މި އަހަރު ގެވެށި އަނިޔާގެ 194 މައްސަލައެއް ފެމިލީ ޕްރޮޓެކްޝަން އޮތޯރިޓީ (އެފްޕީއޭ) އަށް ރިޕޯޓުކޮށްފައިވާ ކަމަށް އެ އޮތޯރިޓީން މިއަދު ބުނެފި އެވެ.

މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން ބޭއްވި ނޫސްވެރިންގެ ބައްދަލުވުމެއްގައި އެފްޕީއޭގެ ސީއީއޯ އައިމިނަތު ޝިރާނީ ވިދާޅުވީ ގެވެށި އަނިޔާގައި އަންހެނުން ޝާމިލުވާ 194 މައްސަލައިގެ ތެރޭގައި ފިރިހެނުންގެ ފަރާތުން އަނިޔާ ލިބޭ 33 މައްސަލަ ހިމެނޭ ކަމަށެވެ.

ފިރިހެނުން ޝާމިލުވާ 84 މައްސަލަ އެފްޕީއޭއަށް ހުށަހަޅާފައިވާއިރު، އަނިޔާކުރާ އަންހެނުންގެ ނިސްބަތް ވަރަށް މަދު ކަމަށް ވެސް ޝިރާނީ ވިދާޅުވި އެވެ.

"މި ހަ މަސް ދުވަސް ތެރޭގައި ނުކުޅެދުންތެރިކަން ހުންނަ ހަތަރު ފަރާތެއްގެ މައްސަލަ ހުށަހެޅިފައި އެބަހުރި. ކައިވެނިކޮށްގެން ނޫނީ އިނދެވަރިކޮށްފައިވާ ފަރާތްތަކުގެ 123 މައްސަލައެއް އެބައުޅޭ. މައިންބަފައިން ނޫނިއްޔާ ބަލަދުވެރިން އަދި ބެލެނިވެރިން ހިމެނޭ 92 މައްސަލައެއް އެބަ އުޅޭ. ކައިވެނީގެ ގޮތުން ގުޅިފައިވާ މީހުންގެ 84 މައްސަލަ ހިމެނޭ،" ޝިރާނީ ބުންޏެވެ.

ކުރިއާ ހިލާފަށް ނަފްސާނީ ގޮތުން ކުރެވޭ އަދި އަނގަބަހުން ކުރެވޭ އަނިޔާ އިތުރުކަން ފާހަގަކުރައްވާ ޝިރާނީ ވިދާޅުވީ އެފަދަ 162 މައްސަލަ ފާހަގަވެފައިވާ ކަމަށާއި، ޖިސްމާނީ އަނިޔާގެ 148 މައްސަލަ ހުށަހަޅާފައިވާއިރު، ކުޑަކުދިން ކުރިމަތީގައި ކުރާ ގެވެށި އަނިޔާގެ 87 މައްސަލަ ހުށަހަޅާފައިވާ ކަމަށެވެ.

އޭގެއިތުރުން ކުރިއާ ހިލާފަށް ސައިބާ ކްރައިމް ހިމެނޭ މައްސަލަތައް ވެސް އިތުރުވާ ކަމަށާއި، އެގޮތުން މެސެޖު ފޮނުވައި، ބްލެއިކްމެއިލްކޮށް އަދި ލީކްކުރުން ވެސް ހިމެނޭ ކަމަށް އޭނާ ވިދާޅުވި އެވެ.

ޝިރާނީ ވިދާޅުވީ އުމުރުން ދުވަސްވީ މީހުންގެ އެލަވަންސް ހިފަހައްޓައި ނަހަމަކޮށް ދަރިން ބޭނުންކުރާ މައްސަލަ ވެސް ފާހަގަވަމުންދާ ކަމަށެވެ.

ކުދިން ކުރިމަތީގައި ގެވެށި އަނިޔާކުރުން އިތުރުވާކަމަށާއި، އޭގެ ސަބަބުން އެކުދިން ކުށުގެ ވެށިން ބޮޑެތިވެގެން އަންނައިރު އަނިޔާކުރާ ބަޔަކަށް ބަދަލުވެގެންދާ ކަމަށް އޭނާ ވިދާޅުވި އެވެ.

"އަނިޔާ ކުރާ ފަރާތްތަކުގެ ޓްރެންޑަށް ބަލާއިރުގައި ޝާމިލުވާ ގިނަ ފަރާތްތަކަކީ މަސްތުވާތަކެތި ނަގާ ފަރާތްތަކުގެ ގޮތުގައި އަޅުގަނޑުމެންނަށް ހުރީ ފާހަގަކުރެވިފައި. އަދި އޭގެ އިތުރުން ނަފްސާނީ ބަލިތައް ހިމެނޭ ފަރާތްތައް ވެސް ޕާޕަޓްރޭޓާސް ގޮތުގައި ފާހަގަކުރެވެމުންދޭ،" ޝިރާނީ ބުންޏެވެ.

ގެވެށި އަނިޔާއާ ގުޅިގެން ގާނޫނީ އެހީތެރިކަން ބޭނުންވާ ފަރާތްތަކަށް 2022 އިން ފެށިގެން އެފްޕީއޭއިން އެ އެހީތެރިކަން ފޯރުކޮށްދެމުން އަންނައިރު، ޝިރާނީ ވިދާޅުވީ މިހާތަނަށް 164 އެހީތެރިވި ކަމަށާއި، މި އަހަރު ވެސް 33 ފަރާތަކަށް އެ އެހީތެރިކަން ދީފައިވާ ކަމަށެވެ.

ގެވެށި އަނިޔާގެ ގާނޫނަށް 12 އަހަރުވެފައިވުމާއެކު ގާނޫނުގައި އާ ޓްރެންޑުތަކާއެކު ހުރަސްތަކެއް ހުރި ކަމަށާއި، އެކަންކަން ފާހަގަކޮށް ހައްލު ހޯދަން މަސައްކަތް ކުރައްވާނެ ކަމަށް ވެސް ޝިރާނީ ވިދާޅުވި އެވެ.