ރ. އުނގޫފާރުގައި މަގުބައްތި ހޮޅި ދަނޑިއަކުން ކަރަންޓުގައި ޖެހުނު ދެ ކުދިން ސަލާމަތްކުރި 18 އަހަރުގެ ޒުވާނާ އިތުރު ފަރުވާއަށް އިއްޔެ މާލެ ގެނެސްފި އެވެ.

އުނގޫފާރު ކައުންސިލް މެމްބަރު މުހައްމަދު މުނީޒް "އަދަދު" އާ ވާހަކަ ދައްކަމުން ވިދާޅުވީ އެ ޒުވާނާއަށް ފަރުވާދެމުން ދިޔައީ ވެންޓިލޭޓަރުގައި ކަމަށާއި، އެ ކުއްޖާގެ ހާލު އަދިވެސް ވަރަށް ސީރިއަސް ކަމަށެވެ.

"ކަރަންޓުގައި ޖެހުނު ޒުވާނާއަކީ އޯޓިސްޓިކް ކުއްޖެއް. އެ ކުއްޖާ ކަރަންޓުގައި ޖެހުނީ އެ ކުދިން ސަލާމަތްކުރަން އުޅެނިކޮށް. އިތުރު ފަރުވާއަށް މާލެ ގެންދިޔައީ އިއްޔެ ހަވީރުގެ ވަގުތެއްގައި،" މުނީޒް ވިދާޅުވި އެވެ.

ހާދިސާގައި ކަރަންޓުގައި ޖެހުނީ އެ ޒުވާނާގެ އިތުރުން 12 އަހަރުގެ އަންހެން ކުއްޖަކާއި، އަށް އަހަރުގެ ފިރިހެން ކުއްޖެކެވެ. ނަމަވެސް އެ ދެ ކުދިންނަށް އުނގޫފާރު ހޮސްޕިޓަލުން ފަރުވާ ދިނުމަށްފަހު ވަނީ ދޫކޮށްލާފަ އެވެ.

އުނގޫފާރުން މި ނޫހާ ވާހަކަ ދެއްކި މީހަކު ބުނީ އެ ކުދިން ކަރަންޓުގައި ޖެހުނީ ކުޑަކުދިންގެ ޕާކު ކައިރީ ފެންގަނޑެއްގައި ކުޅެނިކޮށް އެތާހުރި މަގުބައްތިއަކުން ކަމަށެވެ.