ ތެރޭގައި މިހާރު ނަގަމުންދާ ޖީއެސްޓީ އާއި ގްރީން ޓެކްސް އަދި ޓެލެކޮމް ފީތަކުގެ އިތުރުން އިމްޕޯޓް ޑިއުޓީ ރޭޓުތައް ބޮޑުކުރަން ނިންމައި އެކަން ފިނޭންސް މިނިސްޓްރީން މިއަދު ހާމަކޮށްފި އެވެ.

ސަރުކާރުގެ މާލީ ސިޔާސަތުތަކަށް އަންނަ ބަދަލުތަކާ އެއްގޮތަށް އުނިއިތުރު ގެނައުމަށް ނިންމައި ކެބިނެޓުން ފާސްކޮށް މިއަދު ވަނީ ދައުލަތުގެ މީޑިއަމް ޓާމް ރެވެނިއު ސްޓްރެޓަޖީ 2024 ޝާއިއުކޮށްފަ އެވެ.

އެ ސްޓްރެޓެޖީގައި ވަނީ މިއަހަރުން ފެށިގެން ކުރިއަށް އޮތް ފަސް އަހަރުގެ ތެރޭގައި ދައުލަތުގެ އާމްދަނީ އިތުރުކުރުމަށް އަޅަން ނިންމާފައިވާ ފިޔަވަޅުތަކާއި އެ ފިޔަވަޅުތައް ތަންފީޒު ކުރަން ފަށާނެ ތާރީހުތައް ހިމަނާފަ އެވެ.

2024 ގައި ތަންފީޒުކުރާ ފިޔަވަޅުތައް

• އެއާޕޯޓުގެ ހިދުމަތްތަކުން ނަގަމުންދާ ޓެކުހާއި ފީތައް ބޮޑުކުރުން
• އެކްސްޕޯޓް އިމްޕޯޓް ގާނޫނުގެ ދަށުން ޑިއުޓީ މާފުކުރާ އައިޓަމްތައް ރިވިއުކުރުން [އާ އައިޓަމްތަކުން ޑިއުޓީ ނަގަން ފަށާނެ]

2025 ގައި ތަންފީޒުކުރާ ފިޔަވަޅުތައް

• ގްރީން ޓެކްސް ރޭޓް ބޮޑުކުރުން
• ޖީއެސްޓީ ނަގާ މުދާ އިތުރުކުރުމާއި ރޭޓު ބޮޑުކުރުން
• އިމްޕޯޓް ޑިއުޓީ ރޭޓުތައް ބޮޑުކުރުން
• ޓެލެކޮމް އޮޕަރޭޓަރުން ދައްކަން ޖެހޭ ކޯޕަރޭޓް އިންކަމް ޓެކްސް ބޮޑުކުރުން
• ޓޫރިޒަމް ބިމު ކުލި ބޮޑުކުރުން
• ބަނގުރަލާއި އޫރުމަހާއި ދުންފަތް ފަދަ ތަކެތިން ޓެކްސް ނެގުމުގެ ސިޔާސަތު ރިވިއުކުރުން

ސަރުކާރުން ތަންފީޒުކުރަން ނިންމާފައިވާ އާމްދަނީ އިތުރުކުރުމުގެ ފިޔަވަޅުތައް. ފިޔަވަޅުތައް ސިފަކުރާނީ ކުރިއަށް އޮތް ފަސް އަހަރަށް ބަހާލައިގެން ---

އޭގެ އިތުރުން 2026 ގައި ކާބަން ކްރެޑިޓްސް މަނިޓައިޒް ކުރުމަށާއި އަމިއްލަ ފަރުދުންގެ އާމްދަނީން ނަގާ އިންކަމް ޓެކުހާއި ކޯޕަރޭޓް އިންކަމް ޓެކްސްތައް ބޮޑުކުރަން ވަނީ ނިންމާފަ އެވެ. އޭގެ އިތުރުން 2027 އަދި 2028 ގައި ފިޔަވަޅުތަކެއް އެޅުމަށް ވެސް ވަނީ ނިންމާފަ އެވެ.